དེ་ཡང་འཛམ་གླིང་གི་ཡུལ་གྲུ་སོ་སོ་དང་། མི་རིགས་སོ་སོ། ཡུལ་ལུང་སོ་སོར་ལོ་གསར་པའི་དུས་སྟོན་གྱི་རྟེན་འབྲེལ་མཛད་སྒོ་རེ་ཡོད་པ་བཞིན། རང་རེའི་བོད་མི་རིགས་ཀྱིས་ཀྱང་བོད་ཟླ་དང་པོའི་ཚེས་གཅིག་སྟེ་གནམ་ལོ་གསར་ཚེས་ཀྱི་དུས་ཚིགས་ཉིན། དགོན་པ་དང་གྲོང་སྡེ། ཚོགས་པ་དང་གྲོང་པ་སྒེར་སོགས་སོ་སོས་ནས། དགའ་སྤྲོའི་སྟོན་མོ་དང་། དགེ་སྤྱོད་ཕུན་ཚོགས་ཀྱི་རྟེན་འབྲེལ་གྱི་བྱ་བཞག་དུ་མ་ཞིག་གནང་སྲོལ་ཡོད་པ་སྤྱི་མཚུངས་ལྟར།
གདན་ས་སྨན་རིའི་གླིང་ནས་ཕྱི་ལོ་ ༢༠༢༤ ཟླ་བ་ ༢ ཚེས་ ༡༠ བོད་ཤིང་འབྲུག་ལོའི་བོད་ཟླ་ ༡ ཚེས་ ༡ ཉིན་ཐོ་རངས་ཀྱི་དུས་སུ་སྨན་རིའི་སྒྲུབ་ཁང་དབང་དྲག་ཕོ་བྲང་ནས་རྒྱལ་བའི་ཚེམས་དུང་འཕར་ཆུང་གི་གསུང་དབྱངས་ཕྱུངས་ཤིང་གསེར་འོད་ནོར་བུ་འོད་འབར་གྱི་གཡང་འབོད་གསུངས།
ནམ་ལངས་ཡོས་ཀྱི་ཐོག་ནས་བོན་གཞིས་སེར་སྐྱ་མི་མང་ཡོངས་ཀྱིས་༧སྐྱབས་རྗེ་༧རྒྱལ་བ་སྨན་རིའི་བླ་བྲང་དང་། ༧སྨན་རིའི་དཔོན་སློབ་རིན་པོ་ཆེ་ལ་མཇལ་ཁ་རིམ་ཞུས་ཀྱིས་གནམ་ལོ་གསར་པའི་ནང་བསྟན་དང་འགྲོ་བའི་ལེགས་ཚོགས་གོང་འཕེལ་ཡོང་བའི་གསོལ་འདེབས་སྨོན་ལམ་ཞུས་པ་དང་སྨན་རིའི་བླ་བྲང་དང་། དཔོན་སློབ་རིན་པོ་ཆེ་རྣམ་གཉིས་ནས་བྱིན་མདུད་དང་གསོལ་ཇ་བཞེས་ཏོག་བསྩལ་གནང་མཛད།
དེ་རྗེས་༧དཔལ་གཤེན་བསྟན་སྨན་རིའི་གླིང་གི་ཚོགས་ཁང་ཆེན་མོ་རུ་༧སྐྱབས་རྗེ་༧རྒྱལ་བ་སྨན་རི་བའི་བླ་བྲང་ནས་དགེ་འདུན་འདུས་པ་རྒྱ་མཚོར་བསྙེན་བཀུར་མང་ཇ་རྒྱས་འབུལ་དང་ལོ་གསར་གྱི་མཛད་སྟོན་ཐོག་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་དང་༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་རྣམ་གཉིས་དབུ་བཞུགས་ཐོག བཤད་སྒྲུབ་མཁན་སློབ་དང་བླ་སྤྲུལ་དགེ་བཤེས་སེམས་དཔའ་འདུས་སྡེ་རྒྱ་མཚོའི་ཚོགས་ཀྱིས་གནམ་ལོ་གསར་པའི་ནང་བསྟན་དང་འགྲོ་བའི་ལེགས་ཚོགས་གོང་འཕེལ་ཡོང་བའི་གསོལ་འདེབས་སྨོན་ལམ་གསུང་ཡོད་པ་དང་།
དེ་རྗེས་བདའ་དགུའི་རོ་མཆོག་ལྡན་པའི་གསོལ་ཇ་དང་སྡེར་ཁའི་ཟས་ཀྱི་དངོས་གྲུབ་རྣམས་དྲངས་ནས་ཇ་མཆོད་སྐྱབས་མཆོག་དམ་པ་གྱེར་དབྱངས་དང་བཅས་གསོལ་ཇ་བཞེས།
བཀའ་རབ་འབྱམས་པ་དགེ་བའི་བཤེས་གཉེན་གཉིས་ནས་བཀྲ་ཤིས་ཀྱི་དགེ་མཚན་ཡོངས་སུ་ཕྱུགས་པའི་བཀྲ་ཤིས་ཚིག་བཀྲའི་ཚིག་སྙན་དབྱངས་ཀྱི་སྒོ་ནས་བརྗོད་པ་གྲུབ་རྗེས་ལོ་སར་ཚེས་གཅིག་གི་མཛད་རིམ་གྲུབ་ཡོད་པ་དང་། སེར་སྐྱ་མང་ཚོགས་ནས་འཚང་ཁ་ཤིག་ཤིག་ངང་མུ་མཐུད་དེ་རིན་པོ་ཆེ་རྣམ་གཉིས་ཀྱི་བླ་བྲང་ལ་མཇལ་བཅར་ཞུས་ནས་ལོ་གསར་སྤྲོ་སྐྱིད་རོལ་ཡོད་པ་བཅས་ཀྱི་གནས་བསྡུས་སོ།
བརྙ་ཪིས་ལ་གཟིགས།vidoe
༸རྒྱལ་བ་སྨན་རི་བའི་ལོ་སར་གྱི་གསུང་འཕྲིན།