༄༅། །རྒྱ་ཆེའི་དད་ལྡན་རྣམས་ཀྱི་སྙན་ལམ་དུ་ཞུ་རྒྱུར། མཁྱེན་ཆུབ་བཞིན་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་༣༣པ་ལུང་རྟོགས་བསྟན་པའི་ཉི་མ་དཔལ་བཟང་པོ་མཆོག་དགོངས་པ་གཞན་དོན་དུ་གཤེགས་ཏེ་ད་ལྟ་ཐུགས་དམ་གཡོ་མེད་བོན་གྱི་སྐུ་རུ་བཞུགས་པའི་སྐུ་གདུང་མཐོང་གྲོལ་རིན་པོ་ཆེ་ལ་མཇལ་བར་མོས་པའི་གང་གི་འཁོར་འབངས་རྣམས་ལ་ཕྱི་ལོ་ ༢༠༡༧ ཟླ་ ༩ ཚེས་༡༦ ཉིན་ནས་ཕྱི་ཟླ་ ༡༠ ཚེས་ ༢ ཉིན་སྐུ་གདུང་ཞུགས་འབུལ་ཞུ་བའི་བར་མཇལ་ཁའི་དུས་ཚོད་ཞུས་པ་ལགས་ན་དེ་ལུགས་དགོངས་འཇགས་འཚལ།

༧འཛམ་གླིང་བོན་གྱི་གཙུག་རྒྱན་ཞྭ་དཀར་བསྟན་པའི་དབུ་འཁྲིད་༧སྐྱབས་རྗེ་༧རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཚན་བརྗོད་པར་དཀའ་བ་དོན་གྱི་སླད་དུ་ཞུས་ན་༧ལུང་རྟོགས་བསྟན་པའི་ཉི་མ་དཔལ་བཟང་པོ་རིན་པོ་ཆེ་མཆོག་ནི། རྒྱལ་བ་གཤེན་གྱི་འབྱུང་ལྡན་ ༣༠༡ བོད་ས་མོ་སྦྲུལ་གྱི་ལོ་སྟེ། ཕྱི་ལོ་ ༡༩༢༩ ཧོར་ཟླ་ལྔ་པའི་ཚེས་བཅོ་ལྔ་ཉིན་མདོ་སྨད་ཤར་ཁོག་ཏུ་ལྗོངས་ལྡོང་ཚང་ཞེས་པའི་དུད་ཁྱིམ་ཆེན་པོ་དེར་ཡབ་ལྗོངས་ལྡོང་རྒྱལ་ལོ་དང་ཡུམ་བར་རོང་བཟའ་མཚོ་མོ་གཉིས་ཀྱི་སྲས་སུ་འཁྲུངས་ཤིང་མཚན་ལ་བླ་མ་ཐར་ཞེས་གསོལ།