༣༽ བོད་གཞིས་བྱེས་གཉིས་སུ་རྒྱལ་བ་སྨན་རི་བའི་ཞབས་རིམ་སྒྲུབ་བཞིན་པ། མུ་འགོད།

(གནས་ཚུལ་སྔ་མའི་འཕྲོ།) ༧ཤར་རྫ་རི་ཁྲོད་ནས་ཀུན་མཁྱེན་ཤར་རྫའི་རྒྱལ་ཚབ་རིན་པོ་ཆེ་དབུས་པའི་དགེ་འདུན་འདུས་པ་རྒྱ་མཚོ་ནས་༧རྒྱལ་བ་སྨན་རི་བ་མཆོག་ལ་ཞབས་བརྟན་དང་ཞབས་རིམ་རྒྱས་འབུལ་ཞུ་བཞིན་པ།

ཝཱཎཱ་བོད་ཀྱི་ཆེས་མཐོའི་གཙུག་ལག་སློབ་ཁང་གི་༧གཡུང་དྲུང་བོན་གྱི་དགེ་སློབ་ཁང་གི་དགེ་སློབ་རྣམས་ཀྱིས་ཞབས་རིམ་ཀུན་གསལ་བྱམས་མ་དང་ཚེ་སྒྲུབ་ཚེ་བསྙེན་དང་། སྐུའི་ཞབས་བརྟན་གསོལ་འདེབས་དང་ནོར་བུའི་སྨོན་ལམ་སོགས་སྒྲུབ་བཞིན་པ།

༧ལྷ་ལྡན་ཉི་མའི་གྲོང་ཁྱེར་ན་བཞུགས་པའི་ཨ་མདོ་ཤར་ཁོག་གི་ཚོང་དཔོན་གཙོ་བོ་ཨ་མདོ་རྩེ་རྒྱལ་སོགས་དང་། རྫ་པ་དར་ལོ། སྡེ་དགེ་ཨོ་རྒྱན་དང་། སྡེ་དགེ་བསོད་དབྱང་། སྐྱིད་འཛོམས། གཡུ་མཚོ། བདེ་མཚོ། དབང་ཆེན། དབུ་རྒྱན་མགོན། བསོད་ནམས་རིག་འཛིན། ཆོས་སྒྲོན། རིག་འཛིན་དབང་མོ། རིག་འཛིན་ཚེ་མཚོ། ཤེས་རབ་མཚོ་མོ། སོགས་ནས་རྣམས་ཀྱིས་༧སྐྱབས་རྗེ་ཁྲི་འཛིན་རིན་པོ་ཆེའི་བླ་གཟའི་ཉིན་དང་བསྟུན་ཏེ་སྐུ་ཕྱྭའི་ཞབས་བརྟན་དུ་བོན་གྱི་གདན་ས་གོང་མ་༧གཙང་བཀྲ་ཤིས་སྨན་རི་དགོན་དང་། དཔལ་ལྡན་མཁར་སྣ་དགོན། རུ་ལག་གཡུང་དྲུང་གླིང་བཅས་རྩ་བའི་གྲྭ་ས་རྣམ་གསུམ་དུ་བསྟན་སྲུང་ཡོངས་ཀྱི་གཙོ་མོ་མ་མཆོག་སྲིད་པ་རྒྱལ་མོའི་ཚོགས་མཆོད་རྒྱས་འབུལ་དང་སྲོག་བླུ་ཉེའུ་འདོན་པ་འབྲི་གཡག་མང་པོ་ཚེ་ཐར་བཏང་གནང་བ་སོགས་དད་དམ་ལྷག་བསམ་གཙང་མའི་ངང་རྣམ་དཀར་བསོད་ནམས་དགེ་སྒྲུབ་གང་ཐུབ་བགྱིས་དང་བགྱིད་བཞིན་པ།

༧གཡུང་དྲུང་བོན་གྱི་གདན་ས་གོང་མ་གཙང་བཀྲ་ཤིས་སྨན་རི་དགོན་དུ་༧རྒྱལ་བ་སྨན་རིའི་ཁྲི་འཛིན་༣༣པ་རིན་པོ་ཆེ་མཆོག་ལ་ཞབས་བརྟན་དུ་མ་མཆོག་སྲིད་པ་རྒྱལ་མོའི་ཚོགས་འཁོར་འབུལ་བཞིན་པ། ལྷ་སར་གནས་བཞུགས་ཤར་ཁོག་ཚོང་དཔོན་རྣམས་ཀྱིས་སྦྱིན་བདག་དང་སྐུ་འགྱེད་ཕུལ་ཡོད་པ་བཅས།

༧གཡུང་དྲུང་བོན་གྱི་གདན་ས་འོག་རབ་ལེགས་གཡུང་དྲུང་གླིང་དགོན་དུ་༧རྒྱལ་བ་སྨན་རིའི་ཁྲི་འཛིན་༣༣པ་རིན་པོ་ཆེ་མཆོག་ལ་ཞབས་བརྟན་དུ་མ་མཆོག་སྲིད་པ་རྒྱལ་མོའི་ཚོགས་འཁོར་འབུལ་བཞིན་པ། ལྷ་སར་གནས་བཞུགས་ཤར་ཁོག་ཚོང་དཔོན་རྣམས་ཀྱིས་སྦྱིན་བདག་དང་སྐུ་འགྱེད་ཕུལ་ཡོད་པ་བཅས།

༧ཁྱུང་པོ་སྟེང་ཆེན་དགོན་གྱིས་འདུས་མང་ཡོངས་ནས་༧རྒྱལ་བ་སྨན་རིའི་ཞབས་བརྟན་དུ་སྲིད་པ་རྒྱལ་མོ་དང་ཡི་དམ་སྟག་ལ་མེ་འབར་གྱི་ཚོགས་འཁོར་རྒྱས་འབུལ་བསྒྲུབ་བཞིན་པ།

༧རྒྱལ་རོང་གཡུང་དྲུང་ལྷ་སྟེང་དགོན་ནས་༧རྒྱལ་བ་སྨན་རིའི་ཁྲི་འཛིན་རིན་པོ་ཆེའི་ཞབས་བརྟན་དུ་ཚེ་ཐར་དང་སྲིད་རྒྱལ་འཕྲིན་བཅོལ། སྟག་ལའི་བཅུད་དྲིལ། གདུགས་དཀར་དང་ཚེ་སྒྲབ་ཚེ་བསྙེན་གསང་དྲག་དང་ཕུར་པ་སོགས་བསྒྲུབ་བཞིན་པ།

ཁ་ཎ་ཊ་༧ཤེས་རབ་བྱམས་མ་གླིང་གི་དབུ་འཛིན་དགེ་བཤེས་གཡུང་དྲུང་བློ་གསལ་དང་ཁོང་གི་སློབ་མ་ཐུན་མོང་ནས་ཡི་དམ་སྟག་ལའི་གཞུང་གྲངས་དང་ཡེ་ཤེས་དབལ་མོའི་བསྐང་གསོལ། ཀུན་གསལ་བྱམས་མ། བར་ཆོད་ལམ་སེལ། སྐུའི་ཞབས་བརྟན་གསོལ་འདེབས་སོགས་བསྒྲུབ་བཞིན་པ།

༧བྲག་འགོ་རྒྱལ་རོང་དགོན་བཙུན་མའི་ལྔ་རིག་ནང་བསྟན་སློབ་གླིང་དུ་སྐུ་ཕྱྭའི་ཞབས་རིམ་དྲན་པའི་ཚོགས་འཁོར་དང་། ཚེ་སྒྲུབ། བར་ཆོད་ལམ་སེལ། བྱམས་མའི་སྔགས་བསྟོད་སོགས་བསགས་བཞིན་པ།

༧བླ་ཁྲིའི་གཡུ་རིའི་བཤད་སྒྲུབ་འདུས་སྡེ་ནས་༧རྒྱལ་བ་སྨན་རིའི་ཁྲི་འཛིན་རིན་པོ་ཆེ་ལ་སྐུ་ཕྱྭའི་ཞབས་རིམ་དུ་བོན་སྐྱོང་སྟོང་ཚོགས་དང་། བྱམས་མ། བར་ཆད་ལམ་སེལ། ཚེ་སྒྲུབ་སོགས་བསྒྲུབ་བཞིན་ཡོད་པ།

༧ཐེ་བོ་གཙོ་ཚང་གསང་སྔགས་སྨིན་གྲོལ་དར་རྒྱས་གླིང་གི་མཁན་ཚེ་དབང་རིག་འཛིན་དབུ་བཞུགས་འོག་གྲྭ་ཚང་དང་ཕྱོགས་དང་རིས་སུ་མ་ཆད་པའི་དད་ལྡན་འདུས་མང་ནས་སྐུ་ཕྱྭ་ཞབས་རིམ་དུ་བརྟན་བཞུགས་གསོལ་འདེབས། བསྟན་སྲུང་བོན་སྐྱོང་རྣམས་ཀྱི་གསོལ་མཆོད། གསེར་སྐྱེམས། སྲུང་བཟློག ཚེ་ཐར་སྲོག་བླུ། སྨྱུང་གནས། ཕྱག་སྐོར་བཟླས་བརྗོད། གློག་སྒྲོན་ཁྲི་མཆོད་ཀྱི་མཆོད་སྤྲིན་སོགས་འབུལ་བཞིན་པ།

༧རབ་ལེགས་གཡུང་དྲུང་གླིང་གི་མཁན་རིན་པོ་ཆེ་ནས་བཀའ་དགོངས་ལྟར་དགོན་པའི་འདུས་མང་ནས་༧རྒྱལ་བ་སྨན་རིའི་ཁྲི་འཛིན་༣༣པ་རིན་པོ་ཆེ་མཆོག་ལ་ཞབས་བརྟན་དུ་བྱམས་མ་ཡར་མཆོད་མར་སྦྱིན་དང་། ཁྲོ་བོ་གཞུང་གྲངས་གསོག་བཞིན་པ།