༄༅།། །།རྒྱལ་ཀུན་མཁྱེན་བརྩེའི་ཡེ་ཤེས་ཟག་མེད་བདེ་ཆེན་ལྷ་ལམ་ནས། །གང་འདུལ་དེར་སྟོན་སྣ་ཚོགས་སྤྲུལ་པའི་འོད་སྟོང་འཕྲོ་བ་ཡིས། །སྒྲིབ་གཉིས་མུན་སྟུག་རབ་གསལ་ཡང་དག་སྣང་བ་རྒྱས་མཛད་པ། །འཇིག་རྟེན་མིག་གྱུར་མཉམ་མེད་བླ་མས་དུས་ཀུན་བདེ་ལེགས་སྩོལ། །རྣམ་དག་ཞི་བའི་ངང་ཚུལ་ཀཻེ་ལ་ཤ་རིའི་སྤོར། །སྣ་ཚོགས་ཁྲོས་པའི་རོལ་གར་གདོང་ལྔའི་ངར་དབྱངས་ཀྱིས། །ལོག་བྱེད་བདུད་རིགས་གཉིས་འཐུང་ཚོགས་ཀྱིས་ཀླད་འགེམས་པ། །ཡི་དམ་རྒྱལ་བ་རྒྱ་མཚོའི་ཚོགས་དེར་ཕྱག་བགྱིའོ། །ཚད་མེད་སྙིང་རྗེའི་ཆུ་གཏེར་ལས་ཐོན་པའི། །འདོད་དགུ་དངོས་གྲུབ་སྤྲིན་གྱི་གཟེགས་མ་ཡིས། །དམ་ལྡན་གཤེན་གྱི་པད་ཚལ་སྐྱོང་མཛད་པ། །གནས་གསུམ་མཁའ་འགྲོའི་རྒྱ་མཚོས་འདིར་གཟིགས་ཤིག །

གཤེན་རྒྱལ་སྐུ་ལ་ཕྱག་འཚལ་ལོ། །བསྟན་དང་འགྲོ་ལ་ཕན་གདག་ཕྱིར། །སྐུ་གདུང་བཀོད་ལེགས་ཆགས་ཚད་བྲིས། །གཤེན་རབ་སྐུ་ཡི་ཚད་བཞེངས་པ། །བོན་ཉིད་ནམ་མཁའ་དབྱིངས་སུ་ཟླུམ་ཅེས་པས། །རྨེང་ནི་ནམ་མཁའི་དཀྱིལ་འཁོར་ཏེ། །ཟླུམ་པོ་ཡིན་པར་གསུངས་པའོ། །ཁྲུ་གང་ཞབས་སུ་རྨེང་གཞི་བཞག་ཅེས་པ་ནི། །ས་འོག་ཏུ་ཁྲུ་གང་སོགས་རྐོ་བའོ། །ཡར་ཀྱང་ཁྲུ་ཕྱེད་འཕགས་ཅེས་པ་ནི། །ཁྲུ་ཕྱེད་ལོག་ཆེ་ཆུང་གང་བཞེངས་དང་བསྟུན་པའོ། །དེའི་མཐར་ནས་ཀྱང་ཁྲུ་ཕྱེད་མཐོ་ཕྱེད་ལོག་ཆེ་ཆུང་གང་བཞེངས་དང་བསྟུན་པར་ནང་དུ་བསྐོར་ཏེ། །དེ་ནི་ད་ལྟ་བོད་ན་མ་དར་བའོ། །