༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤པ་མཆོག་ལ་༧སྨན་རིའི་བཤད་སྒྲུབ་མཁན་པོ་ཉི་མ་དོན་གྲུབ་མཆོག་གིས་ཞབས་བརྟན་གསོལ་འདེབས་ཞིག་ཕུལ་བ།
བསྟན་པའི་ཟླ་བར་ཕུལ་བའི་ཤིས་བརྗོད་སྨྲ་སེང་དགྱེས་པའི་མཆོད་སྤྲིན། ཤེས་རབ་ལྷ་མཆོག་སེང་ཆེན་རིགས་ལྔ་དང་།། ཤེས་བྱའི་འབྱུང་གནས་ཕྱྭ་རྗེ་ཀེང་ཙེ་ཡི།། ཐུགས་གསང་དྷི་དང་ཧྲི་ཡིག་ལས་བཞེངས་པའི།། སངས་རྒྱས་མི་ཡི་རྣམ་རོལ་གང་དེར་འདུད།། ངོ་བོ་སྟོང་པ་གསུམ་ལས་བོན་སྐུར་བཞེངས།། རང་བཞིན་གསལ་བ་གསུམ་ལས་རྫོགས་སྐུར་བཞེངས།། ཐུགས་རྗེ་རིག་པ་གསུམ་ལས་སྤྲུལ་སྐུར་བཞེངས།། གྲོལ་ལམ་བོན་གྱི་སྐུ་གསུམ་ཁྱེད་ལ་འདུད།། དེ་བཞིན་ཉིད་ལས་གསང་བ་བོན་སྐུར་གྲོལ།། ཀུན་ཏུ་སྣང་ལས་གསང་ཆེན་རྫོགས་སྐུར་གྲོལ།། སྤྲུལ་པ་རྒྱུ་ལས་གསང་མཆོག་སྤྲུལ་སྐུར་གྲོལ།། བསྒྱུར་ལམ་སྔགས་ཀྱི་སྐུ་གསུམ་ཁྱེད་ལ་འདུད།