སྟོན་པའི་རྒྱལ་པོ་འཁོར་བ་འདྲེན་པའི་དཔལ། །མུན་པའི་ཚོགས་རྣམས་འཇོམས་བྱེད་སྒྲོན་མེའི་འོད། །མ་རིག་ནད་གདུང་སེལ་བ་སྨན་པའི་གཙོ། །མི་ཡི་མཆོག་ཏུ་གྱུར་བ་དམུ་ཡི་རྒྱལ། །དུག་ལྔའི་འདམ་དང་མཚོ་སྐེམ་མེ་ཆེན་དཔུང་། །མཚན་དང་དཔེ་བྱད་ལྡན་པའི་གཟི་འཕགས་པོ། །དཀའ་བ་སྣ་ཚོགས་དང་དུ་བླངས་ནས་ནི། །མཛད་པ་སྣ་ཚོགས་མཐར་རུ་ཕྱིན་མཛད་ཅིང་། །གཟིགས་ཚད་བཞི་དང་དགོངས་ཚད་དྲུག་གཉིས་ཀྱིས། །བྱམས་པ་ཆེན་པོས་འཁོར་བ་སྒྲོལ་མཛད་པའི། །གཤེན་རབ་སྤྲུལ་བའི་སྐུ་ལ་ཕྱག་འཚལ་ལོ། །

སྨན་རིའི་གླིང་གི་སྐབས་བཅུ་བདུན་པའི་དགེ་བཤེས་དམ་བཅའ་ཆེན་མོའི་སྐབས་ཀྱི་ཉིན་གཉིས་པའི་དམ་བཅའ་བ་རྣམ་པ།

ཕྱི་ལོ་༢༠༡༤ཟླ་༣ཚེས་༡༣ཉིན་ནས་སྨན་རིའི་གླིང་གི་སྐབས་བཅུ་བདུན་པའི་དགེ་བཤེས་དམ་བཅའ་ཆེན་མོ་དབུ་འཛུགས་གནང་ཡོད་པ་རེད།

གཤེན་གྱི་འབྱུང་ལྡན་ ༣༠༡ གི་བོད་རྒྱལ་ལོ་༣༡༥༡བོད་ཤིང་རྟ་ལོའི་ཧོར་ཟླ་དང་པོའི་ཚེས་བརྒྱད་ཉིན་སྟེ། ཕྱི་ལོ་ ༢༠༡༤ ཟླ་ ༣ ཚེས་ ༩ རེས་གཟའ་ཉི་མའི་ཉིན་༧ཞྭ་དཀར་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་གཤེན་གྱི་གར་འཆམ་ཆེན་མོ་འཁྲབ་འབུལ་ཞུས་ཡོད་པ་རེད།  དེ་ཡང་གཡུང་དྲུང་བོན་ལུགས་ཀྱི་གསང་སྔགས་ཀྱི་གཞུང་བཤད་དང་མཐུན་པར་རྒྱལ་བ་གཤེན་གྱི་གར་འཆམ་གྱི་ངོ་བོ་ནི། དམིགས་པའི་གནད་ལ་བདག་ཉིད་ཡི་དམ་གྱི་ལྷ་དང་བོན་སྐྱོང་སོགས་ཀྱི་ང་རྒྱལ་དང་མ་བྲལ་ཞིང་གསལ་སྣང་གི་རེག་པའི་ཚད་དུ་སླེབས་པ་དག་པ་དྲན་པའི་སྟོབས་ཀྱིས་ཐ་མལ་གྱི་སྣང་བ་གཞིལ་བ། རྫོགས་རིམ་གྱི་དབང་དུ་བྱས་ན། རྩ་རླུང་ཐིག་གསུམ་ལ་རང་དབང་འབྱོར་ཞིང་ཟུང་འཇུག་གྱི་ཕྱག་རྒྱ་མངོན་དུ་བརྙེས་པ། རྣམ་པའི་གནད་ལ་གང་གི་ངོ་བོར་བཞེངས་པའི་ཡི་དམ་དང་བོན་སྐྱོང་གི་ཆ་ལུགས་དང་ཡ་མ་བྲལ་བ་སྟེ། ཕྱི་ནང་གསང་བའི་བདུད་ཚོགས་རྣམས་ཟིལ་གྱིས་གནོན་པ་དང༌། ཁྱད་པར་དུ་རྟོགས་པས་བདག་བསྒྲལ་བ་དང་གྲུབ་པས་གཞན་བསྒྲལ་བའི་ལས་ལ་ཞུགས་པའི་ཞི་དྲག་ཅི་རིགས་ཀྱི་བསྡུས་པའི་ལུས་ཀྱི་སྟངས་སྟབས་ཞིག་ལ་འདོད་ཀྱི་ཡོད་པ་སོགས་གཤམ་གསལ་རྒྱས་བཀོད་ཡོད་པ་ལྟར་རོ།

དེ་ཡང་གཤེན་གྱི་འབྱུང་ལྡན་ ༣༠༡ གི་བོད་རྒྱལ་ལོ་༣༡༥༡བོད་ཤིང་རྟ་ལོའི་ཧོར་ཟླ་དང་པོའི་ཚེས་ལྔ་ཉིན་སྟེ། ཕྱི་ལོ་ ༢༠༡༤ ཟླ་ ༣ ཚེས་༥ཉིན་༧ཞྭ་དཀར་གཡུང་དྲུང་བོན་གྱི་གདན་ས་ཆེན་མོ་སྙིགས་དུས་གཡུང་དྲུང་བསྟན་སྲོག་འཚོ་བའི་ཞིང་ས།  འཕགས་ཡུལ་བྱང་ཕྱོགས་ཧི་མ་ཅལ་གྱི་མངའ་སྡེ། བོན་གཞིས་ཐོབ་རྒྱལ་གསར་པ་རུ་གནས་ཆགས་པའི་གཡུང་དྲུང་བོན་གྱི་བསྟན་པའི་རྩ་ལག་ཆེན་མོ་

གཡུང་དྲུང་བོན་གྱི་གདན་ས་ཆེན་མོ་ཞེས་སྙན་པའི་གྲགས་པ་ས་གསུམ་ན་འབྲུག་བཞིན་ལྡིར་བའི་སྙིགས་དུས་གཡུང་དྲུང་བསྟན་སྲོག་འཚོ་བའི་ཞིང་ས།  འཕགས་ཡུལ་བྱང་ཕྱོགས་ཧི་མ་ཅལ་གྱི་མངའ་སྡེ། བོན་གཞིས་ཐོབ་རྒྱལ་གསར་པའི་ལ་མགོ་རུ་གནས་ཆགས་པའི་གཡུང་དྲུང་བོན་གྱི་བསྟན་པའི་རྩ་ལག་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་འབྱུང་ལྡན་ ༣༠༡ གི་བོད་རྒྱལ་ལོ་༣༡༥༡ཤིང་རྟ་ལོའི་ཧོར་ཟླ་དང་པོའི་ཚེས་གསུམ་དང་ལྔ། ཕྱི་ལོ་ ༢༠༡༤ ཟླ་ ༣ ཚེས་ ༤དང་༥ཉིན། གཡུང་དྲུང་བོན་གྱི་བསྟན་པའི་གསལ་བྱེད་ཆེན་མོ་༧རྣམ་འདྲེན་རྒྱལ་བ་གཉིས་པ་རྗེ་མཉམ་མེད་ཤེས་རབ་རྒྱལ་མཚན་མཆོག་སྐུ་བལྟམས་ནས་མི་ལོ་༦༥༨འཁོར་བའི་དུས་ཆེན་ཁྱད་པར་ཅན་དེ་འཆར་ཅན་ལྟར་ཚོགས་ཡོད་པ་རེད།

ཕྱི་ལོ་ ༢༠༡༤ ཟླ་ ༣ ཚེས་ ༥ ཉིན་ཏེ། བོད་རྒྱལ་ལོ་༣༡༥༡ཤིང་ཕོ་རྟ་ཡི་ལོར་ཧོར་ཟླ་ ༡ ཚེས་ ༥ ཉིན་༧རྗེ་རྒྱལ་བ་མཉམ་མེད་ཆེན་པོ་སྐུ་བལྟམས་ནས་མི་ལོ་ ༦༥༨ འཁོར་བའི་འཁྲུངས་མཆོད་དང་བསྟུན་བོན་གྱི་དྲིས་ལན་དྲ་མཛོད་ཅེས་པའི་བོན་གྱི་དྲ་རྒྱ་ཞིག་གསར་དུ་དབུ་འབྱེད་གནང་ཡོད་པ་རེད། དྲ་རྒྱའི་ཁ་བྱང་། www.askbon.net བོན་གྱི་དྲིས་ལན་དྲ་མཛོད་ཀྱི་དམིགས་ཡུལ། བོད་ཁ་བའི་ལྗོངས་འདིར་བོན་རྒྱལ་ཐོག་མ་གཉའ་ཁྲི་བཙན་པོས་དབང་བསྒྱུར་བ་ནས་བཟུང་བོད་མི་རྣམས་ཀྱི་ཤེས་རིག་གི་བློ་སྒོ་ཕྱེས་ཡོད་ཅེས་བཤད་ན་མི་འགྲིག་པ་གང་ཡང་མེད་སྙམ།

བགྲེས་པོའི་སྔོན་གླེང་མཐུན་འབྲེལ་དྲུང་མུའི་དགའ་འཁྱིལ། སྲིད་པ་ས་ཆགས་ཀྱི་དུས་ནས་བཟུང་འགྲོ་བ་མི་ཡི་ཁྱིམ་ཚང་ཆེན་པོ་འདིར་གྲགས་པའི་ཐ་ཚིག་གཅིག་ནི། སྤྱི་ཚོགས་ཕན་བདེའི་གཞི་རྩ་སྟེ། མཐུན་འབྲེལ་དང་ཞི་བདེ་ཞེས་སུ་སྨོས་པར་ཟློས་ཅི་དགོས། ཇི་ལྟར་འགྲོ་བ་མི་ཡི་འདུ་ཤེས་གྲུབ་པ་དང་ལྷན་དུ་བཟང་ངན་གྱི་ཚོར་འདུ་སྣ་ཚོགས་ཤིག་ཀྱང་ཆགས་ཡོད་སྟབས། དེས་ན་བྱམས་སྙིང་རྗེས་གཙོས་ཡ་རབས་ཀྱི་ཀུན་སྤྱོད་ཀྱང་རང་བཞིན་གྱིས་སྐྱེ་བོ་སོ་སོའི་རྒྱུད་ལ་ལྷན་སྐྱེས་སུ་ཡོད་པ་ནི་སུས་ཀྱང་འགོག་ཏུ་མེད་པ་ཞིག་རེད། གནམ་འོག་གི་ཆོས་ལུགས་དང་གྲུབ་མཐའ། ཆབ་སྲིད་ཀྱི་སྡེ་ཁག་དག་གིས་ཀྱང་འཇིག་རྟེན་འགྲོ་བའི་ཁམས་ཆེན་པོ་འདིའི་བདེ་སྐྱིད་ཀྱི་ཐབས་ལམ་ཉག་གཅིག་ནི་འགྲོ་བ་མི་ལ་ཡོད་པའི་བྱམས་སྙིང་རྗེ་དང་ཞི་བདེ་འཆམ་མཐུན་གྱིས་གཙོས་བཟང་ཕྱོགས་ལམ་བུ་དག་ཡིན་པར་གླེང་ལ། དེ་དག་ནི་རྒྱལ་ཁམས་དང་། འཚོ་བ་ཡུལ་སྡེ། ཁྱིམ་ཚང་གང་ཞིག་ཡིན་ཀྱང་ལྡན་དགོས་པར་སྨྲ། དེ་དག་རྣམས་ཆོས་ལུགས་པས་འགྲོ་བ་མི་ལ་བསྐྲུན་པའི་ལེགས་སྐྱེས་ཞིག་ཀྱང་ཡིན་པར་ཡང་བརྗོད། དེ་བས་ཉེར་གཅིག་དུས་རབས་འདིར་ཤེས་ཡོན་གྱི་དུས་རབས་དང་། ཞི་བདེ་དང་བག་ཡངས་ཀྱི་དུས་རབས་ཞེས་གནམ་འོག་གི་རྒྱལ་ཁམས་ཀུན་ཏུ་གླེང་།

དེ་ཡང་གངས་ཅན་ཁ་བའི་ལྗོངས་ཀྱི་ཡུལ་གྲུ། གཡུང་དྲུང་བསྟན་པ་རྒྱས་པའི་ས་གནས། མདོ་སྔགས་ཉི་ཟླ་ཤར་བའི་རི་རྩེ།  ལེགས་བཤད་ལུང་རིགས་སྒྲོག་པའི་སྐྱེད་ཚལ། མང་ཐོས་མཁས་མང་འདུས་པའི་ལྟེ་གནས། རྣམ་དག་འདུལ་བ་འཛིན་པའི་དགོན་སྡེ།  རྣམ་འདྲེན་རྒྱལ་བ་གཉིས་པའི་གདན་ས་ཏེ་གཙང་བཀྲ་ཤིས་སྨན་རིའི་གླིང་ནས་དཔག་ཚད་སྟོང་ཕྲག་དུ་མས་ཆོད་པ། སྙིགས་དུས་གཡུང་དྲུང་བོན་གྱི་བསྟན་སྲོག་འཚོ་བའི་ཞིང་ས། རྒྱ་གར་བྱང་ཕྱོགས་ཧི་མ་ཅལ་གྱི་མངལ་ཁུལ།