ཞང་བོད་མཐོ་སྒང་གི་ཐུན་མོང་མ་ཡིན་པའི་ཤེས་རབ་ཀྱི་འབྱུང་ཁུངས་གཡུང་དྲུང་གི་བོན་རིན་པོ་ཆེ་ནི་ལྷོ་ཕྱོགས་འཛམ་བུའི་གླིང་འདིར་ཆེས་དར་སྔ་བའི་རིག་གནས་ཤིག་ཡིན་པ་དང་། དེ་ལ་བགྲང་བྱ་སྟོང་ཕྲག་མང་པོའི་ལོ་རྒྱུས་ལྡན་པར་མ་ཟད། འཛམ་གླིང་ཤར་ནུབ་གཉིས་ཀའི་སྤྱི་ཚོགས་ཁྲོད་དུ་བོད་ཀྱི་ཆོས་དང་རིག་གནས་ཐད་ཞིབ་འཇུག་པ་གཟུར་གནས་མཁས་པའི་དབང་པོ་ཚད་ལྡན་དག་གིས་ཆེས་གལ་འགང་ཆེ་བའི་རིག་གནས་ཀྱི་གཏེར་མཛོད་ཆེན་པོ་ཞིག་ཏུ་ངོས་འཛིན་གནང་དང་གནང་མུས་སུ་མཆིས། དེ་བཞིན་བོན་གྱི་ཤེས་རིག་ནི་རྒྱ་མཚོ་ཆེན་པོ་ཞིག་གི་ཁ་གཏིང་དང་འདྲ་བས་རྒྱ་ཁྱོན་གཞལ་དཀའ་བ་སྟེ། དེ་ལ་ཐུན་མོང་མ་ཡིན་པའི་མདོ་སྔགས་རྫོགས་གསུམ་དང་ཐུན་མོང་བོད་ཀྱི་རིག་གནས་ཆེ་ཆུང་དང་བཅས་ཤེས་རིག་ཕུན་སུམ་ཚོགས་པའི་ངོ་བོ་ཞིག་ཏུ་གྲུབ།