༄༅། །ཀུན་བཟང་ཐུགས་སྤྲུལ་ལྷ་ཆེན་སྦོམ་ར་ལ།། སྒོ་གསུམ་གུས་པ་ཆེན་པོས་ཕྱག་འཚལ་ལོ།། བེེ་རོའི་ལུང་བསྟན་གསལ་བྱེད་ཉི་མའི་དཀྱིལ་འཁོར་ལས། ། གནས་མཆོག་ཁྱད་པར་སྦོམ་རའི་མཚན་ཅན་ལ།། ཞལ་མཐོང་ཙམ་གྱིས་ངན་སོང་སྒོ་མོ་ཁེགས།། ཀུན་བཟང་གཤེན་ལྷས་བྱིན་གྱིས་བརླབས་པའི་གནས།། གྲུབ་ཆེན་བརྒྱད་ཅུས་འགོག་པའི་དོན་དགོངས་པས།། སྔར་འདས་སངས་རྒྱས་ས་སྟེང་གཤེགས་པའི་ཤུལ།། ད་ལྟའི་སངས་རྒྱས་གཤེན་རབ་བགྲོད་པའི་གནས།། མ་འོངས་སངས་རྒྱས་མེ་སྒྲོན་འབྱོན་པའི་ལམ།། རྩེ་མོ་ནམ་མཁའི་ལྕགས་ཀྱི་གུར་ཁང་ན།། ཞི་བའི་ལྷ་ཚོགས་ནམ་མཁའི་སྐར་ལྟར་བཀྲ།། སྐེད་པ་འཇའ་འོད་འཁྱིལ་བའི་གུར་ཁང་ན།། དབང་དྲག་ཁྲོ་ཚོགས་བར་སྣང་སྤྲིན་ལྟར་གཏིབས།། རྩ་བ་རྩི་ཤིང་ནགས་ཚལ་འཛིང་བ་ལ།། དམ་ཅན་བོན་སྐྱོང་སྲུང་མ་མཚོ་ལྟར་འཁྱིལ།།