བོད་ཤིང་འབྲུག་ལོའི་ཟླ་༡ཚེས་༡༦་ཉིན་ཏེ་ཕྱི་ལོ་༢༠༢༤ཟླ་བ་༢ཚེས་༢༥ཉིན།གཡུང་དྲུང་བོན་གྱི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་སྐབས་ཉེར་གཉིས་པའི་དགེ་བཤེས་ཁྲི་བཞེངས་མཛད་སྒོ་སྤེལ་ཡོད་པ་རེད།དེ་ཡང་སྐབས་ཉེར་༢༢པའི་དགེ་བཤེས་མཛད་སྒོའི་དམིགས་བསལ་སྐུ་མགྲོན་གཙོ་བོ་རང་གཞུང་ཤེས་རིག་ལས་ཁུངས་ཀྱི་སྐུ་ཚབ་ཆོས་རིགས་དྲུང་ལས་བསོད་ནམས་སྟོབས་རྒྱལ་ལགས་ཕེབས་ཡོད་ཅིང་།
བོད་ཟླ་དང་པོའི་ཚེས་བཅུ་དྲུག་ཉིན་ཞོགས་ཚོགས་གྲོལ་རྗེས་ཕྱག་ཚོད་བཅུ་པའི་ཐོག།སྔོན་འགྲོའི་གྱེར་སྐབས་ཀྱི་སྟ་གོན་བཞིན།༧སྐྱབས་རྗེ་མཁན་སློབ་རྣམ་པ་གདན་ཞུའི་གོ་སྒྲིག་བྱས་རྗེས།དམིགས་བསལ་སྐུ་མགྲོན་ཆེ་ཁག་དང་བོན་གཞིས་རྒན་གཞོན་མང་ཚོགས་ཀྱིས་བོན་དར་དང་ཚན་པ་གང་འབྱོར་རེ་བསྣམས་ཏེ། འཆམ་རའི་ནང་བསྟར་འཕྲེང་བསྒྲིགས་པ་དང་སྦྲགས།བཤད་སྒྲུབ་མཁན་སློབ་རྣམ་གཉིས་སྤོས་གླིང་གིས་སྣེ་དྲངས་ཏེ། བཀའ་རམས་པ་དང་མཆོད་སྟེགས་པ་གཉིས་རེ་སྤེལ་ཏེ་གོ་རིམ་བཞིན་འདུལ་ཁང་དུ་ཕེབས་པ་དང་།སྔར་མུས་ལྟར་འདུས་མང་གིས་བྱམས་མའི་སྔགས་བསྟོད་གསུངས་ཤིང་ཇ་མཆོད་ཟླ་བྲལ་ཨ་དཀར་གྱེར་ཏེ་བཀྲ་ཇ་མཆོད།
བླ་གྲྭ་དགེ་བའི་བཤེས་གཉེན་དང་ལོ་རིམ་གོང་འོག་གི་བཤད་སྒྲུབ་སློབ་གཉེར་བ་རྣམས་ནས་བཀྲ་ཤིས་པའི་རྟགས་གསལ་རྩོད་གནངས་རྗེས།འདུས་མང་ནས་བར་ཆད་ལམ་སེལ་གསུངས་ཏེ་ཚོགས་གྲོལ།ཉིན་གུང་ཕྱག་ཚོད་བཅུ་གཉིས་ཐོག་དམ་ཐུག་མཆོད་རྗེས་སྔ་དྲོའི་མཛད་རིམ་གྲུབ་ཡོད་པ་དང་།
ཕྱེད་ཡོལ་ཕྱག་ཚོད་དང་པོ་དང་ཕྱེད་ཀའི་སྟེང་མཁན་སློབ་བླ་གྲྭ་ལྷན་རྒྱས་འདུལ་ཁང་དུ་བཞུགས་གྲལ་འཁོད་མཚམས།འདུས་མང་ནས་བྱམས་མ་སྔགས་བསྟོད་དང་ཇ་མཆོད་སྐྱབས་མཆོག་དམ་པ་གྱེར་དབྱངས་གནང་གནངས་ནས་བཀྲ་ཇ་མཆོད།
ཚོགས་ཆེན་དགེ་སྐོས་ནས་སྐབས་༢༢པའི་བཀའ་རམས་པ་རྣམས་ལ་ཆབ་ཕུལ་རྗེས་བཀའ་རམས་པ་རྣམས་ཚོགས་གྲལ་ནས་བཞེངས་ཏེ་གུས་ཕྱག་གསུམ་ཕུལ་ཅིང་།༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་ནས་མཚན་བཏགས་ཀྱི་ཚིག་བཤད་རབ་དཀར་པད་མོའི་ཕྲེང་མཛེས་རྒྱས་པར་གསུངས།དེ་རྗེས་དགེ་འདུན་འདུས་པ་རྒྱ་མཚོ་ནས་མདོ་ཡན་ལག་བརྒྱད་པ་ལས་ཟུར་དུ་ཕྱུང་བའི་བསྔོ་བའི་ཚིག་བཤད་བདེར་གཤེགས་སྤྱན་དྲངས་བརྗོད།
༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རི་བ་མཆོག་ནས་བསྔོ་བ་བདེ་ལེགས་མ་གསུངས་པ་དང་།དེ་རྗེས་འདུས་མང་ཡོངས་ནས་སྔ་རབས་འདས་པ་སོགས་གསུངས་ཏེ་དམིགས་མེད་བསྔོ་བའི་རྒྱས་འདེབས་ལེགས་པར་མཛད།བཀའ་རམས་པ་རྣམས་ནས་མཆོད་ཚིག་སྨོན་པ་ཡོངས་གྲུབ་གསུངས་ཏེ་མཆོད་འབྲུ་གཏོར།
དེ་ནས་༧ཞྭ་དཀར་བསྟན་པའི་གཙུག་རྒྱན་མཆོག་ནས་དགེ་བའི་བཤེས་གཉེན་གྱི་ཕྱག་འཁྱེར་དང།བྱིན་ཅན་སྲུང་མདུད་དྲི་མེད་ལྷ་དར་བཅས་གནང་གྲུབ་རྗེས།༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་དང་སྨན་རིའི་བཤད་སྒྲུབ་མཁན་སློབ་རྣམ་གཉིས་བཅས་ནས་མགུལ་དར་སྒྲོན་རྗེས།
དགེ་བའི་བཤེས་གཉེན་རྣམས་གྲལ་བར་དུ་ཡར་མར་ཕེབས་མུས་སུ་མཚན་ཉིད་ཚིག་བཀྲའི་རིམ་པ་རབ་དཀར་པད་མོའི་ཕྲེང་བ་གསུངས་གྲུབ་རྗེས་གུས་ཕྱག་དང་བཅས་རང་གནས་སུ་བཞུགས་དང་ལྷན་རང་གཞུང་ཆོས་རིགས་ལས་ཁུངས་ཀྱི་སྐུ་ཚབ་ཆོས་རིགས་དྲུང་ལས་བསོད་ནམས་སྟོབས་རྒྱལ་མཆོག་ནས་སྐབས་༢༢པའི་དགེ་བཤེས་རྣམས་ལ་རྟེན་འབྲེལ་མཚོན་པའི་ཁ་བཏགས་ཕུལ་རྗེས། བསླབ་གསུམ་འདུས་པ་རྒྱ་མཚོ་ཡོངས་ནས་ཤེས་རབ་ཀྱི་ཕ་རོལ་དུ་ཕྱིན་པའི་སྙིང་པོ་ཐེག་པ་ཆེན་པོ་ཡུམ་གྱི་མདོ་གསུངས་ཤིང་ཁྲུས་ཆུ་ལ་སྔགས་ཏེ་ཚོགས་གྲོལ་མཚམས།
འདུལ་ཁང་གི་སྒོ་འཁྱམ་དུ་འདུས་མང་རྣམས་ཞལ་ནང་དུ་བསྒྱུར་ཏེ་གཤེན་གྱི་དགེ་སྤྱོད་རྣམ་པར་དག་པའི་མདོ་ལྟར་བསྐོར་བའི་ཡན་ལག་རྒྱས་པར་གསུངས།དེ་ནས་ཐམས་ཅད་འཆམ་རར་ཕེབས་ཏེ་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་ནས་སེར་སྐྱ་མི་མང་ཡོངས་ལ་རྣམ་འཇོམས་བྱབ་ཁྲུས་གནང་གྲུབ་པའི་རྗེས་འདུལ་ཆོག་ལྟར་ཉུ་ལེ་བཀར་བདུད་ཟློག་དང་ཞི་གྱུར་བརྗོད།དེ་རྗེས་འདུས་མང་རྣམས་ཞལ་ཡར་ཕྱོགས་ཏེ་སྒོ་འཁྱམ་དུ་འདུལ་ཆོག་སྨོན་ལམ་གསུངས་ཤིང་།
དེ་མཚམས་༧ཞྭ་དཀར་བསྟན་པའི་གཙུག་རྒྱན་མཆོག་ནས་བཀའ་རབ་འབྱམས་པ་དགེ་བའི་བཤེས་གཉེན་ཆེན་པོ་སྐལ་པ་བཟང་ཞེས་གསུངས་པ་དང་ཆབས་ཅིག།
དགེ་འདུན་འདུས་ཚོགས་ཡོངས་ནས་སྐལ་པ་བཟང་ཞེས་ལན་གསུམ་རྗེས་ཟློས་བྱས་རྗེས།༧སྐྱབས་རྗེ་མཁན་སློབ་རྣམ་པ་དང་བཤད་སྒྲུབ་མཁན་སློབ་རྣམ་པ་རིམ་བཞིན་སྤོས་གླིང་གིས་སྣ་དྲངས་ཏེ་གཟིམ་ཤག་ཏུ་གདན་འདྲེན་ཞུས་ཤིང་།
དེ་རྗེས་རིམ་གྱིས་སྐབས་༢༢པའི་དགེ་བཤེས་རྣམས་སྤོས་གླིང་གིས་མདུན་ནས་བསུས་ཏེ་ཞྭ་དཀར་གཡུང་དྲུང་བོན་གྱི་བཤད་སྒྲུབ་འདུས་སྡེའི་ཚོགས་ཁང་དུ་མངའ་གསོལ་ཁྲི་བཞེངས་དང་འབྲེལ།སེར་སྐྱ་མི་མང་ཡོངས་ནས་བཀྲ་ཤིས་ལྷ་དར་དཀར་པོས་མདུན་ནས་བཏེགས་ཏེ།
བཀའ་རབ་འབྱམས་པ་དགེ་བའི་བཤེས་གཉེན་ཆེན་པོ་སྐལ་པ་བཟང་ཞེས་པའི་སྒྲ་དབྱངས་དང་བཅས་དར་འབུལ་མཇལ་བཅར་དང་།གསོལ་ཇ་འཁུར་ཟས་སོགས་ལ་རོལ་རྗེས་དགའ་སྟོན་རྟེན་འབྲེལ་གཟབ་རྒྱས་ཞུས་ནས་༧གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་སྐབས་༢༢པའི་དགེ་བཤེས་མཛད་སྒོ་མཇུག་ལེགས་པར་གྲུབ་ཡོད་པ་བཅས་ཀྱི་གནས་བསྡུས་སུ།