གནའ་བོའི་འདས་མཆོད་བང་སོའི་དུར་རྒྱགས་སྐོར་ལ་དཔྱད་པ།
ཆེས་གནའ་བོའི་སྐབས་སུ་འཛམ་བུ་གླིང་དུ་ཡུལ་ཁམས་མང་དག་ཅིག་ལ་མི་ཤི་བའི་རྗེས་སུ་ཕུང་པོ་ས་ལ་སྦས་སྲོལ་བྱུང་མྱོང་ཡོད་ཅིང་བང་སོའི་བཟོ་བསྐྲུན་དང། དུར་རྒྱགས་སམ་དུར་མཆོད་བྱེད་སྟངས་སྐོར་སོགས་འཕེལ་རིམ་མི་འདྲ་བ་བྱུང་མྱོང་ཡོད་པ་ལྟར། ཞང་བོད་ཀྱི་ལྗོངས་སུའང་གནའ་བོའི་དུས་སུའང་མཐའ་བཞི་རྒྱལ་ཁམས་གཞན་དག་དང་འདྲ་བར་ཕུང་པོ་ས་ལ་སྦས་སྲོལ་བྱུང་མྱོང་ཡོད། དེ་སྔོན་དུ་དབྱིན་ཇི་དང་། ཧྥ་རན་སེ། ཨུ་རུ་སུ། དབྱི་ཏྲ་ལི། འཇར་པན། ཀྲུང་གོ་སོགས་ཀྱི་མཁས་པ་མང་པོས་བོད་རིག་པ་དང་འབྲེལ་བའི་གནའ་རྫས་དཔྱད་གཞིའི་ཞིབ་འཇུག་བྱེད་པར་བརྩམས་ཤིང་། བོད་ཀྱི་བང་སོ་ནི་གནའ་སྔ་མོའི་རྡོ་ཆས་གསར་མའི་སྐབས་སུ་ཕུང་པོ་ས་ལ་སྦས་སྲོལ་ཡོད་པའི་དཔྱད་གཞི་བཙལ་རྙེད་ཐུབ་པའི་བདེན་དཔང་བྱས་པ་མ་ཟད།