སྟོན་པའི་བཀའ་རིན་པོ་ཆེ་<<མདོ་འདུས་>>ལས། “འཛམ་བུ་གླིང་དུ་མཛད་པ་རྫོགས། རྟག་འཛིན་ཅན་གྱི་རིགས་རྣམས་ལ། འཁོར་བ་མི་རྟག་ཚུལ་བསྟན་ཕྱིར། བདག་ནི་ཡོངས་སུ་མྱ་ངན་འདའ།”ཞེས་གསུང་པ་ལྟར་གཤེན་གྱི་འབྱུང་ལྡན་སུམ་བརྒྱ་དང་གཅིག་བོད་ཆུ་ཡོས་ལོའི་བོད་ཟླ་ ༡༠ པའི་ཚེས་ ༣༠ ཉིན་ཏེ་སྤྱི་ལོ་ ༢༠༢༣ ཟླ་༡༢ ཚེས་ ༡༢ རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོ་མཆོག་སྐུ་མི་རྟག་མྱ་ངན་ལས་འདས་ནས་མི་ལོ་ ༩༨༣༩ འཁོར་བའི་དུས་ཆེན་གྱི་ཉིན་འདིར་གཡུང་དྲུང་བོན་གྱི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་སྨན་རིའི་གྲྭ་ཚང་གི་འདུལ་ཁང་ཆེན་མོར། ༸སྐྱབས་རྗེ་སྨན་རིའི་དཔོན་སློབ་རིན་པོ་ཆེ་དབུ་བཞུགས་ཐོག དགེ་འདུན་འདུས་མང་ཡོངས་རྣམ་དག་འདུལ་བའི་གསོ་སྦྱོང་འཚོགས་གནང་ཡོད་པ་དང་།
དེ་རྗེས་གཤེན་གྱི་དགེ་གྱི་སྤྱོད་རྣམ་པར་དག་པའི་མདོའི་ཆོ་གའི་གཞུང་བསྲངས་གནང་ཡོད་པ་དང་། དེ་བཞིན་སྨན་རིའི་བཙུན་དགོན་རཏྣ་སྨན་གླིང་དུ་ཡང་གཤེན་གྱི་དགེ་སྤྱོད་རྣམ་པར་དག་པའི་ཆོ་ག་དང་། གསོ་རིག་འབུམ་བཞིའི་མཐོ་སློབ་སྨན་རིའི་གླིང་གི་དགེ་སློབ་ཡོངས་ནས་སངས་རྒྱས་སྨན་ལྷའི་དཀྱིལ་འཁོར་གྱི་ཆོ་གའི་སྒོ་ནས་འདས་མཆོད་སྲུང་བརྩི་དང་མཆོད་འབུལ་གནང་འདུག ཕྱི་དྲོར་༸སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་པ་དང་འདུས་མང་ཡོངས་ནས་ངན་སོང་དོང་སྤྲུག་གི་སྙིང་པོ་དབྱངས་སུ་གྱེར་བཞིན་སེར་འཕྲེང་གཡས་སྐོར་དུ་ཕེབས་རྗེས། འཚོགས་ཁང་ཆེན་མོའི་མདུན་ཐང་དུ་༸སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་ནས་གནས་འཁོད་དད་ལྡན་སེར་སྐྱ་མིང་མང་ཀུན་ལ་བདུད་རྩིའི་ཚན་གྱིས་ཁྲུས་གསོལ་མཛད་ཡོད་པ་རེད།
དེ་ཡང་གྲུབ་མཐའི་རྒྱལ་པོ་སངས་རྒྱས་གཡུང་དྲུང་བོན་གྱི་བསྟན་པ་ནི། རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོ་དེ་ཉིད་ལས་བྱུང་ཞིང༌། དེ་ཡང་རྟག་གཟིགས་འོལ་མོ་ལུང་རིང་གི་ཡུལ་དབུས། སྐུ་མཁར་བར་པོ་སོ་བརྒྱད་དུ་ཡབ་དམུ་རིགས་རྒྱལ་བོན་ཐོད་དཀར་དང༌། ཡུམ་ཡོ་ཕྱི་རྒྱལ་བཞད་མ་གཉིས་ཀྱི་སྲས་སུ་ཕྱི་ལོའི་སྔོན་གྱི་མི་ལོ་ ༡༦༠༡༧ ཤིང་ཕོ་བྱི་བའི་ལོར་སྐུ་བལྟམས་ཤིང་། སྟོན་པ་སངས་རྒྱས་དེ་ཉིད་ཀྱིས་རྣམ་པར་བཞེས་པ་དང༌། རྣམ་པར་སྤེལ་བ། རྣམ་པར་འདུལ་བ། རྣམ་པར་འདྲེན་པ། རྣམ་པར་ངེས་པ། རྣམ་པར་སྤྲུལ་པ། རྣམ་པར་འཇོམས་པ། རྣམ་པར་རྒྱལ་བ། རྣམ་པར་རིག་པ། རྣམ་པར་དབེན་པ། རྣམ་པར་གྲོལ་བ། རྣམ་པར་གྲུབ་པ་བཅས་མཛད་ཆེན་བཅུ་གཉིས་ཀྱི་སྒོ་ནས་བོན་བསྟན།
ཁྱད་པར་དུ་གཤེན་ལོ་གཅིག་ནས་དགུའི་བར་ཕྱྭ་གཤེན་དང༌། སྣང་གཤེན། འཕྲུལ་གཤེན། སྲིད་གཤེན། དགེ་བསྙེན། དྲང་སྲོང༌། ཨ་དཀར། ཡེ་གཤེན། བླ་མེད་བཅས་ཐེག་པ་རིམ་པ་དགུ་གསུངས་ཤིང༌། ཡི་གེ་སོགས་བཟོ་རིག་པའི་སྲོལ་ཕྱེས་ཏེ་བཟོ་རྒྱལ་གར་མ་ལི་ཤོ་ལ་བསྟན། དེས་རང་གི་སློབ་མ་བཟོ་ལ་མཁས་པ་བཟོ་རྗེ་ལྷ་དབང་དང༌། ཕུབ་ལ་མཁས་པ་སྒྱུ་འཕྲུལ་དབང་ཕྱུག བླུག་ལ་མཁས་པ་བླུག་ཐོག་པ་སངས། མགར་ལ་མཁས་པ་མགར་ལྷ་ཡུག་པ། ལྷ་ལ་མཁས་པ་ལྷ་སྲས་པདྨ། བྲིས་ལ་མཁས་པ་ཡི་གེ་འཕྲུལ་ཆུང་བཅས་འཛམ་གླིང་བསྟན་པའི་རྒྱན་དྲུག་ལ་བཟོ་རིག་གཏན་ལ་ཕབ་སྟེ།
གཤེན་ལོ་བཅུ་ནས་བཅུ་བཞི་བར་ཚད་མ་རིག་པ་དང་སྒྲ་རིག་པ། སྐར་རྩིས་དང་འབྱུང་རྩིས་བཅས་འཁོར་རྣམས་ལ་བསྟན་པ་ནས་བཟུང་དེ་དག་གི་སྲོལ་ཡང་ཐོག་མར་བྱུང༌། གཤེན་ལོ་བཅོ་ལྔ་ནས་བཅུ་དྲུག་བར་སྡིག་ཅན་གཏོ་བུ་དོད་དེ་སོགས་ཤིན་ཏུ་སྡིག་ཆེ་བའི་འགྲོ་བ་གྲངས་མང་བ་ཞིག་ཐར་པ་སངས་རྒྱས་ཀྱི་ཞིང་དུ་བཀོད་ཅིང༌། དགུང་ཞག་ཞེ་དགུའི་རིང་གཤིན་པོའི་རྗེས་སུ་ནང་མི་རྣམས་ཀྱིས་མཆོད་སྦྱིན་ལ་འབད་པའི་སྲོལ་བཏོད། བཅུ་བདུན་ནས་ཉི་ཤུའི་བར་མ་རྟོགས་ལོག་པར་ལྟ་བའི་བདུད་རིགས་རྣམས་བཏུལ་ཞིང༌། རྟག་གཟིགས་འོལ་གླིང་ནས་རྫུ་འཕྲུལ་གྱིས་ཞབས་བཅག་སྟེ་ཀོང་ཡུལ་དུ་ཕེབས་ནས་ཀོང་བཟའ་ཁྲི་ལྕམ་ཁབ་ཏུ་བཞེས་པས་སྲས་ཀོང་ཚ་གཡུང་དྲུང་དབང་ལྡན་འཁྲུངས། དེ་སྐབས་བོད་ཀྱི་བོན་པོ་རྣམས་ལ་ཡར་གྱི་ལྷ་གསོལ་བ་དང་མར་གྱི་འདྲེ་ཕུད་པ། བསང་དང་རླུང་རྟ། དར་ཅོག་འཛུགས་པ་སོགས་འབྱུང་བ་ལྔ་ལ་བཅོས་པའི་རྒྱུ་ཡི་བོན་བསྟན་ཏེ། ནམ་ཞིག་བོད་དུ་ཐེག་པ་རིམ་དགུའི་བོན་རྣམས་དར་བའི་སྨོན་ལམ་བཏབ། སྐབས་དེར་ཀོང་པོ་བོན་རིར་ཞབས་བཅགས་བྱིན་གྱིས་རླབས་པས་ད་ལྟ་བོན་པོ་རྣམས་ཀྱིས་ཀོང་པོ་བོན་རི་ཞེས་ས་གནས་བྱིན་ཅན་དུ་བརྩི་བའི་རྒྱུ་མཚན་ཡང་དེ་ལྟར་ཡིན།
གཤེན་ལོ་ཉི་ཤུ་ནས་སོ་གཅིག་བར་འཛམ་གླིང་གི་ཡུལ་གྲུ་དུ་མར་ཞབས་ཀྱིས་བཅགས་ཏེ་གངས་ཏི་སེ་ལ་བྱིན་གྱིས་རླབས་ནས་གང་ལ་གང་འདུལ་གྱི་བསྟན་པ་སྤེལ་ཞིང༌། བྱེ་མ་ཉི་ཁྲི་ཆུ་རྒྱུན་དང༌། ཁམས་བརྒྱད། བདལ་འབུམ། ཉི་མ་དགུ་ཤར། རྩེ་འབུམ། བ་ག་དབྱིངས་འབུམ་སོགས་འབུམ་རྒྱས་འབྲིང་བསྡུས་གསུམ་གཏན་ལ་ཕབ། །གཤེན་ལོ་སོ་གཅིག་ཐོག་སྐྱེ་རྒ་ན་འཆིའི་སྡུག་བསྔལ་གྱིས་རྒྱུད་བསྐུལ་བའི་ཚུལ་མཛད་དེ་མཆོད་རྟེན་རྣམ་དག་དཀར་པོའི་དྲུང་དུ་ཉིད་ཀྱི་དབུ་སྐྲ་ཉིད་ཀྱིས་བསིལ་ཞིང་པད་ཞུ་སུལ་བུ་རྩ་ལྔ་དང༌། རྨད་གོས་གླིང་སྣམ་རྩ་ལྔ། རྨད་འོག་གླིང་སྣམ་བདུན་པ། སྨད་ཤམ་སུལ་བུ་རྩ་ལྔ། སྟོད་གོས་སུལ་བུ་རྩ་ལྔ། པད་ལྷམ་པད་རྩེགས་གཉིས་སྦྱོར་བཅས་རྨད་དུ་བྱུང་བའི་ན་བཟའ་པད་ལོ་རིས་དྲུག་སྐུ་ལ་གསོལ་ནས་ཁྱིམ་སྤངས་རབ་ཏུ་བྱུང༌། དེ་ནས་འཁོར་དང་རྒྱལ་སྲིད་ལོངས་སྤྱོད་ཀུན་དོར་ནས་མེ་ཏོག་གླིང་ལ་དཀའ་ཐུབ་ཏུ་གཤེགས།
གཤེན་ལོ་སོ་གཉིས་ནས་ཞེ་ལྔའི་བར་འོག་མིན་ཞིང་དུ་དྲང་སྲོང་ལེགས་ལྡན་རྒྱལ་བའི་མདུན་ནས་དྲངསྲོང་གི་ཁྲིམས་ཉིས་བརྒྱ་ལྔ་བཅུ་རྫོགས་པར་ལེན་པའི་ཚུལ་མཛད་ཅིང༌། བྱ་སྤྲེལ་མི་གསུམ་གྱི་དཀའ་ཐུབ་ལོ་དགུར་སྤྱད། དེ་ནས་འཁོར་རྣམས་སྡེ་བཞི་ཡ་བརྒྱད་དུ་ཕྱེས་ཤིང༌། ཁྱབ་པ་ལ་སོགས་ཕོ་གྲལ་གཡས་དང༌། གཤེན་བཟའ་ནེའུ་ཆུང་ལ་སོགས་མོ་གྲལ་གཡོན་དུ་བྱས་ནས་སོ་ཐར་རིགས་བཞི་སྟེ། བསྙེན་གནས་དང༌། དགེ་བསྙེན། གཙང་གཙུག དྲང་སྲོང་ཕོ་མོ་བཅས་ལ་སོ་ཐར་གྱི་སྡོམ་པ་གནང༌།
གཤེན་ལོ་ཞེ་དྲུག་ནས་གྱ་གཅིག་བར་གཡུང་དྲུང་དགུ་རྩེགས་ནགས་ཚལ་དབེན་གནས་སུ་དགོན་པར་བཞུགས་པའི་དུས། གདུལ་བྱ་དབང་རྟུལ་རྣམས་ལ་སྤང་གཉེན་རིམ་སྐྱེ་འོག་མའི་ཐེག་པ་བསྟན་ཞིང༌། དབང་རབ་རྣམས་ལ་ཚེ་གཅིག་སངས་རྒྱས་སྒྲུབ་ཐབས་རྫོགས་པ་ཆེན་པོའི་ཐེག་པ་གསུངས་པ་སོགས་འཁོར་རྣམས་ལ་རང་རང་གི་བློ་ཚད་དང་མཐུན་པའི་བོན་འཁོར་རིམ་པ་གསུམ་སོགས་བོན་སྒོ་བརྒྱད་ཁྲི་བཞི་སྟོང་གཏན་ལ་ཕབ་ནས་གསུངས་པའོ།།མཐར་གཤེན་ལོ་གྱ་གཉིས་ལོར་གདུལ་བྱ་རྟག་འཛིན་ཅན་རྣམས་སུན་དབྱུང་བའི་ཕྱིར། ཕྱི་ལོའི་སྔོན་གྱི་མི་ལོ་ ༧༨༡༧ ལ་སྐུ་མི་རྟག་མྱ་ངན་ལས་འདས་ཚུལ་བསྟན་པའོ། ། སྟོན་པའི་རྣམ་ཐར་འདི་གནས་ཚུལ་གོང་མ་ལས་ཉུང་བསྡུས་བྱས།