བཤད་སྒྲུབ་མཁན་པོ་དགེ་བཤེས་གཤེན་བསྟན་རབ་གསལ།
སྙིང་པོ་རྣམ་གསུམ་དེ་ཡང་བོན་ལུགས་འཛིན་པའི་སྐྱ་སེར་ཕལ་ཆེ་བས་རྒྱུན་ལྡན་ཏུ་བསགས་སྦྱང་གནང་པའི་སྲོལ་བཟང་སྔར་གནས་རྒྱུན་འཇགས་སུ་གྱུར་ནའང་། དེ་དག་སྐུ་གསུམ་གྱི་སྙིང་པོར་འབྲེལ་ཚུལ་དང༌། སྙིང་པོ་སོ་སོའི་འབྲུ་དོན་དང་བཟླས་བརྗོད་ཀྱི་སྐབས་སུའང་སྔོན་འགྲོ་དངོས་གཞི་རྗེས་བྱ་གསུམ་ཚང་དགོས་པའི་གལ་ཆེའི་དོན་གནད་ཁག་གཅིག་དགོས་མེད་ལྟ་བུའི། ལྟ་སྟངས་ཀྱི་དབང་གིས་སྐྱ་སེར་མང་དག་ཤིག་དེ་དག་ལ་གོ་རྟོགས་ཀྱི་ཆུ་ཚད་ཧ་ཅང་དམན་སྟབས། དེ་རྣམས་ལ་ངོ་སྤྲོད་ཀྱི་ཚུལ་དུ་བོན་སྐུའི་སྙིང་པོ་ནི། ཨ་ཨྰོྃ་ཧྰུྃ། ཨྰ་ཨ་དཀར་སལེ་འོད་ཨ་ཡང་ཨྰོྃ་འདུ་དང་། རྫོགས་སྐུའི་སྙིང་པོ་ནི། ཨྰོྃ་མ་ཏྲི་མུ་ཡེ་ས་ལེ་འདུ་དང་། སྤྲུལ་སྐུའི་སྙིང་པོ་ནི། ཨ་དཀར་ཨ་རྨད་དུ་ཏྲི་སུ་ནག་པོ་ཞི་ཞི་མལ་མལ་སྭཧྰ་ཞེས་པ་འདི་གསུམ་ནི་སྙིང་པོ་རྣམ་གསུམ་མོ།།
དང་པོ་བོན་སྐུའི་སྙིང་པོ་ནི།
དང་པོ་བོན་སྐུའི་སྙིང་པོའི་ཐོག་མ་‘‘ཨ་ཨྰོྃ་ཧྰུྃ་’’གསུམ་ནི། སྐུ་གསུམ་མམ་སྐུ་གསུང་ཐུགས་ཀྱི་སྙིང་པོ་དང་། ‘‘ཨྰ་ཨ་དཀར་’’གསུམ་ནི། གནས་ལུགས་སྟོང་པ་དང་། གསལ་བ། གསལ་སྟོང་དབྱེར་མེད་དང་གསུམ་གྱི་སྙིང་པོའོ། ‘‘ སལེ་’’ནི་མཚན་མ་དང་བྲལ་བའི་ཡེ་ཤེས་ཀྱི་སྙིང་པོའོ། ‘‘འོད’’་ནི་འགྲོ་འདུལ་འདོ་ཟེར་སྤྲོ་བའི་སྙིང་པོའོ། ‘‘ཨྰོྃ་’’ནི་སྐུ་ལྔ་ཡེ་ཤེས་ལྔ་ཡི་སྙིང་པོ་བཅས་བོན་སྐུའི་སྙིང་པོའི་འབྲུ་ འགྲེལ་ལོ༎
གཉིས་པ་རྫོགས་སྐུའི་སྙིང་པོ།
ཨྰོྃ་མ་ཏྲི་མུ་ཡེ་ས་ལེ་འདུ་བཅས་ཡིག་འབྲུ་བརྒྱད་པོ་འདི་རྣམས་རིམ་བཞིན་ དུ། སྐུ་ལྔ་ཡེ་ཤེས་ལྔ་ཡི་བདག་ཉིད་སྟོན་པ་དང༌། ཐུགས་རྗེ་བྱམས་མ། མུ་ཆོ་ལྡེམ་དྲུག གསང་བ་ངང་རིང་ ཏི་སངས་རང་ཞི་ གྲ་བྱིན་དོན་སྤུངས། ལྕེ་རྒྱལ་པར་ཏི། ཡེ་གཤེན་གཙུག་ཕུད་བཅས་ཀྱི་སྙིང་པོའོ།།
གསུམ་པ་ སྤྲུལ་སྐུའི་སྙིང་པོ་ནི།
‘‘ཨ་དཀར་ཨ་རྨད’’་བཞི་ནི་བདེར་གཤེགས་གཙོ་བཞིའི་སྙིང་པོ་དང་། ‘‘དུ་ཏྲི་སུ་ནག་པོ་’’བཅས་ཡིག་འབྲུ་དྲུག་པོ་ནི། སྦྱང་བྱ་དམྱལ་བ་སོགས་འགྲོ་དྲུག་གི་སྙིང་པོའོ། ‘‘ཞི་ཞི་’’ནི་མཐོ་རིས་དང་ངན་སོང་གཉིས་ཀྱི་སྦྱོང་བྱེད་འདུལ་གཤེན་དྲུག་གི་ སྙིང་པོ་དང་། ‘‘མལ་མལ་’’གཉིས་ནི་འགྲོ་དྲུག་གི་སྡུག་བསྔལ་སྦྱོང་བའི་ཡོན་ཏན་ཡེ་ཤེས་བཅུ་ གསུམ་གྱི་ས་བོན་ནོ། ‘‘སྭཧྰ’’གཉིས་ནི་ནད་གདོན་བར་ཆད་རྐྱེན་ངན་བཟློག་པའི་སྙིང་པོ་བཅས་སྙིང་པོ་སོ་ སོའི་འབྲུ་དོན་ནོ། སྦྱོར་དངོས་རྗེས་གསུམ་ནི། སྔོན་འགྲོ་བསྒོམ་རིམ་ཏིང་འཛིན་གྱི་རིམ་པ་དང༌། དངོས་གཞི་སྙིང་པོ་བཟླས་བརྗོད་ཀྱི་རིམ་པ། རྗེས་བྱ་སྔོ་སྨོན་གྱི་རིམ་པ་དང་གསུམ་མོ།།
བཞི་པ་སྙིང་པོ་དེ་དག་ཕན་ཡོན་གྱི་ཆ་ནས་རིམ་བཞིན།
སལེ་འོད་ལ་གསལ་བ་དགུ་འཛབ་ཏེ། བླ་ཆེན་དྲན་པའི་ཞལ་ནས། བཟླས་ཆོག་མ་རིག་མུན་སེལ་ཨ་དཀར་འོད། མ་རིག་མུན་པ་སེལ་བའི་ཉི་མ་ཡིན། ཉོན་མོངས་བརྒྱད་ཁྲིའི་མཚོ་སྐེམ་མེ་དཔུང་ཡིན། འདི་བཟླས་ཙམ་གྱིས་སྣང་སྲིད་ལྷ་སྐུར་ཤར། ཞེས་དང༌།
མ་ཏྲི་ལ་བཟླས་ཆོག་རིན་ཆེན་སྒྲོན་མ་སྟེ། ལྷ་གཤེན་ཡོངས་སུ་དག་པའི་ཞལ་ནས། ངག་གིས་བཟླས་པར་ཆོག་པའི་འབྲུ་བརྒྱད་འདིས། འོད་གསལ་དངོས་ཤར་བར་དོའི་འཁྲུལ་སྣང་ཞི། བུ་འདོད་རིགས་སྤེལ་སྣང་སྲིད་དབང་བསྡུས་རྩལ། ཉེས་ལྟུང་གནོང་འགྱོད་ཐམས་ཅད་བཤགས་པའི་མཆོག ཅེས་དང༌།
དུ་ཏྲི་སུ་ལ་ངན་སོང་དོང་སྤྲུག་གི་སྙིང་པོ་ཏེ། མཁའ་འགྲོ་བཅོ་བཟའ་བོན་མོའི་ཞལ་ནས། བཟླས་ཆོག་ངན་སོང་དོན་སྤྲུག་རིན་ཆེན་འོད། མཆོག་ཐུན་དངོས་གྲུབ་འབྱུང་བའི་ནོར་བུ་ཡིན། ལན་ཆགས་ཤ་འཁོན་བྱང་བའི་བཤགས་སྦྱོང་ཡིན། བག་ཆགས་སྡིག་སྒྲིབ་དག་པའི་ཆུ་བོ་ཡིན། ཞེས་གསུང་པ་ལྟར་འདི་ཕྱི་གཉིས་ཀའི་དོན་ཐམས་ཅད་བསམ་པ་ཡིད་བཞིན་དུ་འབྱུང་བས་ན་ སྙིང་པོ་རྣམས་གསུམ་གྱི་བཟླས་བརྗོད་ལ་རིམ་ཤིག་ཅེས་ནན་གྱིས་ཞུ་བ་དང་བཅས་དགེ་ བཤེས་གཤེན་བསྟན་རབ་གསལ་གྱིས་བྲིས་སོ༎
