ཞང་ཞུང་གི་གྲགས་ཆེ་བའི་རྒྱལ་རབས་བཅོ་བརྒྱད་ཀྱི་ཐོག་མ་ཁྲི་ཝེར་གསེར་གྱི་བྱ་རུ་ཅན་དུ་གྲགས་པ་དེའི་རྒྱལ་ས་ནི། གངས་ཆེན་པོ་ཏི་སེའི་མདུན། རི་སྤོས་ངད་ལྡན་གྱི་རྩ་བ། མཚོ་མུ་ལེ་ཁྱུད་ཀྱི་ཉེ་འགྲམ། ག་ལྗང་གཡུ་ལོ་རྫོང་མཁར་ཞེས་བྱ་བ་དེ་ཡིན་ཞིང་རྒྱལ་པོ་འདི་ནི་གཤེན་རབ་མི་བོ་ཆེའི་དངོས་སློབ་དང་བོན་གྱི་བསྟན་པའི་སྦྱིན་བདག་ཁྱད་པར་ཅན་ཞིག་ཡིན་ལ། ཁོང་གིས་གངས་ཏི་སེའི་མདུན་ཞོལ་དུ་གསས་ཁང་ནོར་བུ་སྤུངས་རྩེགས་ཞེས་བྱ་བ་ཞིག་བཞེངས།

རྟག་གཟིགས་ཞང་ཞུང་བོད་བཅས་ཀྱི། །མི་རིགས་ས་ཡུལ་ལས་སོགས་ཞིབ་བཤད་ན། །རྟག་གཟིགས་ཕུགས་པ་དག་ཞིང་འོལ་མོ་གླིང༌། །མུ་ཁྱུད་བདལ་མཚོ་དབལ་སོ་གངས་རིས་བསྐོར། །གཡུང་དྲུང་དགུ་བརྩེགས་ཕོ་བྲང་གླིང་བརྒྱད་དང༌། །ཕྱི་ནང་བར་གྱི་གླིང་དང་མཐའ་གླིང་ལ། །ནང་བཅུད་དམུ་གཤེན་ཧོས་ཤག་དཔོ་རྒྱ་གཏོ་དཔྱད་གཉན། །རྒྱལ་རིགས་རྗེ་རིགས་དམངས་རིགས་བྲམ་ཟེ་བཅས། །རྒྱལ་བློན་འབངས་བཅས་བསམ་མཐའ་ཡས་པས་ཁེངས། །སྐད་ནི་ནང་གླིང་གཡུང་དྲུང་ལྷ་ཡི་སྐད། །བར་གླིང་བཅུ་གཉིས་དེ་ལས་བསྒྱུར་བའི་སྐད། །འབབ་ཆུ་བརྒྱད་བརྒྱུད་བསྒྱུར་བའི་སྐད་བརྒྱད་ནི། །གཙང་མ་ལྷ་སྐད་ན་ར་ཛ་རའི་རྒྱུད། །དག་པ་ལྷ་སྐད་པཀྵུ་བྱང་གི་རྒྱུད། །སཾསྐྲྀཏ་ལྷ་སྐད་གྱིམ་ཤང་ནུབ་ཀྱི་རྒྱུད། ཁྲི་ཝེར་ལྷ་སྐད་སིན་དྷུ་ལྷོ་རྒྱུད་བསྒྱུར། །ཧོ་ཅི་འཕྲུལ་སྐད་ལྷོ་ཤར་གངྒཱའི་རྒྱུད། །སྤོས་ཅི་འཕྲུལ་སྐད་ལྷོ་ནུབ་སི་ཏའི་རྒྱུད། །