དེ་ཡང་གནས་ཚུལ་སྔོན་སོང་ལྟར་གླིང་སྟོད་སྨད་གཉིས་ནས་བདུན་ཕྲག་གི་ཐུག་ཆེན་གྲུབ་མཚམས་གླིང་སྟོད་སྨད་གཉིས་ཀྱི་བདུན་ཕྲག་གསུམ་གྱི་རིང་བོན་གྱི་སྤྱན་ལྡན་ཆེན་མོའི་ཚད་མ་ལས་ལེའུ་བཞི་པ་མངོན་སུམ་ཚད་མ་མའི་སྐོར། གཡུང་དྲུང་བོན་གྱི་བཤད་སྒྲུབ་འདུས་སྡེའི་མཁན་སློབ་རྣམ་གཉིས་ནས་གླིང་སྟོད་སྨད་གཉིས་སུ་དཔེ་ཁྲིད་གནང་ཞིང་ཁྱད་པར་དུ་ད་ལོར་“རྣལ་འབྱོར་མངོན་སུམ་དང་རྗེས་དཔག་ཚད་མ།”དེ་ཡང་རྣལ་འབྱོར་མངོན་སུམ་གྱི་བདག་རྐྱེན་ཏིང་ངེ་འཛིན་དང་།
རྗེས་དཔག་གི་བསྒྲུབ་བྱ་སོགས་ཀྱི་སྐོར་ལ་ལུང་དང་རིག་པའི་རྐྱ་བར་ནས་བཤར་ཏེ་དགག་སྒྲུབ་ཚུལ་བཞིན་བྱས་ཤིང་། བདུན་ཕྲག་གསུམ་རིང་གི་གླིང་སྟོད་སྨད་གཉིས་ཀྱི་ཐུག་ཆེན་གྲུབ་མཚམས། བདུན་རེའི་ཐུག་ཆེན་སྐབས་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་སྐུ་དངོས་སུ་ཕེབས་ནས་གཟིགས་རྟོག་གནང་ཡོད་པ་རེད།
བཤད་སྒྲུབ་འདུས་སྡེའི་ཟུང་འབྲེལ་འགན་འཛིན་མཆོག་ནས་གླིང་སྟོད་སྨད་གཉིས་ཀྱི་ཁྱབ་ལོག་རེ་རེ་བཞིན་གྲངས་ཚད་དང་བཅས་ཚོགས་དབུས་སུ་སྙན་སྒྲོན་ཞུས།
འཆར་ཅན་ལྟར་ཉིན་གཉིས་ཀྱི་རིང་། ༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་དབུས་བཤད་སྒྲུབ་མཁན་སློབ་རྣམ་གཉིས་དང་དགེ་བའི་བཤེས་གཉེན་དུ་མ་ཚང་འཛོམས་འོག་གཡས་རུའི་འཆད་རྩོད་ཆེན་མོའི་རྩོད་རྒྱུགས་དམ་བཅའ་དབུ་འཛུགས་གནང་ཞིང་། ད་ལོའི་ཁྲིད་མཚམས་ཀྱི་གཞུང་དོན་དཀའ་གནད་གང་ཡོད་ཤོག་དྲིལ་དུ་སྒྲིལ་ནས།
སློབ་གཉེར་བ་སོ་སོས་རང་འདེམས་ཀྱིས་༧སྐྱབས་རྗེ་སྨན་རིའི་དཔོན་སློབ་རིན་པོ་ཆེའི་ཕྱག་ཏུ་ཕུལ་ནས་ཤོག་དྲིལ་ཡིག་རྒྱུགས་གསུང་མཛད་གནང་ནས། ངག་སྐྱོར་དང་། རྩོད་སྤོང་སོགས་གང་བབ་ལྟར་སློབ་གཉེར་བ་སོ་སོས་དེ་མཚུངས་ཀྱི་རིག་པས་བརྡར་ཤ་ལེགས་པར་བཅད་དེ་གཡས་རུ་འཆད་རྩོད་ཆེན་མོ་མཇུག་བསྡུས་ཡོད་པ་བཅས་ཀྱི་གནས་བསྡུས་སུ།
