༧གཡུང་དྲུང་བོན་གྱི་མ་དགོན་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་སྲིད་རྒྱལ་འབུམ་ཚོགས་གསུངས་བཞིན་ཡོད་པ་རེད། དེ་ཡང་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རི་བའི་བཀའ་དགོངས་གཞིར་བཟུང་འོག་ཏུ། ལོ་རེའི་ཆ་རྐྱེན་ལྟར་འདི་གར་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་གྲྭ་ཚང་འདུས་མང་ནས། སྤྱིར་ཕན་བདེའི་འབྱུང་གནས་སངས་རྒྱས་གཡུང་དྲུང་བོན་གྱི་བསྟན་པ་རིན་པོ་ཆེ་འདི་ཉིད་དར་ཞིང་རྒྱས་ལ་ཡུན་རིང་དུ་གནས་པ་དང་། དགོས་སུ་འཛམ་གླིང་རྒྱལ་ཕྱི་ནང་ཡོངས་ཀྱི་མི་མཐུན་པའི་འཁྲུགས་རྩོད་ཞི་ཞིང་བདེ་བའི་འཆམ་མཐུན་ཡོང་ཆེད་སོགས་དང་། ཁྱད་པར་དུ་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་པ་གཙོས། རིས་མེད་སྐྱེས་ཆེན་དམ་པ་གང་ན་སུ་བཞུགས་རྣམས་ཀྱི་སྐུ་ཚེ་བསྐལ་བརྒྱར་བརྟན་ཞིང་ཐུགས་ཀྱི་བཞེད་དོན་ཐམས་ཅད་ལྷུན་གྱིས་འགྲུབ་ཅིང་། འགྲོ་བ་སེམས་ཅན་ཐམས་ཅད་ཀྱི་རྐྱེན་ངན་པའི་བར་ཆད་ཞི་བ་དང་ལས་ངན་པའི་སྡིག་སྒྲིབ་བྱང་བ་སོགས་མདོར་ན་མི་མཐུན་པའི་འགལ་རྐྱེན་མ་ལུས་པ་ཐམས་ཅད་ཞི་ཞིང་འཚེ་མེད་ཞི་བདེའི་དཔལ་ལ་རོལ་བའི་ཆེད་དུ།
ཕྱི་ལོ་༢༠༡༤ཟླ་༥་ཚེས་༡༣ཉིན་ནས་ཚེས་༡༩བར་ཉིན་གྲངས་བདུན་གྱི་རིང་ལ་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་ནས་བཀའ་སྐྱོང་ཡེ་ཤེས་དབལ་མོ། བསྟན་སྲུང་ཡོངས་ཀྱི་གཙོ་མོ། བདེ་འགྲོ་གསང་བའི་ཡུམ་ཆེན་མ་མཆོག་སྲིད་པའི་རྒྱལ་མོ་གཙོས་བསྟན་སྲུང་དམ་ཅན་རྒྱ་མཚོའི་ཚོགས་ལ་འབུམ་ཚོགས་ཀྱི་ མཆོད་སྤྲིན་རྒྱས་འབུལ་ཞུ་བཞིན་ལགས་ན་བོད་ཕྱི་ནང་གང་ས་ན་བཞུགས་པའི་སངས་རྒྱས་ཀྱི་བསྟན་པ་སྤྱི་དང་ཁྱད་པར་དུ་གཡུང་དྲུང་བོན་ལ་ཐུགས་སེམས་དཀར་བའི་བླ་སྤྲུལ་དགེ་བའི་བཤེས་གཉེན་ཡོངས་ཀྱིས་འབུམ་ཚོགས་འདི་དང་འབྲེལ་༧སྐྱབས་རྗེ་རྒྱལ་བ་སྨན་རི་བའི་མཁན་སློབ་རྣམ་གཉིས་གཙོས་སངས་རྒྱས་གཡུང་དྲུང་བོན་གྱི་བསྟན་པ་འཛིན་པའི་སྐྱེས་བུ་གང་ན་སུ་བཞུགས་པ་ཡོངས་ཀྱི་སྐུ་ཚེ་ཡུན་དུ་བརྟན་ཞིང་དགོངས་བཞེད་ལྷུན་གྱིས་འགྲུབ་པ་དང་། སྙིགས་མའི་རང་རྟགས་ས་འགུལ་དང་ཆུ་ལོག་སོགས་རང་བྱུང་ཁམས་ཀྱི་གོད་ཆག་རྣམས་མིང་མེད་དུ་ཞི་ནས་སྐྱེ་འགྲོ་རྣམས་བདེ་སྐྱིད་རྫོགས་ལྡན་གསར་པའི་དཔལ་ལ་ལོངས་སྤྱོད་པའི་ཐུགས་བསྐྱེད་སྐྱབས་འཇུག་མི་ཆུང་བར་ཡོང་བའི་གནས་བསྡུས་ཙམ་མོ།
ཞེས་འབུམ་ཚོགས་གོ་སྒྲིག་པ་སྨན་རིའི་གྲྭ་ཚང་གཉེར་པའི་ཡིག་ཚང་ནས།
༢༠༡༤།༥།༡༣
