༄༅། །ཕྱི་ལོ་ ༢༠༢༥ ཕྱི་ཟླ་ ༩ ཚེས་ ༢༦ ཉིན་གྱི་ཞོགས་པའི་ཆུ་ཚོད་ ༩ དང་སྐར་མ་ ༥༥ ཙམ་ལ་༧འཇམ་དགོན་རྒྱལ་བའི་རྒྱལ་ཚབ་ཞྭ་སེར་བསྟན་པའི་མངའ་བདག ༧སྐྱབས་རྗེ་དགའ་ལྡན་ཁྲི་ཟུར་རྗེ་བཙུན་བློ་བཟང་བསྟན་འཛིན་རིན་པོ་ཆེ་མཆོག་དགུང་གྲངས་ ༩༠ ཐམ་པ་ལ་ཕེབས་པའི་ཐོག རྒྱ་གར་ལྷོ་ཕྱོགས་སེར་བྱེས་ཁྲི་ཟུར་རིན་པོ་ཆེའི་གཟིམ་ཆུང་དུ་དགོངས་པ་ཆོས་དབྱིངས་སུ་འཐིམ་ཚུལ་བསྟན་པའི་ཡིད་སྐྱོའི་གནས་ཚུལ་ཐོས་པས་ཧ་ཅང་གི་བློ་ཕམ་བྱུང་། ཡིན་ནའང་། མཛད་བསྟོད་ལས། རྒྱལ་བའི་མཆོག་ལ་སྐྱེ་འཆི་མི་མངའ་ཡང་། །རྟག་པ་འཛིན་རྣམས་སུན་ཕྱུང་དགེ་བསྐུལ་ཕྱིར། །མི་རྟག་ཚུལ་བསྟན་དགོངས་པ་མྱ་ངན་འདས། །བདེ་ཆེན་དབྱིངས་གཤེགས་མཛད་ལ་ཕྱག་འཚལ་ལོ། །ཞེས་གསུངས་པ་ལྟར། གདུལ་བྱ་རྣམས་ཀྱི་རྟག་འཛིན་ལྡོག་པའི་ཕྱིར། རེ་ཞིག་མྱ་ངན་འདས་ཚུལ་བསྟན་པས། དེ་ཕྱིར་རྗེས་འཇུག་བུ་སློབ་ལྟོས་བཅས་ཡོངས་ལ་ཐུགས་གསོའི་འཚམས་འདྲི་དང་གདུང་སེམས་མཉམ་སྐྱེད་ཞུ་བཞིན་ཡོད། ཞིང་གཤེགས་དམ་པ་གང་གི་ཐུགས་ཀྱི་དགོངས་པ་རྫོགས་པའི་ཕྱིར། ཁོང་གི་ལམ་སྟོན་གྱི་གདམ་ངག་རྣམས་ཡིད་ལ་དྲན་པའི་ཐོག་ནས་ཕྱག་ལེན་ལ་ཁེལ་ཐུབ་པ་བྱ་རྒྱུ་ནི་ཐུགས་དགོངས་རྫོགས་པའི་མཆོད་པ་ཡག་ཤོས་ཡིན་པ་ལ་ངོས་འཛིན་དང་བཅས།                ༧རྒྱལ་བ་སྨན་རིའི་ཁྲི་འཛིན་སོ་བཞི་པ་ལུང་རྟོགས་ཟླ་བ་དར་རྒྱས་ཀྱིས།                                      …

གཡུང་དྲུང་བོན་གྱི་༸གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དང་བཙུན་དགོན་རཏྣ་སྨན་གླིང་གཉིས་སུ་ལོ་རེའི་བོད་ཟླ་ ༠༨ པའི་ཚེས་ ༠༡ ནས་ ༠༧ བར་ཉིན་བདུན་གྱི་རིང་ལ་དྲི་མེད་གཤེན་གྱི་དཀའ་ཐུབ་ཆེན་མོ་འཚོགས་སྲོལ་ཡོད་པ་ལྟར། ད་ལན་ཡང་༸ཚེ་ལོ་བརྒྱ་པའི་མགོན་པོ་༸སྟོན་པ་རྣམ་འདྲེན་བརྒྱད་པ་རྒྱལ་བ་གཤེན་རབ་མོ་བོ་ཀུན་ལས་རྣམ་པ་རྒྱལ་བ་མཆོག་ཉིད་སྐུ་སྐྱེ་བ་མི་རུ་བཞེས་ནས། མི་ལོ་ ༡༨༠༤༢ འདས་པའི་བོད་ཤིང་སྦྲུལ་ལོའི་བོད་ཟླ་ ༨ པའི་ཚེས་པ་ ༡ ནས་ ༧ བར་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ རིན་པོ་ཆེ་མཆོག་དབུ་བཞུགས་ཐོག་ཁྱིམ་སྤང་རབ་བྱུང་སེམས་དཔའ་འདུལ་བ་འཛིན་པའི་འདུས་མང་ཡོངས་རྒྱལ་བ་གོང་མའི་ཕྱག་སྲོལ་ཇི་བཞིན་དྲི་མེད་གཤེན་གྱི་དཀའ་ཐུབ་ཆེན་མོ་འཚོགས་བཞིན་ཡོད་པ་རེད།        གོང་གསལ་ཞག་བདུན་གྱི་རིང་དུ་གཙང་མ་གཙུག་ཕུད་དང་དག་པ་དྲང་སྲོང་གི་ཁྲིམས་རྣམས་མིག་ལྟར་གཅེས་ཤིང་གཞུང་སྡེ་སྣོད་གསུམ་ལ་འཆད་ཉན་དང་ལམ་བསླབ་པ་རིན་པོ་ཆེ་རྣམ་པ་གསུམ་ལ་ཐོས་བསམ་སྒོམ་སྒྲུབ་སོགས་མདོར་ན་བོན་སྤྱོད་བཅུ་གསུམ་གྱི་སྒོ་ནས་ཉམས་ལེན་དང་མི་འབྲལ་བར་དུས་དེའི་རིང་དཀར་ཟས་ཁོ་ན་གསོལ་རྒྱུ་ལས་དམར་ཟས་ལ་སོགས་རྩ་སྤོང་དང་དེ་ཡང་གུང་ཚིགས་གསོལ་རྒྱུ་ཙམ་ལས་ཕྱི་དྲོའི་ཁ་ཟས་སྤོང་པ་དང་རྣམ་གཡེང་ལེ་ལོའི་དབང་དུ་མ་སོང་བར་དགོན་པའི་ཁོར་ཡུག་ལས་ཕྱི་ལོག་སོགས་གང་བྱུང་དུ་མི་ཕེབས་པར་བག་ཡོད་དང་སེམས་ལ་སྤྲོ་བ་དང་དད་པའི་སྒོ་ནས་ཞོགས་པའི་ཕྱག་ཚོད་ ༤།༤༥ཐོག་སྒྲུབ་ཁང་ལྷ་མཆོད་ཀྱིས་གྷན་དྷེ་བརྡུང་ཟིན་རྗེས་མཆོད་དཔོན་གྱིས་དུང་ཚིགས་བཅུ་གསུམ་གཏོང་མཐར། དགེ་འདུས་རྣམས་གདེང་བའི་གདན་ལ་བཞུགས་ཅིང་རྨད་དུ་བྱུང་བའི་སངས་རྒྱས་ཀྱི་ན་བཟའ་རྨད་གོས་ལ་སོགས་སྐུ་ལ་གསོལ་ནས་དབུ་མཛད་ཀྱིས་གཤེན་གྱི་དགེ་སྤྱོད་ཆོ་གའི་དབུ་འཛུགས་ནས་རིམ་བཞིན་ཁྲུས་ཀྱི་ཚིག་བཤད་གསུངས། དེ་རྗེས་༧སྐྱབས་རྗེ་དཔོན་གསས་བླ་མ་སྨན་རིའི་ཁྲི་འཛིན་རིན་པོ་ཆེ་མཆོག་གིས་དུས་གསུམ་སངས་རྒྱས་ཀྱི་མཚན་ཕྱག་རེ་གསུང་པ་དང་འདུས་མང་རྣམས་ཀྱིས་མཚན་ཕྱག་རེ་བརྗོད་ནས་ཕྱག་རེ་འཚལ་བ་སོགས་རྗེས་ཟློས་གནང་ནས་འདུལ་ཆོག་གི་ལྟུང་བཤགས་སོགས་གསུང་གནང་། ཚོགས་གྲལ་དུ་འཁོད་ནས་རྣམ་རྒྱལ་ཕྱག་བཤགས་གཤེན་རབ་སྤང་རྟོགས་སོགས་གསུངས་ནས་དགེ་སྤྱོད་ཀྱི་མདོ་ཆོག་ལས་ས་ཆོག་ནས་བཤགས་པ་ཡན་གསུངས་གྲུབ་རྗེས།  དེ་ནས་ཉི་མ་དྲོས་ལ་སླེབས་དུས་ཞོགས་ཟས་ལ་རོལ་བ་དང་བཤད་སྒྲུབ་མཁན་པོ་མཆོག་ནས་ལམ་སྲོལ་ལྟར། འདུལ་འགྲེལ་འཕྲུལ་གྱི་སྒྲོན་མེའི་བཀའ་ཁྲིད་དང་། ཁྱད་པར་རྗེས་སྲུང་ལྔ་ཡི་སྒོ་ནས་འདུལ་བའི་སྤྱོད་ལམ་དང་ཉམས་སུ་ལེན་ཚུལ་སོགས་ཀྱི་བཀའ་སློབ་བཀའ་དྲིན་བསྩལ། དེ་ནས་<<གཤེན་གྱི་དཀའ་ཐུབ་ཀྱི་མདོ་ལས་>>ཉི་མ་ཤར་ནས་དྲོས་ཆེན་དུ་མ་ཕྱིན་བར་དུ་བདེ་བར་གཤེགས་པ་རྣམས་དབྱིངས་ནས་སྤྱན་དྲངས་ཤིང་། མར་མེ་དང་མེ་ཏོག་དང་ཞལ་ཟས་དང་བདུག་སྤོས་དང་ལྷ་རྫས་ཀྱི་དྲི་ཆབ་དང་རོལ་མོ་དང་སྒྲ་སྙན་དང་མཆོད་བརྗོད་དང་བསྟོད་ཚིག་གིས་མཆོད་པ་འབུལ་ལོ་གསུངས་པ་ལྟར། དགེ་སྤྱོད་ཀྱི་མདོ་ཆོག་དང་པང་ཀོང་སོགས་ནས་མཆོད་པ་དང་སྐུ་བསྟོད་སོགས་ཀྱི་ཚིག་བཤད་བརྗོད་ནས་རང་གཞན་སྒྲིབ་གཉིས་སྦྱང་ཞིང་ཚོགས་གཉིས་བསགས་ཕྱིར་དུས་གསུམ་བདེ་གཤེགས་རྣམས་ལ་རྣམ་ལྔ་སོགས་ཇི་སྙེད་མཆོད་པའི་ཡོ་བྱད་མ་ཚང་བ་མེད་པར་བཤམས་ནས་དངོས་འབྱོར་ཡིད་སྤྲུལ་གྱིས་མཆོད་པ་རྒྱ་ཆེར་ཕུལ།  <<གཤེན་གྱི་དཀའ་ཐུབ་ཀྱི་མདོ་ལས་>>དེ་ནས་ཁ་ཟས་མཛད་དེ་ཉིན་ཕྱེད་དུ་མ་ཕྱིན་བར་དུ་བདེ་བར་གཤེགས་པ་སྐུ་གདུང་དང་སཱཙྪ་དང་མཆོད་གཏོར་གྱི་ཆོ་ག་མཛད་དོ། ཅེས་གསུངས་པས།  མཆོད་གཏོར་གྱི་སྔོན་འགྲོ་བོན་སྤྱོད་རྣམས་གྲུབ་རྗེས་རང་གཞན་གྱི་རྒྱུད་ཀྱི་སྒྲིབ་གཉིས་སྦྱང་ཞིང་བུ་ལོན་ལན་ཆགས་སོགས་གསོབ་ཕྱིར་གསེར་དངུལ་ཟངས་ལྕགས་སོགས་གང་རིགས་ཀྱི་གཏོར་གཞོང་ནང་དུ་བདུད་རྩིའི་ཁྲུས་ཆབ་རྣམས་ལེགས་པར་བཤམས་ཤིང་མཆོད་གཏོར་རྩིས་མགོ་བདུན་པ་དང་བདུད་རྩི་ཆུ་རྒྱུན་ལན་ཆགས་གཏོར་མ་སོགས་ཀྱི་ཚིག་བཤད་གསུངས་ནས་སྲིད་ཞི་དང་ཡོན་ཏན་ལན་ཆགས་སྙིང་རྗེའི་མགྲོན་རྣམས་ལ་འཁོར་གསུམ་དམིགས་མེད་ཀྱི་སྦྱིན་པ་རྒྱ་ཆེར་འབུལ་ཞིང་བསྔོ་བ་སྨོན་ལམ་སོགས་གནང་། དེ་ནས་ཉིན་གུང་གསོལ་ཚིགས་ཀྱི་དུས་སུ་འདུལ་བའི་གཞུང་བཞིན་གཙང་གཙུག་པ་རྣམས་ཀྱིས་དྲང་སྲོང་པ་རྣམས་ལ་གསོལ་ཟས་འདྲེན་ནས་སངས་རྒྱས་རྗེས་སུ་དྲན་པའི་མདོ་དང་ཟས་མཆོད་གཤེན་ལྷ་འོད་དཀར་སོགས་བརྗོད་ནས་དཀོན་མཆོག་སོགས་ལ་ཡར་མཆོད་ཀྱི་ཟས་ཕུད་འབུལ་བ་དང་། དཀར་གསུམ་གྱི་ཟས་སྣ་ཕུན་སུམ་ཚོགས་པའི་ཞལ་ལག་མཆོད་གྲུབ་རྗེས། མར་སྦྱིན་ཟས་ལྷག་གི་ལན་ཆགས་བཅའ་ནས་ལྷག་བསྔོ་སོགས་བརྗོད་ལ་རིགས་དྲུག་རྣམས་ལ་སྦྱིན་པ་བཏང་། དེ་ནས་འདུལ་ཁང་སྒོ་འབྱོར་དུ་ཞལ་ཡར་གྱུ་ནས་དགེ་སྤྱོད་ཀྱི་མདོ་ཆོག་ལྟར་བསྐོར་བའི་ཡན་ལག་གསུང་རྗེས་ངན་སོང་དོང་སྤྲུག་གི་སྙིང་པོ་བྱངས་རྟ་ལ་བསྐྱོན་ནས་འདུལ་ཁང་དང་སྐུ་གདུང་སོགས་ལ་ཞབས་རྗེན་གྱིས་བསྐོར་བ་ལན་གསུམ་ཕེབས་ནས་ཨ་དཀར་གྱི་འཛབ་བསྟོད་སོགས་གསུང་། དེ་ནས་<<གཤེན་གྱི་དཀའ་ཐུབ་ཀྱི་མདོ་ལས།>>ཉི་མ་ཕྱེད་ནས་དགོང་མོ་རུ་མ་ཕྱིན་གྱི་བར་དུ་གདན་གཅིག་ཏུ་བཞུགས་ཏེ་བདེ་བར་གཤེགས་པའི་ཐུགས་འཛབ་སྙིང་པོ་རྣམ་གསུམ་རིམ་པར་བཟླའོ།  ཞེས་གསུངས་པ་བཞིན། ཕྱི་དྲོའི་དུས་མ་ཟིན་གྱི་བར་དུ་སྙིང་པོ་རྣམ་གསུམ་བཟླ་བ་དང་ཁ་འདོན་དགེ་སྦྱོར་སོགས་གནང་།  ཕྱི་དྲོའི་ཕྱག་ཚོད་༥།༣༠ནས་ཕྱག་ཚོད་གཅིག་གི་རིང་ལ་མདོ་སྔགས་སེམས་གསུམ་གྱི་ཚིག་དོན་རྣམས་འཆད་ར་ཐོས་བསམ་དགའ་ཚལ་གླིང་དུ་རྩོད་སྦྱང་གནང་ནས་གཡུང་དྲུང་བསྟན་པ་རྒྱས་པའི་སྨོན་ལམ་གསུང་། དགོང་དྲོར་བཤད་སྒྲུབ་སློབ་གཉེར་བ་རྣམ་འཆད་རར་རྩོད་སྦྱོང་དང་བསྟན་རྒྱས་སྨོན་ལམ་གསུང་རྗེས། <<གཤེན་གྱི་དཀའ་ཐུབ་ཀྱི་མདོ་ལས།>>དགོང་མོ་ནས་སྲོད་དུ་མ་ཕྱིན་གྱི་བར་དུ་འབྱུང་པོ་དང་ལན་ཆགས་གླུད་ཀྱི་གཏོར་མ་གཏོང་ཞིང་བསྔོ་བ་སྨོན་ལམ་གྱི་རྒྱས་གདབ་བོ།  ཅེས་གསུངས་པ་ལྟར། འདུས་མང་རྣམས་འདུལ་ཁང་ཆེན་མོའི་སྒོ་འབྱོར་ནས་ཞལ་མར་འཁོར་ནས་གཤེན་གྱི་དགེ་སྤྱོད་མདོ་ཆོག་ལྟར་ལན་ཆགས་གླུད་ཀྱི་ཚིག་བཤད་དང་མདོ་ཟློག་གསུང་ནས་གླུད་དང་ཉུ་ལེ་བཀར་བ་དང་ཞལ་ཡར་འཁོར་ནས་ཞི་གྱུར་དང་སྨོན་ལམ་སོགས་གདབ།  ཚོགས་གྲལ་དུ་འཁོད་ནས་རྣམ་རྒྱལ་ནོར་བུའི་སྨོན་ལམ་དང་གཏོར་མའི་སྨོན་ལམ་ས་བཅུ་སྨོན་ལམ་སོགས་རྣམ་པ་གསུམ་གསུང་གྲུབ་རྗེས། དཔོན་གསས་བླ་མ་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་གིས་བསྔོ་བ་བདེ་ལེགས་ཀུན་འབྱུང་མ་གསུང་ཞིང་(ཉིན་ཡ་)མཆོད་འབྲེལ་བྱུང་བའི་རྒྱུ་སྦྱོར་ཡོན་གྱི་བདག་པོ་བདག་མོ་དང་ཚེ་འདས་རྣམས་ཀྱི་མིང་བྱང་རེ་རེ་བཞིན་ཀློག་ནས་འདུལ་མང་དང་བཅས་པས་བསྔོ་བ་སྨོན་ལམ་གནང་ནས་འོ་མ་གསོལ། དེ་ནས་མཚན་མོའི་ཕྱག་ཚོད་ ༡༠ པ་མ་ཟིན་གྱི་བར་དུ་གྲྭ་ཤག་སོགས་སུ་ཕེབས་མི་ཆོག་པར། གནས་ལུགས་ཀྱི་དོན་སྒོམ་པ་དང་། ཁ་འདོན་དགེ་སྦྱོར་བྱེད་པ་དང་། གཞུང་དོན་དཔེ་ཆ་བློ་འཛིན་བྱེད་པ་དང་། དཔེ་གཟིགས་གནང་བ་ལ་སོགས་དང་། …

༸གསང་གསུམ་བོན་གྱི་མཛོད་འཛིན་༧སྐྱབས་རྗེ་རྒྱལ་བ་སྨན་རིའི་དཔོན་སློབ་རིན་པོ་ཆེ་མཆོག་ནས་ཡུང་དྲུང་བོན་གྱི་བཤད་སྒྲུབ་འདུས་སྡེའ་ཚོགས་ཁང་དུ། སྨན་རིའི་དགེ་བཤེས་རྣམ་དང་། གཡུང་དྲུང་བོན་གྱི་བཤད་སྒྲུབ་འདུས་སྡེའི་སློབ་གཉེར་བ། གཞི་རིམ་སློབ་མ་བཅས་ཡོངས་ལ། གསང་སྔགས་མ་རྒྱུད་དང་རྫོགས་ཆེན་ཡང་རྩེ་ཀློང་ཆེན་སོགས་ཀྱི་ལྗགས་ལུང་བསྩལ་གནང་བ།

དེ་རིང་བོད་ཤིང་སྦྲུལ་ལོའི་བོད་ཟླ་བདུན་པའི་ཚེས་པ་ ༢༩ དང་སྤྱི་ལོ་ ༢༠༢༥ ཟླ་བ་ ༩ པའི་ཚེས་པ་ ༢༠ ཉིན་གྱི་ཕྱི་དྲོར། གཡུང་དྲུང་བོན་གྱི་བཤད་སྒྲུབ་འདུས་སྡེའི་ཚོགས་ཁང་དུ་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིན་པོ་ཆེ་དབུ་བཞུགས་ཐོག བཤད་སྒྲུབ་འདུས་སྡེའི་ཚོགས་འདུ་ཆེན་མོ་བསྐང་འཚོགས་གནང་སྟེ། སྐབས་ ༤༥ པའི་གཡུང་དྲུང་བོན་གྱ་བཤད་སྒྲུབ་འདུས་སྡེའི་རྒྱུན་ལས་ཀྱི་ལས་ཡུན་གཙང་རྗེས་སྐབས་ ༤༦པའི་རྒྱུན་ལས་ཀྱིས་རྩིས་ལེན་དང་། ལས་ཁུར་དབུ་འཛུགས་གནང་ཡོད་པ་རེད།

སྤྱི་ལོ་ ༢༠༢༥ ཟླ་ ༩ ཚེས་ ༡༤ དང ༡༥ བོད་ཤིང་སྦྲུལ་ལོའི་བོད་ཟླ་ ༧ པའི་ཚེས་པ་ ༢༢ དང་ ༢༤ ཉིན་གཉིས་ཀྱི་རིང་༸གདན་ས་སྨན་རིའི་གླིང་དང་བཙུན་དགོན་རདྣ་སྨན་གླིང་བོན་གཞིས་ཉིན་སློབ་སོགས་སུ་༸ཞིང་བཤེགས་དམ་པ་༸སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༣ པ་རིན་པོ་ཆེ་མཆོག་གི་འདས་མཆོད་ཆེན་མོ་འཚོགས་གནང་ཡོད་པ་དང་་

དེ་རིང་སྤྱི་ལོ་ ༢༠༢༥ ཟླ་ ༩ པའི་ཚེས་ ༡༥ བོད་ཤིང་སྦྲུལ་ལོའི་བོད་ཟླ་ ༧ པའི་ཚེས ༢༤ ཞིང་གཤེགས་དམ་པ་༸སྐྱབས་རྗེ་རྒྱལ་བ་སྨ་རིའི་ཁྲི་འཛིན་ ༣༣ པ་རིན་པོ་མཆོག་དགོངས་པ་བོན་དབྱིངས་སུ་གཤེགས་ནས་མི་ལོ་ ༨ འཁོར་བའི་འདས་མཆོད་ཉིན། གཡུང་དྲུང་བོན་གྱི་དཔེ་མཛོད་ཁང་དུ་སྐབས་བཞི་པ་དང་ལྔ་པའི་སྨན་པ་དཀའ་བཅུ་པའི་བསླབ་པ་མཐར་སོན་གྱི་རྟེན་འབྲེལ་དགའ་སྟོན་མཛད་སྒོ་འཚོགས་གནང་སོང་། 

བྱང་ཨ་རིའི་ནེའུ་ཡོག་དང་ནེའུ་འཇར་སིའི་གཡུང་དྲུང་བོན་སྲི་ཞུ་ལྷན་ཚོགས་ཀྱི་རྒྱུན་ལས་དང་ས་གནས་དེའི་དད་ལྡན་བོན་འབངས་ཐུན་མོང་ནས་༧རྒྱལ་བ་སྨན་རིའི་བླ་བྲང་དུ་རེ་བསྐུལ་ཞུས་དོན་བཞིན། རྩ་བའི་བླ་མ་༸སྐྱབས་རྗེ་རྒྱལ་བ་སྨན་རིའི་ཁྲི་ ༣༣ པ་རིན་པོ་ཆེ་མཆོག་དགོངས་པ་བོན་དབྱིངས་སུ་གཤེགས་ནས་ལོ་བརྒྱད་འཁོར་བའི་འདས་མཆོད་ཉིན་སྨན་རིའི་དགེ་བཤེས་རྔ་ཟ་ཚང་ཁྱུང་གསས་འཕྲིན་ལས་མཆོག་་བླ་མར་ཁྲི་བཞེངས་མངའ་གསོལ་གནང་སོང་།

དེ་རིང་ཕྱི་ལོ་ ༢༠༢༥ ལོའི་ཟླ་ ༩ ཚེས་ ༨ ཉིན་གཡུང་དྲུང་བོན་གྱི་བཤད་སྒྲུབ་འདུས་སྡེའི་ཟླ་རེའི་བགྲོ་གླེང་སྐབས་ ༡༩ འཚོགས་གནང་ཡོད་ཅིང་། དེ་ཡང་༧སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་གཉིས་དབུས་བཤད་སྡེའི་མཚན་ཉིད་དགེ་རྒན་རྣམ་པ་དང་ དགེ་བཤེས སློབ་གཉེར་བ་ཚང་འཛོམས་ཐོག

རྗེ་རྒྱལ་བ་སྨན་རིའི་ཡོངས་འཛིན་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག་དགུངས་གྲངས་བརྒྱ་ཧྲིལ་བོར་བཞེས་ནས་རེ་ཞིག་སྤྱི་ལོ་ ༢༠༢༥  ཟླ་ ༦ པའི་ཚེས་པ་ ༡༢ ཞོགས་པར་གནས་མཆོག་བྱ་མ་རི་ཁྲིད་དུ་གདུལ་བྱའི་སྣང་ངོར་སྐུ་མི་རྟག་མྱ་ངན་ལས་འདས་པའི་ཚུལ་བསྟན་ཏེ་དགུང་ཞག་ཞེ་དགུ་ཡོངས་སུ་མཇུག་གྲུབ་པའི་རྗེས་༸དཔལ་ལྡན་ཁྲི་བརྟན་ནོར་རྩེར་གདུང་ཀློང་གཉིས་ཀྱི་ཀུན་རིག་ལས་བཞི་རྒྱུན་ལྔའི་མཆོད་པ་ལྔ་སྐོར་གཉིས་ཀྱི་སྒོ་ནས་སྐུ་གདུང་ཞུགས་འབུལ་གྱི་མཛད་རིམ་