གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་དེང་དུས་སྤྱི་ཚོགས་ཀྱི་གནས་བབ་དང་། ཞིབ་འཇུག་བྱེད་ཕྱོགས་ཐད་ཀྱི་དགོས་པར་དམིགས་ནས། ལོ་ངོ་དུ་མའི་སྔོན་ནས་གཡུང་དྲུང་བོན་གྱི་བཤད་སྒྲུབ་འདུས་སྡེའི་སློབ་གཉེར་བ་དག་ལ་བདུན་རེའི་བགྲོ་གླེང་དང་། རྩོམ་རྒྱུགས་སོགས་གནང་བའི་སྲོལ་བཙུགས་ཡོད་ཅིང་། བར་ལམ་ནས་དགོས་དམིགས་ཀྱིས་བདུན་རེའི་བགྲོ་གླེང་གི་ཚབ་ཏུ་ཟླ་རེའི་བགྲོ་གླེང་གཏན་འབེབས་བྱས་ཤིང་། དེ་ཡང་འཛིན་གྲྭ་གོང་འོག་བར་གསུམ་ནས་སློབ་གཉེར་བ་རེ་རེ་བཅས་མི་གསུམ་ནས་བགྲོ་གླེང་བརྗོད་བྱ་རང་མོས་ནས་བདམ་ཐོན་བྱས་ཐོག་བགྲོ་གླེང་གནང་བཞིན་པ་ལྟར་།
ཕྱི་ལོ་ ༢༠༢༥ ལོའི་ཟླ་ ༡༡ པའི་ཚེས་ ༣༠ཉིན་གཡུང་དྲུང་བོན་གྱི་བཤད་སྒྲུབ་འདུས་སྡེའི་ཟླ་རེའི་བགྲོ་གླེང་སྐབས་ ༢༠ པ་འཚོགས་གནང་ཡོད་ཅིང་། དེ་ཡང་༧སྐྱབས་རྗེ་རྒྱལ་བ་སྨན་རིའི་༧སྐྱབས་རྗེ་མཁན་སློབ་རྣམ་གཉིས་གཙོས་བཤད་སྒྲུབ་མཁན་སློབ་རྣམ་པ་གཉིས་བཅས་དབུ་བཞུགས་ཀྱིས་བཤད་སྡེའི་དགེ་རྒན་རྣམ་པ། གཞན་ཡང་དགེ་བཤེས་དང་སློབ་གཉེར་བ་ཚང་འཛོམས་ཐོག
བཀའ་རམས་པ་དགེ་ལེགས་ཉི་མ་ལགས་ནས་གསུང་བཤད་གནང་བཞིན་པ།
ཐོག་མར་རིག་གཡུང་དྲུང་བོན་གྱི་བཤད་སྒྲུབ་འདུས་སྡེའི་ཚོགས་གཙོ་བསྟན་པ་མཆོག་ལྡན་ལགས་ཀྱིས་གཙོ་སྐྱོང་ཐོག་ཕྱི་དྲོའི་དུས་ཚོས་ ༥།༠༠ བགྲོ་གླེང་དབུ་འཛུགས་གནང་ཞིང་
གཏམ་བཤད་པ་དང་པོ་འཛིན་གྲྭ་གོང་མའི་ཁོངས་ནས་བཀའ་རམས་པ་དགེ་ལེགས་ཉི་མ་ལགས་ནས་༼རྣམ་མེད་པས་རྡུལ་བཞེད་ཚུལ་དང་ཚན་རིག་པས་རྡུལ་འཇོག་ཚུལ་སྐོར་གྱི་མཚུངས་བསྡུར་རགས་བསྡུས༽ཞེས་པའི་བརྗོད་གཞི་དང་འབྲེལ་ནས་ དང་པོ་ཅི་ཞིག་ལ་རྡུལ་ཟེར་བ་དང་།
གཉིས་པ་རྡུལ་བརྩི་གཞི་བྱེད་པའི་དགོས་པ། གསུམ་པ་རྣམ་མེད་པས་རྡུལ་བཞེད་ཚུལ། བཞི་པ་ཚན་རིག་པས་རྡུལ་བཞེད་ཚུལ། ལྔ་པ། རྣམ་ཚན་གཉིས་ཀྱི་རྡུལ་མཚུངས་འགོད་པ། དྲུག་པ། རྣམ་ཚན་གཉིས་ཀྱི་རྡུལ་མི་མཚུངས་སུ་འགོད་པ། བདུན་པ། རྡུལ་ཆེ་འཕེལ་གྱི་གཞུང་ལུགས་འགོད་པ། བཅས་སྡེ་ཚན་བདུན་དུ་་ཕྱེས་ཏེ་གསུང་བཤད་གནང་ཡོད་པ་དང་།
རྫོགས་ཆེན་ལོ་རིམ་དང་པོའི་ཤེས་རབ་ཀུན་གསལ་ལགས་ནས་གཏམ་བཤད་གནང་བཞིན་པ།
དེ་རྗེས་རྫོགས་ཆེན་སློབ་གཉེར་བ་ཤེས་རབ་ཀུན་གསལ་ལགས་ནས་༼རྣམ་བཅུ་དབང་ལྡན་སྐོར་རགས་དཔྱད།༽ཅེས་པའི་བརྗོད་གཞིའི་ཐོག་ནས།
དང་པོ། བརྗོད་བྱ་འདི་བདམས་པའི་དམིགས་ཡུལ། གཉིས་པ། ངོ་བོའམ་མཚོན་དོན། གསུམ་པ། ཕན་ནུས་གསལ་བཤད། བཞི་པ། ཡིག་གཟུགས་གང་དུ་ངོས་འཛིན་ཚུལ་བཅས་ཀྱི་སྒོ་ནས་གསུང་བཤད་དང་དྲི་བ་དྲིས་ལན་གནང་།
ས་ལམ་འཛིན་གྲྭའི་སློབ་གཉེར་བ་ཚུལ་ཁྲིམས་རྣམ་དག་ལགས་ནས་གཏམ་བཤད་གནང་བཞིན་པ།
དེ་རྗེས་ས་ལམ་འཛིན་གྲྭའི་སློབ་གཉེར་བ་ཚུལ་ཁྲིམས་རྣམ་དག་ལགས་ནས་༼གོ་ལའི་ཚ་དྲོད་འཕེལ་བ།༽ཞེས་པའི་བརྗོད་བྱའི་ཐོག་ས་བཅད་དང་པོ་ གོ་ལའི་ཚ་དྲོད་འཕེལ་བ་ཞེས་པའི་གོ་དོན། ས་བཅད་གཉིས་པ། གོ་ལའི་ཚ་དྲོད་འཕེལ་བའི་བྱུང་རིམ། ས་བཅད་གསུམ་པ། གོ་ལའི་ཚ་དྲོད་འཕེལ་བའི་རྒྱུ་རྐྱེན། ས་བཅད་བཞི་པ། གོ་ལའི་ཚ་དྲོད་འཕེལ་བའི་གནོད་སྐྱོན། ལྔ་པ། གོ་ལའོ་ཚ་དྲོད་འཕེལ་བར་འགོག་བྱེད་ཀྱི་ཐབས་ལམ།
བཅས་དེ་འབྲེལ་གྱི་དྲི་བ་དྲིས་ལན་སྐར་མ་བཅོ་ལྔ་གནངས་ཏེ་བོད་ཟླ་བརྒྱདཔའི་བགྲོ་གླེང་མཇུག་གྲུབ་ཡོད་པ་བཅས་གཡུང་དྲུང་བོན་གྱི་དྲྭ་ཚིགས་གཙོ་སྒྲུབ་ཁང་ནས།
