དེ་ཡང་སྤྱིར་འཇིག་རྟེན་སྐྱེ་འགྲོ་ཡོངས་ཀྱི་ཕན་བདེའི་འབྱུང་གནས་སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པ་དང་། སྒོས་སུ་འབྲེལ་ཆགས་དད་ལྡན་སློབ་འབངས་ཡོངས་ཀྱིས་ཇི་ལྟར་གསོལ་བ་བཏབ་པ་བཞིན་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་ད་ལོའི་ཕྱི་ཟླ་བཞི་བའི་ཟླ་མཇུག་ཙམ་ནས་ཟླ་བ་གཉིས་མ་ཟིན་ཙམ་ཡུ་རོབ་བོན་ཚོགས་རྣམས་དང་། དེ་མིན་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་དུ་མས་ཇི་ལྟར་གསོལ་བ་བཏབས་དོན་ལྟར་རིས་སུ་མ་ཆད་པའི་དད་ལྡན་སྟོང་ཕྲག་མང་པོར་བོན་ཁྲིད་དང་། བཀའ་དབང་། ལེགས་ཉེས་བླང་དོར་གྱི་ཞལ་གདམས་བཀའ་སློབ་སོགས་གང་ལ་གང་དགོས་དེ་ལ་དེར་སྟོན་གྱི་བསྟན་འགྲོའི་མཛད་འཕྲིན་སྐྱོང་བཞིན་པར།
༢༠༢༥ ཟླ་ ༠༦ ཚེས་ ༡༢ ཉིན་ ༧སྐྱབས་རྗེ་སྨན་རིའི་ཡོངས་འཛིན་སྨྲ་དབང་བསྟན་འཛིན་རྣམ་དག་རིན་པོ་ཆེ་མཆོག་སྐུ་མྱ་ངན་ལས་འདས་པའི་ཆེས་ཡིད་སྐྱོ་བའི་གནས་ཚུལ་༧དཔལ་ལྡན་ཁྲི་བརྟན་ནོར་བུ་རྩེའི་མཁན་པོ་བསྟན་པ་གཡུང་དྲུང་མཆོག་གིས་རྒྱལ་བ་སྨན་རི་བ་མཆོག་ལ་དེ་དོན་སྙན་སེང་ཞུས་དོན་ལྟར། ༧སྐྱབས་རྗེ་མཆོག་ནས་ཀྱང་ཐུགས་སྐྱོ་བའི་གནས་ཚུལ་དེ་གསན་འཕྲལ་དབྱིན་ཇི་དང་ཨ་རི་སོགས་ཀྱི་བསྟན་འགྲོའི་མཛད་འཆར་ཀུན་མཚམས་འཇོག་གནང་ཏེ་བལ་ཡུལ་དུ་ཕེབས་པའི་གནས་ཚུལ་ཁག་ཀུན་གྱིས་མཁྱེན་གསལ་ལྟར་ལ།
དེ་ཡང་ཉེ་ཆར་༧སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་ནས་བྱང་ཨ་རིའི་ཚོགས་སྡེ་ཁག་གི་ཇི་ལྟར་གསོལ་བ་འདེབས་དོན་དུས་སུ་སྨིན་ཕྱིར་མི་འགྱངས་པར་དེ་གར་འགྲོ་དོན་སྐྱོང་རྒྱུ་བཅས་ཀྱི་གསལ་བསྒྲགས་དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་དྲྭ་ཚིགས་ལས་དྲངས།
མཛད་རིམ་རེའུ་མིག་གཤམ་ནས་ཕབ་ཞུས་བྱས་ཆོག
