དེ་རིང་གཤེན་གྱི་འབྱུང་ལྡན་ ༣༠༡ བོད་རྒྱལ་ལོ་ ༣༡༦༣ བོད་མེ་ཕོ་རྟ་ལོའི་གནམ་ལོ་གསར་ཚེས་དང་འབྲེལ་༧གདན་ས་སྨན་རིའི་བོན་མཐུན་འབྲེལ་ལྷན་ཁང་གི་ལོ་དེབ་<<བོན་སྒོ་>> འདོན་ཐེངས་སོ་གཅིག་པ་སྒོ་འབྱེད་དང་འགྲེམ་སྤེལ་གནང་སོང་།
དེ་ཡང་<<བོན་སྒོ་>>ཞེས་པའི་ལོ་དེབ་འདི་ཉིད་ནི་ཐོག་མར་སྤྱི་ལོ་ ༡༩༨༧ ལོར་དབུ་བརྩམས་ཏེ་འདོན་སྤེལ་བྱས་ཤིང་། དཔེ་དེབ་འདི་བོད་སྤྱི་ཡོངས་ཀྱི་དུས་དེབ་ནང་ནས་ཡུན་རིང་ཤོས་གྲས་ཡིན་པར་མ་ཟད། དཔེ་དེབ་ཉིད་ནི་རྩོམ་ཡིག་གི་རྒྱུ་ཆ་ལེགས་པ་དང་། ཆ་རྐྱེན་ཕུན་སུམ་ཚོགས་པ་ཞིག་ཡིན་པ་དང་། ལྷག་པར་དུ་བཙན་བྱོལ་སྤྱི་ཚོགས་ནང་། བོན་དང་བོད་ཀྱི་རིག་གཞུང་ལ་དོ་སྣང་ཤུགས་ཆེར་བྱེད་པའི་སྒོ་མོ་ལྟ་བུ་གྱུར་ཡོད་ཅིང་།
དུས་དེབ་འདིའི་ནང་རྩོམ་ཡིག་གི་སྡེ་ཚན་ལ། “གཡུང་དྲུང་བོན་”དང་ “རྒྱལ་རབས་ལོ་རྒྱུས།” “ཤེས་རིག” “སྙན་ངག” “གནས་ཚུལ་”བཅས་སྡེ་ཚན་ལྔ་ཡི་སྒོ་ནས་གཙོ་བོ་བོན་གྱི་ལྟ་གྲུབ་དང་ལོ་རྒྱུས། རྒྱལ་རབ་སོགས་བརྗོད་གཞི་འདྲ་མིན་གྱི་ཐོག་ལ་རྒྱལ་ཕྱི་ནང་གི་མཁས་པ་མང་པོའིརྩོམ་ཡིག་བཀོད་དང་འགོད་བཞིན་ཡོད་པ་རེད་ལ། དུས་དེབ་འདི་༸གདན་ས་སྨན་རིའི་གླིང་དུ་༸སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་པ་གཉིས་ཀྱིས་རྩོམ་སྒྲིག་ཚོགས་ཆུང་གི་ཚོགས་མི་དང་གཙོ་སྒྲིག་པ་བཀོད་བཞག་གནང་ཐོག རྩོམ་སྒྲིག་ཚོགས་ཆུང་དེ་ཉིད་ཀྱིས་པར་སྐྲུན་དང་འགྲེམ་སྤེལ་གྱི་ལས་འཆར་གནང་བཞིན་ཡོད་པ་རེད།
