མཁས་དབང་དཔལ་ལྡན་ཚུལ་ཁྲིམས་ཀྱི་གསུང་རྩོམ་ཐོར་བུ།
བསྟན་བཅོས་ཡིད་བཞིན་གཏེར་གྱི་མཛོད་ལས་རྩོམ་པའི་རྒྱན་གྱུར་སྙན་ངག་རྒྱན་གསུམ་གྱི་རྣམ་བཤད་ནོར་བུའི་མེ་ལོང་དབྱངས་ཅན་སྙིང་གི་ཐིག་ལེ་སོགས་བཞུགས་སོ། དུས་རབས་ཉི་ཤུའི་ནང་གཞན་དྲིང་འཇོག་མི་དགོས་པའི་མཁས་པའི་དབང་པོ་དཔལ་ལྡན་ཚུལ་ཁྲིམས་མཆོག་གིས་བརྩམས་གནང་བའི་སྙན་ངག་རྒྱན་གསུམ་གྱི་རྣམ་བཤད་དང། ཕྱི་ནང་གསང་གསུམ་གྱི་བརྒྱུད་པའི་བླ་མའི་གསོལ་འདེབས། ལྷག་པའི་ལྷ་ཚོགས་ལ་མཆོད་བསྟོད། གངས་རི་མཚོ་གསུམ་གྱི་གནས་བསྟོད། ༧ སྐྱབས་རྗེ་རྒྱལ་བ་སྨན་རིའི་ཁྲི་འཛིན་སོ་གཉིས་པ་ཤེས་རབ་བློ་གྲོས་དཔལ་བཟང་པོ་མཆོག་གི་སྐུ་གདུང་དཀར་ཆག་བཅས་དཔར་བསྐྲུན་བྱེད་དགོས་པའི་རྒྱུ་མཚན་ནི། མཁས་དབང་དམ་པ་གང་ཉིད་དང་ཁྱིམ་ཚང་གཅིག་གི་ཁྱིམ་མི་བྱས་ནས་ཡུན་རིང་འགྲོགས་མྱོང་བའི་བདག་གི་ཕ་དམ་པའི་དགོངས་ཚུལ་དུ་དཔལ་ཚུལ་གྱི་བརྩམས་གཞུང་ཐོར་བུ་ཁག་རྣམས་ཕྱོགས་སྒྲིག་གནང་ནས་དེབ་གཅིག་དཔར་བསྐྲུན་བྱ་ཐུབ་ན་བསམ་པའི་རེ་འདུན་ཡིད་ལ་མཆིས་ཀྱང་། དུས་ཕྱིས་ན་ཚོད་རྒས་པ་དང་ལུས་ལ་ན་རྐྱེན་མང་བ་སོགས་ལ་བརྟེན་ནས་བསམ་པ་བཞིན་གྲུབ་ཐུབ་མེད།