གཤེན་གྱི་འབྱུང་ལྡན་ ༣༠༡ གི་ནང་ཚན་བོད་མེ་རྟ་ལོའི་བོད་ཟླ་ ༡ པོའི་ཚེས་ ༡༣ ཉིན་ཏེ། ཕྱི་ལོ་ ༢༠༢༦ ཟླ་ ༣ ཚེས་ ༡ རེས་གཟའ་ཉི་མའི་ཉིན་གྱི་ཞོགས་པའི་ཆུ་ཚོད་དགུ་པའི་ཐོག་ནས་

༧ཞྭ་དཀར་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་༧སྐྱབས་རྗེ་མཁན་སློབ་རྣམ་གཉིས་དབུ་བཞུགས་འོག་གཤེན་གྱི་གར་འཆམ་ཆེན་མོ་དབུ་འཛུགས་གནང་ཡོད་པ་རེད།

དེ་ཡང་ཉིན་འདིའི་མཛད་སྒོའི་སྐུ་མགྲོན་དུ་སྐུ་མགྲོན་གཙོ་བོ་རྒྱ་གར་གཞུང་གི་སྤྱི་ཁྱབ་རྩིས་ཞིབ་ལས་ཁུངས་ཀྱི་སྤྱི་ཁྱབ་རྩིས་དཔོན་ལས་རོགས་ཟུར་པ་སྐུ་ཞབས་རོ་ཡི་མཱ་ཐྲཱ་ནི་མཆོག་དང་(Hon’ble Chief Guest Shri Roy Mathrani Ex-Deputy Comptroller & Auditor General of India.)

གདན་ཞུས་སྐུ་མགྲོན་དུ་ཡོན་ཡོན་ཤེས་ཡོན་ཐེབས་རྩ་ཚོགས་པའི་ཚོགས་གཙོ་རྗེ་བཙུན་མ་དང་ (Jetsun Ma) (Guest of Honour Jetsun Dharma Ho Lynn Founder, Yuan Yuan Educational Foundation )

དམིགས་བསལ་སྐུ་མགྲོན་དུ་རྒྱ་གར་གཞུང་གི་སྤྱི་ཁྱབ་རྩིས་ཞིབ་ལས་ཁུངས་ཀྱི་མཐོ་རིམ་རྩིས་ཞིབ་ལས་བྱེད་ཧི་ཏེཤ་རོ་ཧི་ལ་ (Special Guest Shri Hitesh Rohilla SAO, DGA (Central Expenditure) མཆོག་དང་གཞན་ཡང་ས་གནས་སུ་ཕྱོགས་བཞུགས་གནང་བའི་བལ་གཞུང་ནང་ཆོས་དར་སྤེལ་དང་དགོན་པ་འཕེལ་རྒྱས་ལྷན་ཚོགས་ཀྱི་ཚོགས་གཙོ་དགེ་བཤེས་ཉི་མ་ཀུན་ཁྱབ་མཆོག་དང་། བོན་སྤྱི་དགེ་བཤེས་ཨ་ཀྲོང་རིན་ཆེན་རྒྱལ་མཚན་གཙོས་སྤྱི་འཐུས་དང་སྤྱི་ཟུར་རྣམ་པ། བོན་གཞིས་ཐོབ་རྒྱལ་གསར་པའི་ས་གནས་འགོ་འཛིན་དང་། ཚོགས་པ་ཁག་གི་འགན་འཛིན་དང་སྐུ་ཚབ་བཅས་གཤེན་གྱི་གར་འཆམ་ཆེན་མོར་ཕེབས་བཅར་ཞུས་ཡོད་པ་དང་།

དེ་ཡང་གོང་ཚེས་ཆུ་ཚོད་དགུ་པ་ནས་བོན་གཤེན་རྔ་ཐོགས་ཀྱིས་སྣེ་དྲངས་པའི་སྲིད་རྒྱལ་དུས་དྲུག་དང་། རྣམ་བརྒྱད། ཤ་འཆམ་གྲུབ་རྗེས་ཉུང་ཇ་མཆོད་ཡོད་ཅིང་། དེ་རྗེས་ཀེང་འཆམ། མ་རྒྱུད་ཀྱི་གར་འཆམ་གྲུབ་མཚམས་༸སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་ནས་སྐུ་མགྲོན་གཙོ་ཁག་རྣམས་ལ་ལེགས་གསོལ་ཕྱག་རྟགས་གནང་ཞིང་སྔ་དྲོའི་མཛད་རིམ་གྲུབ་ནས་སྐུ་མགྲོན་རྣམ་པ་དང་སེར་སྐྱ་མི་མང་ཡོངས་ལ་དགོན་པ་གཞུང་ནས་ཉིན་གུང་གསོལ་ཚིགས་གནང་སྲོལ་ཡོད་པ་ལྟར་གུང་ཚིགས་ལ་རོལ།

ཉིན་རྒྱབ་ཆུ་ཚོད་གཉིས་པ་ནས་གཤེན་རབ་དགུ་འཆམ་དང་། རྒྱལ་པོ་ཤེལ་ཁྲབ། རྒྱ་ནག་ཧ་ཤང་། ཨ་ཙ་ར། གཟེ་གྱད་སྤར་གསུམ་བཅས་འཆམ་གྲུབ་རྗེས་ཉིན་འདིའི་གལ་ཆེའི་མཛད་སྒོ་བདེ་ལེགས་དང་རྒྱལ་ཁའི་ངང་ནས་ཡོངས་སུ་མཇུག་གྲུབ་ཡོད་པ་བཅས་ཀྱི་གནས་བསྡུས་སུ།