དེ་རིང་རྒྱལ་བ་གཤེན་གྱི་འབྱུང་ལྡན་ ༣༠༡ བོད་རྒྱལ་ལོ་ ༣༡༦༣ མེ་ཕོ་རྟ་ལོའི་བོད་ཟླ་ ༡ ཚེས་ ༡༢ དང་། ཕྱི་ལོ་ ༢༠༢༦ ལོའི་ཕྱི་ཟླ་ ༢ པའི་ཚེས ༢༨ ཉིན་གདན་ས་སྨན་རིའི་གླིང་གི་སྐབས་ ༢༣ པའི་དགེ་བཤེས་མཛད་སྒོའི་ཉིན་གསུམ་པར་བཀའ་རམས་པ་ལྔས་སྔ་དྲོར་བཤད་པ་དང་། གཏོང་སྒོ་ཆེན་མོ། ཕྱི་དྲོར་བཀྲ་ཤིས་མཆོད་འབུལ་སོགས་གནང་ཡོད་པ་རེད།
དེ་ཡང་དུས་ཚོད་དྲུག་པའི་(སྟོན་པའི་འཁྲུངས་མཆོད་ཆེད་ཞོགས་འཚོགས་སྐབས་འདུལ་ཆོག་སྔ་འདོན་) ཐོག་གྲྭ་ཚང་གིས་འདུལ་ཆོག་ཚར་གཅིག་གསུངས་ཏེ་ཞོགས་འཚོགས་གྲོལ་རྗེས་ཉིན་འདིའི་བཀའ་རམས་པ་རྣམས་ནས་ལྷ་རྫས་ཀྱི་མཆོད་པ་ཅི་རིགས་པ་དང་བཅས། སྐྱབས་རྗེ་༸རྒྱལ་བ་སྨན་རིའི་མཁན་སློབ་རྣམས་གཉིས་ལ་མཇལ་བཅར་ཞུས། སྔ་དྲོའི་ཆུ་ཚོད་༩:༠༠སྟེང་། གྲྭ་ཚང་མཆོད་དཔོན་ནས་རྡོ་ཏིང་གི་ཚོགས་བརྡ་བཏངས་རྗེས་༧སྐྱབས་རྗེ་མཁན་སློབ་རྣམ་གཉིས་ཚོགས་ཁང་གི་གཡས་གཡོན་ནས་སྤོས་སྣ་རྒྱ་གླིང་གིས་ཕེབས་བསུ་དང་།
གཞན་ཡང་བཤད་སྒྲུབ་མཁན་སློབ་རྣམ་གཉིས་དང་ཉིན་འདིའི་བཀའ་རམས་པ་མངའ་ཀླུ་དྲང་སྲོང་ངག་དབང་ཤེས་རབ་དབང་ཕྱུག་དང་
བཀའ་རམས་པ་སྐྱིད་ཚང་དྲང་སྲོང་དགེ་ལེགས་རིག་པའི་ཉི་མ། བཀའ་རམས་པ་ཁྱུང་ལུང་དྲང་སྲོང་ཀུན་བཟང་ཁྲི་གཙུག་རྣམ་རྒྱལ། བཀའ་རམས་པ་ལྷོ་རོང་དྲང་སྲོང་མཚུངས་མེད་བློ་གྲོས་དབང་རྒྱལ། བཀའ་རམས་པ་ཛ་རོང་དྲང་སྲོང་ཤེས་རབ་སྐལ་བཟང་དར་རྒྱས་བཅས་འཆམ་རའི་ཤར་ལྷོ་གཉིས་ནས་དུས་གཅིག་ཏུ་ཕེབས་བསུ་དང་བཅས་ཚོགས་ཁང་དུ་ཕེབས་ནས་འཚོགས་གྲལ་དུ་འཁོད།
དེ་མཚམས་འདུས་མང་ཡོངས་ནས་ཀུན་གསལ་བྱམས་མའི་སྔགས་བསྟོད་གྲུབ་རྗེས་ཉིན་འདིའི་བཀའ་རམས་པ་རྣམས་ཀྱི་འབྲས་སིལ་དང་ཟབ་ཇ་འདེགས་འབུལ། དེ་བཞིན་གཏོང་སྒོ་ཆེན་མོའི་སྐུ་འགྱེད་ཀྱི་མཛད་རིམ་བསྐྱངས།
ཚོགས་ཆེན་ཞལ་ངོ་ནས་ཉིན་འདིའི་གཞུང་བཤད་གནང་མཁན་གྱི་བཀའ་རམས་པ་རྣམས་ལ་ཆབ་ཕུལ་མཚམས་སྔར་སྲོལ་ལྟར་༧སྐྱབས་རྗེ་མཁན་སློབ་རྣམས་ལ་མཇལ་ཁ་ཞུས་རྗེས་གྲལ་མཇུག་ནས་རྩེ་ཞྭ་ཕྱག་ཏུ་བསྣམས་ནས་ལུས་གུས་པ་དང་བཅས་བཞེངས་ཏེ། ༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་ནས་ཚིག་བཤད་ཉི་ཟེར་གཞའ་འོད་གུར་ཁྱིམ་དབྱངས་སུ་གྱེར་གནང་བ་དང་།
དེ་རྗེས་བཀའ་རམས་མདའ་ཀླུ་དྲང་སྲོང་ངག་དབང་ཤེས་རབ་དབང་ཕྱུག་ལགས་ནས་སྔོན་འགྲོའི་གཞུང་བཤད་གཤེན་རབ་སྤངས་རྟོགས་སོགས་གྱེར་ཡོད་པ་དང་། དེ་རྗེས་རིམ་བཞིན་བཀའ་རམས་པ་སྐྱིད་ཚང་དྲང་སྲོང་དགེ་ལེགས་རིག་པའི་ཉི་མ། བཀའ་རམས་པ་ཁྱུང་ལུང་དྲང་སྲོང་ཀུན་བཟང་ཁྲི་གཙུག་རྣམ་རྒྱལ། བཀའ་རམས་པ་ལྷོ་རོང་དྲང་སྲོང་མཚུངས་མེད་བློ་གྲོས་དབང་རྒྱལ། བཀའ་རམས་པ་ཛ་རོང་དྲང་སྲོང་ཤེས་རབ་སྐལ་བཟང་དར་རྒྱས་བཅས་ནས་སྔོན་འགྲོའི་ཚིག་བཤད་བཅས་དཀའ་ཆེན་དང་དཀའ་ཆུང་སོ་སོའི་གཞུང་བཤད་གྱེར་གྲུབ་མཚམས་འདུས་མང་ཡོངས་ནས་བར་ཆད་ལམ་སེལ་གསུངས་ནས་ཚོགས་ཐུན་དང་པོ་གྲོལ་བ་དང་། ཆུ་ཚོད་༡༢།༠༠སྟེང་ཚོགས་བརྡ་དང་བཅས་འདུས་མང་ཚོགས་བཞུགས་ཀྱིས་གཏོང་སྒོའི་དམ་ཐུག་ཆེན་མོ་གསོལ་ནས་སྔ་དྲོའི་མཛད་རིམ་མཇུག་གྲུབ་ཡོད་པ་རེད།
ཕྱི་དྲོའི་ཆུ་ཚོད་ ༢།༣༠ སྟེང་གོང་ལྟར་༧སྐྱབས་རྗེ་མཁན་སློབ་གདན་འདྲེན་དང་སྣུམ་འཁུར་བཀྲ་ཇ་མཆོད་གྲུབ་རྗེས། སྔར་ལྟར་ཚོགས་ཆེན་ཞལ་ངོ་མཆོག་ནས་ཆབ་ཕུལ་མཚམས། གྲལ་མཇུག་ཏུ་ཕེབས་ནས་མཆོད་ཚིག་དང་། བཀྲ་ཤིས་མངའ་དབུལ་གྱི་ཚིག་བཤད་སོགས་གྱེར་ཞོར་བཀྲ་ཤིས་མཆོད་འབྲུ་གཏོར་ནས་མཇུག་རྗེ་རྒྱལ་བ་སོགས་སྨོན་ལམ་གྲུབ་ནས་ཚོགས་ཐུན་གསུམ་པ་གྲོལ།
ཕྱི་དྲོའི་ཆུ་ཚོད་ ༤།༣༠ སྟེང་འདུས་མང་ཡོངས་ནས་སྨོན་ལམ་རྣམ་གསུམ་གསུང་ནས་བཞེས་ཐུག་མཆོད་རྗེས་སྐབས་ ༢༣ པའི་ཉིན་གསུམ་པའི་དགེ་བཤེས་མཛད་སྒོ་མཇུག་གྲུབ་ཡོད་པ་བཅས་ཀྱི་གནས་བསྡུས་སུ།
