མཁྱེན་བརྩེ་སྟོབས་དང་ལྡན་པའི་བླ་མ་རྣམས་ལ་དུན་གུ་ཧྲུན། འཕྲིག་ཡིག་དྲང་དོན་འདུས་པ་བསྟན་པར་བྱ་སྟེ། ཞང་ཞུང་གཙོ་མེན་གྱེར་ཆེན་གྱིས། རིག་འཛིན་འདུས་པའི་བསྒྲུབ་པ་མཛད་དུས་སུ། གུ་གེ་བརྒྱུད་དེ་ཁོད་སྤུངས་ཀྱིས་བཀོད་པའོ། གཤེན་པོ་གསང་བ་འདུས་པས་གསུངས་པ། ཉོན་དང་མ་འོངས་སེམས་ཅན་ཀུན། གཡུང་དྲུང་བོན་འདི་ཐོས་པ་དཀའ་བས། བསྒྲུབ་ལ་བརྩོན་པར་བགྱི། ཁེངས་དྲེགས་བདུད་བཅོམ་བརྩོན་གྲུས་བསྐྱེད། འཆི་བདག་བདུད་ནི་སོ་བྱས་ཉ་བསྒུག་འདྲ། དེ་ཕྱིར་གཡུང་དྲུང་བོན་སྤྱོད་དང་དུ་ལོངས། འོད་གསལ་ཆེན་པོ་རྒྱུན་དུ་བསྒོམ། ཞེས་གསུངས་སོ། སྟག་ལ་མེ་འབར་གྱིས་གསུངས་པ་ནི། ལུས་སེམས་གཉིས་ཀྱང་མི་རྟག་ཏེ། དབྱར་གྱི་རྩ་ཟིལ་འདྲ་བར་རྟོགས། ཞེས་གསུངས་པས། ཡོངས་སུ་དག་པའི་ཞལ་ནས། གཡུང་དྲུང་བོན་སྤྱོད་བྱེད་པ་རྣམས། རྟག་འཛིན་མ་བྱེད་བརྩོན་གྲུས་བསྐྱེད། ཁེངས་དྲེགས་ལས་ནི་འཇིག་རྟེན་སྤྱོད་པ་ཡིན་གསུངས། མི་ལུས་བསམ་ལེགས་ཀྱི་ཞལ་ནས། ལུས་འདི་དབྱར་གྱི་རྩ་ཟིལ་འདྲ། རྟག་པར་བཟུང་ན་འཁྲུལ་པ་སྟེ། ནོར་ཟས་བུ་འཁོར་དེ་དང་འདྲ་བ་སྟེ། འཆི་བའི་ཚེ་ན་གཅིག་པུར་བུད་ནས་འགྲོ། དེ་བས་གང་ལ་མི་ཆགས་གཡུང་དྲུང་དོན་ལ་སྦྱོངས། ཞེས་གསུངས་སོ། ཡེ་ཤེས་སྙིང་པོའི་ཞལ་ནས། འཇིག་རྟེན་སྒྱུ་མ་ལྟ་བུ་ལ། རྟག་ཏུ་རེ་བ་ཡིད་རེ་འཁྲུལ། བྱ་བ་མང་པོ་ཆུའི་གཉེར་མ་འདྲ། སྒྱུ་མའི་ལས་འདི་ཐོག་མཐར་ཞེན་པ་མེད། བྱ་བ་བཏང་ན་བདེ་བ་དེ་ཉིད་གསུངས་སོ། སྣང་བ་མདོག་ཅན་གྱི་ཞལ་ནས། སེམས་ནི་བར་སྣང་སེར་བུ་འདྲ། ལུས་ནི་ན་བུན་སྤྲིན་དང་འདྲ། དུས་མཚུངས་ལན་གཅིག་དུ་བས་ཁྱབ་མི་འབྲེལ། གཡུང་དྲུང་བོན་ལ་བརྟེན་ན་སངས་རྒྱས་དེ་ཉིད་ཡིན། ཅེས་གསུངས། རྒྱལ་པོ་མུ་ཁྲི་བཙད་པོའི་ཞལ་ནས། ཕྱི་མ་དོན་གཉེར་ཚེ་འདི་ཡལ་བར་དོར། འཁོར་བས་འཇིགས་ན་བདེར་གཤེགས་ཀུན་ལ་སྐྱོབས། དགྲའམ་འོན་ཏེ་གཉེན་ཡང་རུང་། ཉོན་མོངས་བསྐྱེད་པ་རྣམས་ནི་ཐག་ཡང་བཅད། གསང་གཏམ་རང་མ་ཡིན་ཀུན་ལ་གབ་ན་འགྲུབ། ཅེས་གསུངས་སོ། ཧ་ར་ཇི་པར་གྱི་ཞལ་ནས། འཁོར་བ་དུག་གི་སྡོང་པོ་ལ། སྡུག་བསྔལ་ཡིན་པ་སུས་ཤེས་པ། གཤེན་དེ་གང་ན་གནས་ཀྱང་བདེ་བའི་མཆོག ཉོན་མོངས་བསྐྱེད་པའི་ཡུལ་རྣམས་ལ། དཔོན་གསས་བླ་མར་སུས་མཐོང་བ། གཤེན་དེ་གང་ན་གནས་ཀྱང་བདེ་བ་ཡིན། ལུས་དང་སྲོག་ལ་མི་ལྟ་བར། བླ་མ་བརྟེན་པར་བྱེད་པ་ནི། གཤེན་དེ་གང་ན་གནས་ཀྱང་བདེར་གཤེགས་ཀུན་གྱིས་སྐྱོབས། ཞེས་གསུངས། སྟག་ཝེར་ལི་ཝེར་གྱི་ཞལ་ནས། འཇིག་རྟེན་འདི་བར་སྣང་འཇའ་ཤར་དང་འདྲ། ནོར་ཟས་རྣམས་ནི་དེ་དང་འདྲ་ཤེས་ན། གཤེན་དེ་གང་ན་གནས་ཀྱང་བདེ་ལ་རེག་པ་ཡིན། ཅེས་གསུངས་སོ། ཨ་ནུ་འཕྲག་ཐག་གི་ཞལ་ནས། ངེས་པའི་གདམས་ངག་བོན་ཉིད་མི་འཚོལ་བ། དོན་མེད་ཚིག་གི་ཐ་སྙད་འཚོལ་བ་འཁྲུལ། བདེར་གཤེགས་གཞལ་ཡས་མི་བསྒོམ་པར། འཁོར་བའི་མུན་ཁང་བརྩིག་པ་འཁྲུལ། གཅིག་པུར་གཡུང་དྲུང་དོན་ལ་མི་ལྟ་བ། འཁོར་འདབ་ངན་པ་བརྟེན་པ་འཁྲུལ། ཕྱི་མ་འཆི་བ་མི་དྲན་པར། རྟག་ཏུ་སྡོད་ཕྱིས་བྱེད་པ་འཁྲུལ། སད་ནེ་གའུ་ཡི་ཞལ་ནས། དཔོན་གསས་སྤྱི་བོར་མི་བསྒོམ་པར། རོགས་ལ་ངོ་དགའ་བྱེད་པ་འཁྲུལ། ཡི་དམ་འབྲལ་མེད་མི་བསྒོམ་པར། འཁྲུལ་པས་སྨྲ་བརྗོད་སྟོང་པ་འཁྲུལ། སྟོང་ཞིང་བདག་མེད་མི་བསྒོམ་པར། ལོངས་སྤྱོད་འདུ་འཛི་གསོག་པ་འཁྲུལ། ཞེས་གསུངས། ད་མི་དད་ཀེའི་ཞལ་ནས། འཇིག་རྟེན་འདི་ནི་སྒྱུ་མ་ལྟ་བུ་སྟེ། གང་ཡང་རྟག་པ་མེད་དོ་སོས་ཀའི་རྩི་འཁྲུངས་འདྲ། དེ་འདྲ་ཕུང་པོ་བརྟག་པར་བྱ། མི་གཙང་རང་བཞིན་འདམ་རྫབ་ལ། ཆགས་པ་མི་བྱ་དོན་ལ་འབད། ཅེས་གསུངས་སོ། ཤད་བུ་ར་ཁུག་གི་ཞལ་ནས། ང་བདག་གཟུང་འཛིན་འཁྲུལ་པའི་བློ། འཆི་བའི་དུས་ཚེ་གཅིག་པུར་འགྲོ། གཡུང་དྲུང་བོན་གྱིས་སྒོར་ཞུགས་ནས། མངོན་སྤྱོད་ངན་པའི་ལས་བྱེད་རང་རེ་བསླུ། སྡིག་དང་སྦྲགས་པས་ཟས་འདི་སྤངས་ནས་ཀྱང། ཐེག་ཆེན་གཡུང་དྲུང་དོན་ལ་བསྒྲུབ་པར་བྱ། ཞེས་གསུངས་སོ། ཟིངས་པ་མཐུན་ཆེན་གྱི་ཞལ་ནས། ཕུང་པོ་འདི་ནི་འབོར་བར་ངེས་པ་ལ། ལྷག་པར་བྱི་དོར་བྱེད་པ་འཁྲུལ། ཐེག་ཆེན་གཡུང་དྲུང་དོན་ལ་ཞུགས་ནས་ཀྱང། ཤེས་རབ་སྙིང་རྗེ་མེད་པ་དོན་དང་འགལ། སེམས་ནི་སྐྱེ་འཆི་མེད་པ་མ་ཤེས་པ། འཇིག་རྟེན་འདི་དོན་གཉེར་བ་འཁྲུལ། ཕྱི་མའི་གནས་ལམ་ཆ་མེད་པར། འཇིག་རྟེན་འདི་ཡི་སྡིག་ལས་ཡང་ཡང་འཁྲུལ། ཞེས་གསུངས་སོ། སྤེ་བོན་ཐོག་འཕྲུལ་གྱི་ཞལ་ནས། ལུས་འདི་མི་རྟག་གཉེན་པོ་ཡིན་པར་མ་ཤེས་པར། མི་དགེ་སྡིག་པའི་ཟས་ཀྱིས་བཀུར་བསྟི་བྱེད་པ་འཁྲུལ། ད་ལྟའི་སྡུག་བསྔལ་ཆུང་ངུ་ཙམ་ཡང་མི་བཟོད་པར། ངན་སོང་གསུམ་གྱི་སྡུག་བསྔལ་བཟོད་དུ་རེ་བ་འཁྲུལ། སྡུག་བསྔལ་ཆེན་པོ་ནམ་ཡོང་ཆ་མེད་པར། ཚེ་འདི་དོན་མེད་ཡལ་བར་སྟོང་པ་འཁྲུལ། ཕྱི་མ་རང་དོན་གྲབས་སུ་མི་འཇུག་པར། འཇིག་རྟེན་སྒྱུ་མའི་ནོར་རྫས་བསོག་པ་འཁྲུལ། ཅེས་གསུངས་སོ། ཡེ་བོན་ཐོག་རྩེའི་ཞལ་ནས། ཚེ་འདི་མི་རྟག་ཆུ་ཡི་ལྦུ་བ་འདྲ། དེ་ཕྱིར་དུས་འདིར་བདེར་གཤེགས་སྐྱབས་སུ་ཚོལ། འབྱུང་འདུས་འཇིག་པའི་རྐྱེན་མང་བས། ཡི་དམ་ལྷ་ལ་སྐྱེལ་མ་ཞུས། ཚིག་གི་ལོ་མ་དེད་ན་འབུམ་ཕྲག་ཡས། དེ་ཕྱིར་དོན་གྱི་སྙིང་པོ་གཅིག་ཏུ་དྲིལ། སྟོང་རྒྱུང་གི་ཞལ་ནས། དལ་འབྱོར་ཁོམ་ལྡན་དུས་འདིར། སྐྱེ་མེད་རྟོགས་པ་ཡིན་གྱི་ནོར་བུ་བསགས། འཇིག་རྟེན་བྱ་བ་བཏང་ལ་ལྷ་བསྙེན་དཔུང་དུ་སྒྲིལ། ང་རྒྱལ་རློམ་སེམས་ཕྲལ་ཏེ་ཞི་དུལ་སྤྱོད་པ་སློབས། བྱ་བ་བཏང་ལ་གཅིག་པུར་དབེན་ས་བརྟེན། ལུས་ངག་ཡི་དམ་ལྷ་དང་འབྲལ་མེད་བྱ། ཞེས་གསུངས་སོ། སེ་ཤ་རི་དབུ་ཆེན་གྱི་ཞལ་ནས། བོན་གྱི་རྩ་བ་དམ་ཚིག་ཡིན་གྱིས། རང་སེམས་དཔང་དུ་ཚུགས། གདམས་ངག་གི་རྩ་བ་བསྙེན་པོ་ཡིན་གྱིས། ཉོན་མོངས་ཀྱི་རྐྱེན་ཐུབ་པར་གྱིས། ཉོན་མོངས་སེལ་བའི་རྒྱུ་རུ། དཔོན་གསས་ཀྱི་གདམས་པ་གཙོ་བས། ཕྱིན་ཅི་མ་ལོག་པར་སྤྱོད་ཅིག ལྡེ་གྱིམ་ཚ་རྨ་ཆུང་གི་ཞལ་ནས། བོན་གྱི་རྩ་བ་དད་པ་ཡིན་པས། རྒྱུན་ཆད་མེད་པར་བྱ་བ་གཅེས། དམ་ཚིག་རྩ་བ་བརྩེ་གདུང་ཡིན་པས། བརྗེད་མེད་དུ་དྲན་པར་གཅེས། དཔོན་གསས་བླ་མ་དངོས་གྲུབ་ཀྱི་རྩ་བ་ཡིན་པས། རྟག་ཏུ་སྤྱི་བོར་བསྒོམ་པ་གཅེས། ཞེས་གསུངས། མེ་ཉག་ལྕེ་ཚ་མཁར་བུའི་ཞལ་ནས། འཁོར་བའི་གཡེང་བ་དྲན་ན་དད་པའི་གསལ་འདེབས་ཡིན། ངན་སོང་གི་སྡུག་བསྔལ་དྲན་ན་སྙིང་རྗེ་གསལ་འདེབས་ཡིན། བླ་མའི་བཀའ་དྲིན་མ་བརྗེད་ན་མོས་གུས་ཀྱི་གསོས་འདེབས་ཡིན། འཁོར་བ་ལ་ཞེན་པ་ལོག་ན་ཐར་པའི་གསོས་འདེབས་ཡིན། ཞེས་གསུངས་སོ། ངམ་པ་ལྕེ་རིང་གི་ཞལ་ནས། འཁོར་བ་ལ་ཞེན་མ་ལོག་ན་ཐར་པའི་འབྲས་བུ་དཀའ། བླ་མ་ཡི་དམ་མི་དྲན་ན་ཕྱི་མའི་སྐྱབས་བྱེད་དཀའ། མི་རྟག་པ་རྒྱུད་ལ་མ་སྐྱེས་ན་རྒྱུ་འབྲས་ལ་ཡིད་ཆེས་དཀའ། རྒྱུ་འབྲས་ལ་ཡིད་མ་ཆེས་ན་སངས་རྒྱས་རྙེད་པ་དཀའ། ཧྲིས་པ་གྱེད་མེད་ཀྱི་ཞལ་ནས། འཁོར་བ་ལ་ཞེན་པའི་སེམས་ཅན་རྣམས། མ་རིག་པའི་ལིང་ཏོག་གིས་ཁེབས་པར་མཐོང་། གཏི་མུག་གི་འོབས་སུ་ལྷུང་པ་མཐོང་། འདོད་ཆགས་ཀྱི་མེ་ཆེན་འབར་བ་མཐོང་། ཞེ་སྡང་གི་དུག་གིས་གཟིར་བ་མཐོང་། ངན་སོང་གནས་སུ་རྟག་ཏུ་འཁྱམས་པ་མཐོང་། འཁོར་བའི་བདེ་བ་མ་སྒྲུབ་པར་ཕྱི་མའི་ལམ་གཅིག་ད་རེས་ཚོལ། ཅེས་གསུངས་སོ། དམུ་ཚ་གྱེར་མེད་ཀྱི་ཞལ་ནས། སངས་རྒྱས་བསྒྲུབ་པར་འདོད་ན། བླ་མ་དང་སློབ་དཔོན་རྟག་ཏུ་བསྒོམ། བྱིན་རླབས་དང་ནུས་པ་འདོད་ན། ཡི་དམ་གྱི་བཟླས་བརྗོད་རྒྱུན་དུ་བྱ། འཁོར་བ་ལས་ཐར་པར་འདོད་ན། འཁོར་དང་ཉེ་འབྲེལ་སྤོངས། ཞེས་གསུངས། དམུ་ཚ་ར་སངས་ཀྱི་ཞལ་ནས། ཡང་དག་ཐར་པའི་བོན་སྤྱོད་ན། ཞེན་ཆགས་ནམ་མཁའ་ལྟ་བུར་དག་པ་བྱ། གཉིད་ཀྱི་དགྲ་བཞོམ་ངག་གི་སྨྲ་བ་འཁྲུལ་པ་སྤོངས། སྙིང་རྗེ་ལམ་དུ་བླང་ལ་སྦྱིན་པ་རྒྱུན་དུ་ཐོངས། ཞེས་གསུངས། བླ་དྲན་པའི་ཞལ་ནས། དངོས་གྲུབ་ཐམས་ཅད་བླ་མ་ལས་འབྱུང་བས། དཔོན་གསས་འབྲལ་མེད་དུ་བསྒོམ། བོན་ཉིད་ཀྱི་དོན་ཚོལ་ན་རང་སེམས་ཀྱིས་མ་ཁྲེལ་བར་གྱིས། འཁོར་བ་ལས་ལྡོག་པར་འདོད་ན་དབེན་པའི་གནས་སུ་འགྲོ། འཁྲུལ་པའི་རྗེས་སུ་འབྲེང་ན་འཁོར་བའི་འདམ་ལས་ཐོན་དུས་མི་ཡོང་གསུངས། ཡང་བླ་དྲན་པས་གསུངས་པ། འཁོར་བ་ལ་ཞེན་ལོག་པས་སྐྱུག་ནད་ཅན་ཟས་མཐོང་བ་འདྲ་བ་གཅིག་དགོས། འཇིག་རྟེན་གྱི་གཡེངས་པས་འཇིགས་པ་སྨྱོན་པ་གཡང་ས་མཐོང་བ་འདྲ་བ་གཅིག་དགོས། སྐྱེ་བས་འཇིགས་པ་མི་ཤ་བོས་དེད་པ་འདྲ་བ་གཅིག་དགོས། འཆི་བས་འཇིགས་པ་བྱག་པས་རྟུགས་པ་འདྲ་བ་གཅིག་དགོས། རྒྱུ་འབྲས་ལ་ཡིད་ཆེས་པ་བླ་མ་དང་ཕ་མའི་ཕྱིར་ཡང་སྡིག་ལ་འཛེམས་པ་གཅིག་དགོས། ཡང་བླ་དྲན་པས་གསུངས་པ། ཐར་པའི་འབྲས་བུ་བསྒྲུབ་པ་ལ་དཔོན་གསས་གཙོ་ཆེ་བས། དུག་སྦྲུལ་ལྟ་བུ་བླ་མ་་ལོག་པ་སྟོན་པ་མི་བརྟེན། ཤིང་སྐམ་པོ་ལྟ་བུ་བླ་མ་འབྲས་བུ་མི་རྙེད་པས་དཔོན་གསས་མི་བརྟེན། གཡོ་སྒྱུ་ཟོལ་ལ་མཁས་པ་ཟོག་ཅན་གྱི་བླ་མ་སྤང་བར་བྱའོ། དགོས་འདོད་འབྱུང་བའི་ནོར་བུ་ལྟ་བུའི་དཔོན་གསས་བཙལ་ལ་བརྟེན། མ་རྨོངས་ཀུན་ལ་མཁས་པའི་བླ་མ། བཀའ་རྒྱུད་ལུང་ཁྲོལ་མན་ངག་ཡོད་པ་བརྟེན། ཐར་ལམ་སྒྲོན་མེད་འདེགས་པའི་བླ་མ། རིགས་བཟང་ཁུང་བཙུན་དབང་རྒྱུད་ཡོད་པ་བཙལ་ལ་བརྟེན། ཕྱལ་པ་ཧ་སངས་འཇུར་ནུས་(འཛུར་བུས་)བཅིངས་པ་དང་། རིགས་ངན་ཁུངས་མེད་སྙན་བརྒྱུད་ཆད་པའི་དཔོན་གསས་སྤང་བར་བྱ། བླ་མ་དཔོན་གསས་མཚན་ཉིད་ལྡན་པ་ནི། བརྒྱུད་ཁུངས་བཙུན་རིགས་གཟི་བྱིན་བསོད་ནམས་ཅན་གྱི་བླ་མ་དང། རྒྱུད་ལུང་མགོ་འགྲོངས་མན་ངག་འདེབས་ཚ། འགྲོ་བ་འདྲེན་པ་ཐུགས་རྗེ་ཅན་གྱི་བླ་མ་དང། བསྙེན་བསྒྲུབ་ལ་བརྩོན་དབང་ཐོབ་ལུང་སྟོན་མཛད་པ་བཀའ་དྲིན་ཅན་གྱི་བླ་མ་དང། གོང་མའི་བརྒྱུད་འཛིན་སྙིང་རྗེ་ཆེ་བ་དང། བཀའ་ལུང་མཁས་པའི་དཔོན་གསས་ནི། གང་དུ་འདུག་ཀྱང་བཀུར་བ་བྱེད། དངོས་གྲུབ་ཐམས་ཅད་བླ་མ་ལས་འབྱུང་བས། དཔོན་གསས་བླ་མ་བརྟེན་པར་བྱ། ཞེས་གསུངས་སོ། ཡང་བླ་ཆེན་དྲན་པ་དང་ཞང་ཞུ་གཙོ་མེན་གཉིས་ཀྱི་མཐུན་པར་ཞལ་ནས། བོན་སྤྱོད་ལ་བྲོད་པ་སྐྱེས་པ། སྐྱེས་བུ་འདོད་པ་ཅན་ནོར་ལ་སེམས་ཞུགས་པ་འདྲ་བ་གཅིག་དགོས། དད་པ་གཏིང་ནས་སྐྱེས་པ་ཆུ་རྡོལ་བ་འདྲ་བ་གཅིག་དགོས། འཁོར་བ་ལ་འབྲོས་པ་བ་ཐག་བཅད་པ་འདྲ་བ་གཅིག་དགོས། ཉམས་སུ་ལེན་པ་སྒེག་མོའི་ལྟ་བ་འདྲ་བ་གཅིག་དགོས། བརྩོན་འགྲུས་ཆེ་བ་སྒེག་མོའི་བྱད་ལ་མི་གཙང་འགོས་ནས་ཕྱི་བ་འདྲ་བ་གཅིག་དགོས། གཡུང་དྲུང་ཐར་པའི་འབྲས་བུ་སྒྲུབ་པར་བྱེད་པ་ལ། འདུས་བྱས་མི་རྟག་པར་ཤེས་དགོས། སྣང་ཚད་ཀུན་རྫོབ་ཏུ་གོ་དགོས། གྲགས་ཚད་སྒྱུ་མར་ཤེས་དགོས། ཟས་ནོར་སྒྱུ་མར་མཐོང་དགོས། ཕུང་པོ་འཇིགས་པར་ཤེས་དགོས། དེར་མ་ཤེས་ན་འཁོར་བ་ནས་ཐར་པའི་དུས་མི་འོང་། དེར་ཤེས་པས་ཀྱང་མི་ཕན། བོན་ཉིད་སེམས་སུ་འདྲེ་དགོས། རང་རྒྱུད་ཀྱི་ཉོན་མོངས་ཐུལ་དགོས། གཅིག་པུར་ཉམས་སུ་བླང་དགོས། གཅིག་པུར་བསྡད་ཀྱང་མི་ཕན། འགྱུ་བ་རྩད་ནས་བཅད་དགོས། འགྱུ་བའི་སྲོག་རྩ་མ་ཆོད་ན། རང་གཅིག་པུར་བསྡད་ཀྱང་གཡེང་བའི་རྒྱུ། རི་དྭགས་མཐའ་ལ་ཚུད་པ་འདྲ། ཚེ་འདིའི་བྱ་བ་མ་བཏང་ན། ཕྱི་མ་བསྒྲུབ་པ་ཁ་སྐད་ཡིན། བོན་ཉིད་དང་སེམས་སུ་མ་འདྲེས་པར། གཞན་ལ་བཤད་པ་ནེ་ཙོ་ཡིན། རང་རྒྱུད་རྩད་ནས་མ་ཐུལ་བས། གྲུབ་མཐའ་སྐྱོང་པ་ཕྲག་དོག་ཡིན། སེམས་ཀྱི་འགྱུ་བ་མ་ཆོད་པས། རི་ལ་བསྒོམ་པ་ཕྱི་བ་ཉལ་བ་འདྲ། ཉོན་མོངས་རང་ལ་བཞག་ནས་ཁ་སྐོས་གཞན་བྱེད་ན་ཟོལ་པ་ཡིན། ཁ་ལྟ་སྟོང་པ་ཕྱི་རུ་ཁྱེར་བས་གཡོ་རྒྱུ་ཁྲམ་ཟོལ་བྱེད་པ་ངན་པ་ཡིན། ཕྱི་མ་མི་དྲན་ཚེ་འདིའི་ཁེ་གྲགས་བསྒྲུབས་པ་གླེན་པ་ཡིན། ཚེ་འདིར་ཇི་ལྟར་བྱས་ཀྱང་ཕྱིད་པས་ན། གཡོ་སྒྱུ་མི་བྱ་རང་སེམས་དཔང་དུ་གཟུང་། ཅི་ཕྱིར་རང་ལ་རང་གིས་བརྔན་མི་བྱ། ཕ་རོལ་འགྲོ་བ་བསགས་པའི་ནོར་ནི་ཤུལ་དུ་ལུས། བུ་དང་འཁོར་དང་ཁང་ཁྱིམ་དེ་འདྲ་སྟེ། རིག་པ་དབང་མེད་གཤེད་མས་གར་མི་གཏོང། བར་དོའི་གནས་སུ་རང་ཉིད་གཅིག་པུར་འཁྱམས། དེ་ཚེ་འཇིགས་བསྐྲག་བསྔངས་ཡང་སྐྱོབས་པའི་མགོན་བྱེད་མེད། ལུས་སེམས་བྲལ་བས་སྡུག་བསྔལ་བྱ་སྒྲོ་རླུང་ཁྱེར་འདྲ། དེ་བས་ངན་སོང་གནས་གསུམ་སྡུག་བསྔལ་ཆེ། ཐར་པའི་དུས་མེད་ཚེ་ཟད་བསྐལ་པར་སྦྱང་། སྐྱེ་འཆི་ངན་སོང་གནས་ལས་ཐར་གྱུར་ཀྱང་། མི་དང་ལྷ་མེན་གནས་སུ་ཡང་འཕོ་འགྱུར་འཐབ་བརྩོད་སྡུག་བསྔལ་སྦྱང་། འཁོར་བའི་གནས་འདི་ཤིན་ཏུ་ཐོན་པ་དཀའ། དགྲ་ལ་རང་དགའ་དགྲ་བོ་སུ་ཡིས་བཟློག མཚོ་ལ་མེ་ཤོར་གསོད་པའི་ཆུ་བོ་མེད། བོན་ལ་བློ་ལོག་ཐར་ལམ་གཞན་ན་མེད། དེས་འཁོར་བའི་གཡང་ས་དྲན་བྱས་ཏེ། སྐྱབས་མགོན་དུས་གསུམ་བདེར་གཤེགས་བཙལ། བཟླས་བརྗོད་སྙིང་པོ་ཡི་དམ་རྒྱུན་དུ་བསྒོམ། ཅི་ཕྱིར་བཟླས་བརྗོད་སྙིང་པོའི་འོད་ཟེར་གྱིས། གདུང་བར་གྱུར་ན་སྡིག་སྒྲིབ་གང་ཡང་འཇུ། བདག་ཉིད་ཡི་དམ་ལྷ་སྐུ་བསྒོམ་གྱུར་ཀྱང་། བསོད་ནམས་ཚོགས་ནི་ཀུན་རྫོགས་པར་འགྱུར། དེ་ཉིད་ཆུ་ཟླའི་ཚུལ་དུ་ཤེས་གྱུར་ན། ཡེ་ཤེས་ཚོགས་ནི་རབ་ཏུ་རྫོགས་པར་འགྱུར། དམིགས་མེད་ངང་དུ་རྒྱས་ཐེབས་ན། མཐར་ཐུག་འབྲས་བུ་གཡུང་དྲུང་ཐོབ། ཅེས་གསུངས་སོ། ཞང་ཞུང་གཙོ་མེན་གྱིས་གསུངས་པ། འབྲས་བུ་གཡུང་དྲུང་བསྒྲུབ་འདོད་ན། རང་སེམས་རྣམ་དག་གཙོ་རུ་ལོངས། ཟས་ནོར་སྒྱུ་མ་ཡིན་གྱི་སྦྱིན་པར་མཐོང། འབྲས་བུ་བོན་སྐུ་འདོད་ན་བླ་མ་བརྟེན། དངོས་གྲུབ་བྱིན་རླབས་འདོད་ན་བཟླས་བརྗོད་གྱིས། འགྲོ་དོན་སེམས་ལ་དྲན་ན་སྙིང་རྗེ་རྒྱུན་དུ་བསྐྱེད། ཅེས་གསུངས་སོ། ཡང་བླ་དྲན་པས་གསུངས་པ། ཕྱི་རབས་དུས་ཀྱི་དགེ་བྱེད་རྣམས། གསོན་དང་དགོན་གཞི་ཡིད་དགར་བཟུང་། ངལ་དུབ་ཀྱི་ལས་ལ་ཐུག་པ་མེད། འབྲས་བུ་བརྩོད་པའི་རྒྱུ་རུ་འགྱུར། གནས་དགོན་བརྟེན་པ་ཚི་རེ་ཆད། གཅིག་པུར་དབེན་སར་བསྡད་ན་ལེགས། ཕྱི་མའི་དགེ་བྱེད་རྣམས། ཟས་དང་ལོངས་སྤྱོད་ནོར་འདོད་པས། ངོ་དགའི་ཁ་ལན་འཇལ་འཇལ་ནས། འབྲས་བུ་ཐོས་བསམ་བསྒོམ་གསུམ་ཤོར། ཏིང་འཛིན་རྩེ་གཅིག་ཉམས་མྱོང་ཡལ། རང་ཉིད་འཁོར་བར་ལྟུང་འགྱུར་བས། ཁ་ལན་ཡི་དམ་མཆོད་ན་ལེགས། ཕྱི་མའི་སེམས་ཅན་འཁྲུལ་པའི་བློ། སྐྱེ་འཆི་ལས་ཀྱིས་འབྱུང་བ་ལ། ལེ་ལན་ཡིད་དྭགས་འདྲེ་ལ་འདེད། ཉེས་ཁ་དུད་འགྲོ་ཕྱུགས་ལ་བསྐུར། ལྟ་བ་ལོག་པ་ཡི་རེ་མུག ཕྱི་མའི་གང་ཟག་འཁྲུལ་པའི་བློ། བསོད་ནམས་བསྒྲུབ་ཕྱིར་འཁོར་གཡོག་བསྡུ། སྙིགས་མའི་སེམས་ཅན་སྐྱོན་ལ་རྟོག དགེ་བ་སྤྱད་ཀྱང་དམྱལ་བར་ལྟུང་། འཁོར་གཡོག་བརྟེན་པ་བདུད་ཀྱི་ལས། གཅིག་པུར་གནས་ན་སངས་རྒྱས་ཉེ། ཕྱི་མའི་སེམས་ཅན་འདོད་པས་གདུང་། གནས་དང་དགོན་པའི་ས་བཟུང་ནས། ཐ་མལ་སྐྱེ་བོའི་ངོ་བསྲུང་བྱེད། འབྲས་བུ་རང་དོན་འཆལ་པར་ཤོར། ངོ་བསྲུང་བཟུང་འཛིན་བདུད་ཀྱི་ལས། དབེན་པར་རི་ཁྲོད་འགྲིམ་ན་ལེགས། ཕྱི་མའི་དགེ་བྱེད་ཆགས་སྡང་བྱེད། བརྩོད་ལྡན་དུས་ཀྱི་གནས་དགོན་བཟུང། ཁྲེལ་མེད་ཇག་པ་མཐའ་ནས་ལྷགས། སྲོག་དང་ནོར་ལ་རྔབ་སྡོད་བྱེད། ཉོན་མོངས་ལྔ་དྲགས་ཡིད་འཁྲུགས་ཏེ། སྔགས་དང་འཇིག་རྟེན་ལས་ལ་གཏོས། སྤྱོད་མེད་ལས་བརྩོན་བདུད་ཀྱིས་བསླུས། དགོན་གནས་མི་བརྟེན་གཅིག་པུར་བསྡད། ཕྱི་མའི་དགེ་བྱེད་འཁྲུལ་པའི་བློ། ཐབས་དང་ཤེས་རབ་ཡེ་ཤེས་མ་སྨིན་པར། ཕྱག་རྒྱ་རིགས་མའི་རྟོག་པ་མངོན་དུ་སོང་། འབྲས་བུ་འཁོར་བའི་འདམ་དུ་ཟིན། གཟུངས་མ་ཕྱག་རྒྱ་བདུད་ཀྱི་ལས། བརྩོན་རར་འཆིངས་པ་ཡི་རེ་ཆད། རང་རིག་ཡེ་ཤེས་སྲས་སུ་ཚོལ། ཕྱི་མའི་དགེ་བྱེད་བསོད་ནམས་འདོད། འཁོར་དང་ཟང་ཟིང་གཡོག་ལ་དགའ། ཐེ་རང་བསྒྲུབ་པས་བསོད་ནམས་སློང་། འབྲས་བུ་ཐར་པའི་ལམ་ལ་སྒྲིབ། བསོད་ནམས་བདུད་ཀྱི་བསླུ་བྲིད་ཡིན། ཟང་ཟིང་མ་སྒྲུབ་རི་ཁྲོད་སྡོད། ཕྱི་མ་སྙིགས་མ་དར་དུས་སུ། བོན་ཉིད་ཡང་དག་དོན་དོར་ནས། གཏི་མུག་བག་ཆགས་རྣམ་རྟོག་ལས། མི་རྟག་མཐོང་སྣང་གཉིས་སུ་བཟུང། འཁྲུལ་པའི་སྣང་བ་ངོས་བཟུང་ནས། མངོན་ཤེས་རྨི་ལམ་མོ་པྲ་བཤད། རྣམ་རྟོག་ཡེ་ཤེས་ངོ་ཡིས་བཟུང། རྨི་ལམ་བདུད་ཀྱི་ཆོ་འཕྲུལ་ཡིན། ཡང་དག་མཆོག་གི་དངོས་གྲུབ་སྟེ། འཐོབ་བྱ་འཐོབ་བྱེད་བྲལ་བ་ལ། ཐུན་མོང་དངོས་གྲུབ་འཕྲ་མོ་ཡིས། ང་རྒྱལ་རང་ཆེ་འབྲས་བུ་སྨིན། འཕྲ་མོའི་དངོས་གྲུབ་བདུད་ཀྱི་ཆོ་འཕྲུལ་ཡིན། ཞེ་འདོད་མེད་པ་གཡུང་དྲུང་བོན་ཉིད་བསྒྲུབ། སྙིགས་མའི་སེམས་ཅན་འཁྲུལ་བའི་བློ། རང་མ་སྨིན་པར་འགྲོ་དོན་བརྩོམ། འགྲོ་ལ་མི་ཕན་བདག་ལ་གནོད། འབྲས་བུ་གཉིས་དོན་ཡལ་བར་ཤོར། རང་བཞིན་བསླུ་བ་ཉོན་མོངས་པས། བྱིས་སྦས་བྱིས་སྦ་བསླུ་བ་འདྲ། སྙིགས་མའི་སེམས་ཅན་འཁྲུལ་པའི་བློ། སྟོང་ཉིད་བལྟས་ཤིང་སྟོང་ཉིད་བསྒོམ། ཡང་དག་ལྟ་བ་ཁྱད་དུ་བསོད། ཁ་ལྟའི་བསྒོམ་ཆེན་ཐང་རེ་ཆད། འབྲས་བུ་མནར་མེད་དམྱལ་བར་ལྟུང་། སྟོང་ཉིད་ཉམས་སུ་མ་བླང་རང་རེ་བསླུ། ཕྱི་མའི་སེམས་ཅན་འཁྲུལ་པའི་བློ། ཟབ་མོའི་གསང་གཏམ་ཁྲོམ་དུ་བཤད། ངོ་མཚར་བསྒྲགས་ཤིང་གསང་གཏམ་ཉམས། ཡིད་རློམ་སྒྲོ་དང་བསྐུར་པ་འབྱུང། སྙན་གྲགས་བདུད་ཀྱི་ལས་ལ་སྦྱོར། གསང་གཏམ་མི་སྒྲག་རང་ཉིད་བསྒྲུབ། སྙིགས་མའི་སེམས་ཅན་འཁྲུལ་པའི་བློ། བསོད་ནམས་སྙན་གྲགས་བཟང་ཚུལ་བསྟན། དད་རྫས་ཞེ་འདོད་བརྐམ་པས་ཟོས། ལྕགས་ཀྱི་ཐུ་ལུམ་རབ་ཏུ་འབར། སྐྲན་དང་དམུ་ཆུ་བསྐལ་པར་སྦྱོང། དད་ཟས་ཟ་བ་བདུད་ཀྱིས་བསླུས། རོ་སྙོམས་བསོད་སྙོམས་བྱས་ན་བདེ། ཕྱི་མའི་སེམས་ཅན་འཁྲུལ་པའི་བློ། ལྟོ་དང་རྒྱབ་ལ་ཀུན་ཏུ་བརྟག ཟས་དང་ནོར་ཕྱིར་དགེ་སྡིག་འདྲེས། ཡིད་སེམས་ཡིད་དྭགས་གནས་སུ་གོལ། ཏིང་འཛིན་བཅུད་ལེན་མ་བརྟེན་པས། འབྲས་བུ་འདོད་ཆགས་འཁོར་བར་འཁྱམས། ཐར་ལམ་གཡུང་དྲུང་བསྒྲུབ་འདོད་པ། གང་ལ་མི་ཆགས་ཞེན་མི་བྱ། རིག་པ་དངོས་མེད་བརྩོན་དུ་བཟུང་། བཟུང་རྒྱུ་མེད་པའི་ངང་ལ་བལྟ། བལྟས་པས་གཟུང་ཡུལ་དབྱིབས་དང་བྲལ། དེ་ཉིད་གཡུང་དྲུང་འབྲས་བུ་ཡིན། ཅེས་གསུངས་སོ། དྲང་དོན་མང་དུ་གསུངས་ཀྱང། བསྡུས་པ་འཕྲིག་ཡིག་ཕྱི་རབས་དོན་དུ་གདམས་པ། ་་་་་་་་་་་་ དགེའོ། སྨར་རོ།
ཁོག་དབུབ་ལོ་རྒྱུས་དྲང་དོན་ནི། དབྱིལ་གྱི་ཞལ་བཟང་བྲག་ལ་རྙེད་པ་དེ་ལས་ཞལ་བཤུས། མཚན་ལྡན་གཡུང་དྲུང་བློ་གྲོས་ལ། ལས་དང་སྐལ་པར་ལྡན་པ་བདག་གིས་ཞུས། དཔག་མེད་འགྲོ་བའི་དོན་ནུས་ཤོག འདིའི་ཤོག་སེར་ལ་ཞེང་ཆག་གང་། དཀྱུས་སུ་མཐོ་བཞི་ཡིག་འཕྲེང་སུམ་བརྒྱ་བཞི་བཅུ་ཞེ་གཉིས་ཡོད་པའི་བུ་ལ་དག་པར་བཏུགས་སོ།། བཀྲ་ཤིས་སོ།།
རིག་འཛིན་འདུས་པའི་འཕྲིན་ཡིག་ངེས་དོན་དགོངས་ཉམས་གནད་ཀྱི་མན་ངག་བཞུགས་སོ།།
༄༅་། མཁྱེན་བརྩེ་ཀུན་བཟང་སྐུ་ལ་དུན་གུ་ཧྲུན། དཔོན་གསས་བླ་མ་རྣམས་ཀྱི་ཐུགས་དགོངས། མ་ངག་དུ་དྲིལ་བ་འདི་ལ། དགོངས་ལྟངས་གསུམ་སྟེ། ལྟ་སྒོམ་འབྲས་བུའོ། དང་པོ་ཀུན་གཞི་མ་བཅོས་པའི་ཀློང་ནས། ཀུན་ཏུ་བཟང་པོས་ཏིང་ངེ་འཛིན་གྱིས་འཆི་མེད་གཙུག་ཕུད་ལ་བསྟན། འཆི་མེད་གཙུག་ཕུད་ཀྱིས་དོན་གོ་སྟེ་ལྟ་བའི་ལྟངས་ཕུལ་བ་ནི། ཨེ་མ་ཧོ། གཡུང་དྲུང་བོན་ཉིད་ལྟ་བའི་དོན། ནམ་མཁའ་དག་པའི་ངོས་དང་འདྲ། གར་ཡང་མ་གཡོས་དྲི་མ་བྲལ། འདི་ལ་སུས་ཀྱང་བཅོས་སུ་མེད། དེ་འདྲའི་སེམས་ཉིད་འདི། འགྱུར་བ་མེད་པའི་བོན་ཉིད་དེ། ཀུན་གཞི་མ་བཅོས་བྱང་ཆུབ་སེམས། གཟུང་འཛིན་རྣམ་རྟོག་ཡུལ་ལས་འདས། སྣང་བའི་གཟུགས་མེད་བྱང་ཆུབ་སེམས། ཅི་ལ་ཡང་མི་བཟུང་མི་སྤྱད། རྟོག་པས་མི་བཟུང་ཞིང་། སེམས་ཀྱི་རང་བཞིན་བསམ་མེད་ནམ་མཁའ་འདྲ། མ་ཡེངས་མ་བསླད་བཅོས་པ་མེད་པར་བཞག བསྒོམ་དུ་མེད་པའི་བོན་ཉིད་དབྱིངས་ཆེན་ལས། བསམ་དུ་མེད་པའི་རིག་པ་མ་ཡེངས་ཞོག དེ་ལ་བསྒོམ་དུ་རྡུལ་ཡང་མེད་པར་ཁུམས། ཞེས་གསུངས་སོ། འཕྲུལ་གཤེན་སྣང་ལྡན་གྱིས་གསུངས་པ། ཀུན་གཞི་ཡེ་ནས་མ་བཅོས་ཏེ། རང་རིག་རྟོག་པས་བཟུང་འགྱུར་འཁྲུལ། འཁྲུལ་པ་ངོ་ཤེས་བསྒོམ་རྒྱུ་མེད། མེད་པ་མ་ཡིན་དེ་ཉིད་བསྒོམ། འབྲས་བུ་གོམས་པ་མངོན་འགྱུར་ཡིན། ཅེས་གསུངས། ཡུམ་བཟང་ཟ་རིང་བཙུན་གྱི་ཞལ་ནས། ཀུན་གཞི་ཡེ་ནས་མ་བཅོས་བོན་ཉིད་དབྱིངས། གསལ་ལ་རྟོག་པ་མེད་པ་ནི། རང་འབྱུང་ཡེ་ཤེས་མཁའ་འདྲ་མཉམ་པ་ཆེན་པོའི་ངང་། ཚིག་དང་ཡི་གེའི་སྒྲ་ལས་འདས་པ་ཀུན་ཏུ་བཟང། དེ་ཉིད་གཤེན་ལྷ་འོད་དཀར་ཀློང་ཆེན་ཡིན། ཅེས་གསུངས་སོ། གཤེན་གསང་བ་འདུས་པའི་ཞལ་ནས། བདག་ཉིད་གཤེན་ལྷ་འོད་དཀར་དང། གཉིས་སུ་མེད་པར་ཤེས་འགྱུར་ན། སེམས་དང་བོན་ཉིད་མཉམ་ཞིང་དབྱེར་མེད་ལ། ལུས་ངག་ཡིད་གསུམ་མཚན་མ་ཅི་བསླད་ཀྱང་། བོན་ཉིད་བྱང་ཆུབ་སེམས་ལས་འགྱུར་བ་མེད། རྣམ་རྟོག་མ་སྤངས་ཀུན་གཞི་བྱང་ཆུབ་སེམས། མ་བཅོས་ངང་དུ་བཞག་པ་ལས། བསྒོམ་པ་གུད་ན་མེད་པར་ཁུམས། བདག་ཉིད་ཀུན་བཟང་ངང་དུ་ཤེས་པ་ན། སྒྱུ་མའི་ཕུང་པོ་ད་ལྟ་བསྙིལ་བའི་ཕྱིར། འབྲས་བུ་ཀུན་བཟང་ཐུགས་ཀྱི་འོད་ཟེར་བདག་ལ་ཤར། སྟག་ལྷ་མེ་འབར་གྱི་ཞལ་ནས། བདག་ཉིད་རྒྱུད་ལ་ཡོད་པའི་བག་ཆགས་བསྲེག་འདོད་ན། བསྐྱེད་རྫོགས་གཉིས་པོ་ཟུང་དུ་བསྒོམ། དེ་ཉིད་རྟོག་པས་མི་བཅིངས་ངང་དུ་བཞག ཡེ་ཤེས་ལྔའི་མེ་ཆེན་གྱིས་དུག་ལྔའི་ས་བོན་དབྱིངས་སུ་འཚིག འབྲས་བུ་དབྱིངས་ཀྱི་ལྷ་དང་མཉམ། ཡོངས་སུ་དག་པའི་ཞལ་ནས། བོན་ཉིད་འདི་བཅོས་བསླད་བྲལ་བ་ལ། ཀུན་གཞི་མ་བཅོས་ཡེ་ནས་བྱང་ཆུབ་གཡུང་དྲུང་ཀློང་། དེ་ཉིད་རིག་པའི་རང་བཞིན་སེམས། རྒྱུ་དང་རྐྱེན་གྱིས་མ་བསྐྱེད་འཇིགས་བྲལ་མེད། རང་བཞན་ལྷུན་གྱིས་གྲུབ་པའི་ཀུན་ཏུ་བཟང་། བཟུང་འཛིན་ཡུལ་ལས་འདས་པའི་སྤྲོས་དང་བྲལ། དེའི་ངང་ལ་མ་བཅོས་བཞག་པ་ཡིས། བསྒོམ་པའི་རྒྱལ་པོ་ཆེན་པོ་སྟེ། ཀུན་ཏུ་བཟང་པོའི་དགོངས་པའོ། ཞེས་གསུངས་སོ། མི་ལུས་བསམ་ལེགས་ཀྱི་ཞལ་ནས། རང་རིག་སྙིང་པོ་བྱང་ཆུབ་སེམས། རྟོག་མེད་མཉམ་པའི་ཀློང་ཡངས་སུ། རང་འབྱུང་རིག་པ་ཡེ་ཤེས་ནི། མ་བསླད་མ་ཡེངས་བཞག་པ་ནི། ཀུན་བཟང་ངང་གིས་བསྒོམ་པ་སྟེ། བདག་གིས་བསྒོམ་པ་འདི་ལས་མེད་པར་འཇལ། སྒྱུ་མའི་ལུས་འདི་བསྙིལ་བའི་ཕྱིར། ཀུན་བཟང་ཐུགས་ཀྱི་འོད་ཟེར་བདག་ལ་ཤར། ཡེ་ཤེས་སྙིང་པོས་གསུངས་པ། བོན་ཉིད་དབྱིངས་ལ་མཐའ་དང་དབུས་མེད་པའི། ལྟ་བ་ནམ་མཁའ་ལྟ་བུ་མཐའ་དབུས་མེད། སྨྲ་བསམ་ཡུལ་ལས་འདས་པ་ཀུན་བཟང་སྐུ། སྲིད་འབྱུང་སྐྱེ་འགྲོ་རྣམ་རྟོག་དག་བྱས་ནས། དྲི་མ་མེད་པའི་ཡེ་ཤེས་ནི། མ་བཅོས་རྣམ་དག་ཀུན་གཞི་གཡུང་དྲུང་སེམས། མ་བརྩལ་མཉམ་པར་བཞག་ན་བསྒོམ་པའི་མཆོག རིག་པ་བོན་ཉིད་ལ་མ་བཅོས་ན། རྣམ་པར་གྲོལ་བའི་ལམ་མཆོག་གཞན་ན་མེད། ལམ་གྱི་ཐག་ཆོད་འབྲས་བུ་དེ་ཉིད་ཡིན། གསུངས་སོ། གཤེན་སྣང་བ་མདོག་ཅན་གྱི་ཞལ་ནས། སྣང་བ་ཐམས་ཅད་དབྱིངས་ཀྱི་རང་བཞིན་ལ། རིག་པ་འཕོ་འགྱུར་མེད་པར་བསྒམ་པར་བྱ། དབྱིངས་ཉིད་མི་འགྱུར་རིག་པ་མ་བསླད་དེ། མ་ཡེངས་མི་འགྱུར་མཁའ་ལྟར་དག་པ་ལ། མ་ཡེངས་མ་བཅོས་ཡོངས་ཀྱི་གསལ་བ་སྟེ། བསྒོམ་ཞིང་མིང་དུ་བཏགས་པ་ལ། ལོགས་ན་བསྒོམ་རྒྱུ་མེད་པར་གོ རྒྱལ་པོ་མུ་ཁྲི་བཙད་་པོའི་ཞལ་ནས་གསུངས་པ། བོན་ཉིད་བྱང་ཆུབ་སེམས་འདི་རང་ལ་གནས། མ་བཅོས་རང་བཞིན་གསལ་བས་མཁའ་ལྟར་དག རྟོགས་ན་བཟུང་འཛིན་སྲེགས་པའི་མེ། མ་རྟོགས་འཁོར་བའི་འདམ་དུ་འཛིན། གཞན་སྣང་སྒྱུ་མ་རྟོགས་ན་གཟུང་འཛིན་ཡུལ་ལས་འབུད། སྒྱུ་མ་རྩལ་དུ་རིག་པ་མ་ཡེངས་ན། བསྒོམ་པ་ཡིན་པར་བདག་གིས་གོ བདག་ནི་ཕྱི་ནང་བོན་ཀུན་ཀློང་དུ་བསྡུ། སྐྱེ་བ་བརྒྱུད་ནས་རྒྱལ་པོར་བདག་སྐྱེ་སྟེ། ཁོང་ཁྲོ་ང་རྒྱལ་སྐྱེས་གྱུར་ཀྱང་། མངོན་དུ་བྱང་ཆུབ་མཆོག་ཏུ་སེམས་བསྐྱེད་པས། སེམས་དང་བོན་ཉིད་འདྲེས་པའི་འཕྲོ་བླངས་ཏེ། གདོས་པའི་ལུས་འདི་དབྱིངས་སུ་བསྡུ་བའི་ཕྱིར། ཀུན་བཟང་ཐུགས་ཀྱི་འོད་ཟེར་བདག་ལ་ཤར། ཧ་ར་ཅི་པར་གྱིས་གསུངས་པ། བོན་ཉིད་བྱང་ཆུབ་སེམས་ཉིད་འབྱུང་བ་ལྔ་ཡང་ཡིན། མ་བཅོས་རང་བཞིན་གསལ་བས་མཁའ་ལྟར་དག འགྲོ་བས་གཟུང་འཛིན་སྒྲགས་(སྲེགས)པས་མེ་ལྟར་འབར། དམིགས་མེད་གདོད་ནས་དག་པས་གཟུང་ཡུལ་མེད་པའི་རླུང་ལྟར་གནས། གཟུང་འཛིན་སྐྱོན་དང་བྲལ་བས་དྭང་རར་འཁྱིལ། ཅིས་ཀྱང་བསྐྱོད་པ་མེད་པས་ཐེག་ཆེན་ས་གཞི་འདྲ། འབྱུང་བ་ལྔ་ཉིད་ཡེ་ནས་བོན་ཉིད་གཡུང་དྲུང་ཀློང་། གདོད་ནས་ཡེ་དག་ནམ་མཁའ་ལྟ་བུ་ལ། དམིགས་པ་མེད་པར་མ་ཡེངས་གནས་པ་སྟེ། བསྒོམ་པ་ཙམ་དུ་མིང་བཏགས་པས། བསྒོམ་པ་འདི་ལས་ལྷག་པ་མེད་པར་གོ སྟག་ཝེར་ལི་ཝེར་གྱི་ཞལ་ནས། མ་བཅོས་སེམས་ཉིད་ལྟ་བ་ན། ཡུལ་བྲལ་བྱང་ཆུབ་སེམས་ལ་བལྟ། བལྟས་པས་གཟུགས་མེད་ཡོངས་ལ་གསལ་བར་སྣང། དབྱིབས་དང་ཁ་དོག་བྲལ་བའི་རང་བཞིན་ལས། སུས་ཀྱང་བཅོས་སུ་མེད་དེ་དཔྱད་དུ་མེད། རིག་པ་རྟེན་དང་བྲལ་བ་ལ། ཉམས་སུ་བླང་ཞིང་བསྒོམ་པར་བྱ། བསྒོམ་དུ་ཡོད་མེད་རང་རིག་ཡིན། ཇི་ལྟར་བསླད་ཀྱང་དབྱིངས་ལ་འགྱུར་བ་མེད། དབྱིངས་ཉིད་རིག་པས་མ་བཙལ་ཏེ། བཙལ་ཀྱང་དངོས་པོ་སུ་ཡིས་རྙེད། མ་རྙེད་པ་དེ་འབྲས་བུ་ཡིན། ཞང་ཞུང་ཨ་ནུ་འཕྲག་ཐག་གི་ཞལ་ནས། བོན་ཉིད་འདི་ལ་སུས་འཆོས་པ། ཁྱི་རྒན་ནམ་མཁའ་སྙོབ་པའམ། བྱ་ཕྲན་ནམ་འཕང་སྤྱོད་དང་མཚུངས། དེ་ཕྱིར་མ་བཅོས་ངང་ལ་བལྟ། ངང་ནི་བསྒོམ་པ་ཡེ་ཕེབས་ཡིན། བཅོས་ཤིང་བསླད་ན་ཆུ་སྙོགས་བཞིན། མ་རིག་ཉོན་མོངས་དྲི་མ་ལྡངས། མ་བཅོས་རང་བཞིན་མེད་པ་ལ། བསྒོམ་ཞེས་མིང་ཙམ་བཏགས་པའོ། སད་ནེ་གའུའི་ཞལ་ནས། ཨེ་མ་ཧོ་བོན་ཉིད་ངང་ལ་རྟོག་པའི་དྲི་མ་བྲལ། རྟོག་པ་མེད་ན་རང་འབྱུང་ངང་། དེ་ལ་རྩོལ་ཞིང་གཉེན་པོས་བཅོས་སུ་མེད། མ་བཅོས་ངང་ཙམ་དུ་བསྒོམ་པ་སྟེ། སེམས་ཀྱི་རང་བཞིན་རྟོགས་པ་ཡིན། བརྟག་གཟུང་ཡུལ་དང་ཁ་དོག་བྲལ། དེ་ཕྱིར་སེམས་ཉིད་མ་བསྟན་པར་ཀྱང་མཐོང་མི་འགྱུར། བསྟན་ཀྱང་ངོས་བཟུང་ཡུལ་དང་བྲལ། ད་མི་དད་ཀེའི་ཞལ་ནས། རིག་པའི་སྙིང་པོ་རང་ཉིད་སེམས། སེམས་ལས་སངས་རྒྱས་ལོགས་ན་མེད། འདི་ཉིད་འཚོལ་བ་སུ་ཡིན་པ། བཙལ་བས་རྙེད་པར་མི་འགྱུར་ཏེ། སེམས་ལས་སངས་རྒྱས་གཞན་མ་ཡིན། སེམས་ཉིད་མ་བཅོས་བཞག་ན་སངས་རྒྱས་ཡིན། ཅེས་གསུངས་སོ། ཤད་པུ་ར་ཁུག་གི་ཞལ་ནས། གདོད་ནས་ཡོད་པའི་སྙིང་པོ་སེམས། རང་ལས་མ་ཡིན་གཞན་ལས་གྲོལ་མི་འགྱུར། གྲོལ་བར་འདོད་ན་རང་རིག་སེམས་ལ་བལྟ། རྩེ་གཅིག་མ་ཡེངས་ངང་ལ་གནས་བྱས་ནས། སངས་རྒྱས་དགོངས་པ་འདི་ལས་མེད་པར་གོ ཟིངས་པ་མཐུ་ཆེན་གྱིས་ཞལ་ནས། རིག་པའི་སྙིང་པོ་ཆོ་འཕྲུལ་ཆེ། བྱར་མེད་ངང་ལ་ཡེངས་མེད་སྒོམ། ཡེངས་མེད་རིག་པ་མ་གཅུན་ན། ཀུན་གཞིའི་ངང་ནས་ཆོ་འཕྲུལ་ཤར་དུས་ངོ་ཡིས་མ་ཟིན་ན། རང་དགའ་སྤྱོད་པ་རློམ་སེམས་སྐྱེ། དེ་ཕྱིར་མ་བཅོས་གསལ་བ་ལ། རྣམ་རྟོག་ངོ་བོ་བསྒོམ་པའོ། སྤེ་བོན་ཐོག་འཕྲུལ་གྱི་ཞལ་ནས། ཨེ་མ་ཧོ། ཀུན་གཞི་ཡངས་པ་ཀློང་ཆེན་ལས། འགྲོ་བ་ཡོངས་ལ་བོན་ཉིད་ཉི་མ་བདལ། ཀུན་ལ་ཁྱབ་བདལ་ཤར་བ་ནི། ཤར་བའི་དུས་ནས་ནུབ་པ་མེད། ཤར་ནས་མ་བཅོས་གསལ་བ་ལ། བལྟས་ན་རང་རིག་སྙིང་པོ་གསལ། རང་བཞིན་སྟོང་ལ་ངོ་བོ་གྲུབ་པ་མེད། ནམ་མཁའི་དབྱིངས་སུ་མདུང་བསྐོར་བཞིན། སེམས་ཉིད་ཀློང་དུ་ཐོགས་རྡུགས་མེད། སྤེ་བོན་ཐོག་རྩེའི་ཞལ་ནས། ཀུན་གཞི་དག་པའི་ནམ་མཁའ་ལ། རིག་པའི་སྙིང་པོ་ཁོང་ནས་ཤར། མ་བཅོས་གསལ་བའི་ངང་ལ་བཞག བསྒོམ་དུ་འདི་ལས་མེད་པར་གོ འབྲས་བུ་རྟོག་མེད་རང་ལས་གྲོལ། མྱོང་ན་སེམས་ཀྱི་བདུད་རྩི་མྱོང། བལྟ་ན་རིག་པའི་སྙིང་པོ་ལྟོས། ང་དང་གཞན་གྱི་འཛིན་པ་ཁྲོལ། ཅེས་གསུངས་སོ། སྟོང་རྒྱུང་གི་ཞལ་ནས། ཨེ་མ་ཧོ། བྱང་ཆུབ་སེམས་ནི་ནམ་མཁའ་ལྟ་བུའི་ཀློང་། གསལ་ལ་རྟོག་པ་མེད་པའི་ཡེ་ཤེས་ཡིན། ཕྱི་ནང་མེད་པར་ཀུན་ལ་གསལ་བར་གནས། རིག་པ་གདོད་ནས་དག་པ་ནམ་མཁའི་ཀློང་འདྲ་ལ། རྣམ་རྟོག་རྩལ་ཤར་སེམས་ཀྱི་གྲོགས་སུ་བཟུང་ནས། སྐྱེ་འཆི་སྤངས་ཏེ་རང་བཞིན་སྟོང་པར་ལྟ། སེམས་ཀྱི་སྙིང་པོ་དེ་ཉིད་ལ། སངས་རྒྱས་དགོངས་པ་ཡིན་པར་གོ ཞེས་གསུངས་སོ། ངམ་པ་ལྕེ་རིང་གི་ཞལ་ནས། གཞི་འདི་ཀུན་གཞིའི་འབྱུང་གནས་ཏེ། མ་རྟོགས་ལོག་ལྟ་འཁྲུལ་པའི་གྲོགས། རྟོགས་ན་སེམས་ཀྱི་རང་བཞིན་ལ། སེམས་ལས་སངས་རྒྱས་ལོགས་ན་མེད། དྲི་མ་མེད་པ་རང་སོར་བཞག དེ་ཉིད་རིག་པ་གསལ་ལ་འགྱུ། འགྱུ་དུས་ངོས་བཟུང་སྟོང་པའི་ངང་དུ་བསྙལ། སེ་ཤ་རིས་གསུངས་པ། རིག་པའི་སྙིང་པོ་མ་བཅོས་གསལ་བ་ལ། ཕྱིན་ཅི་ལོག་ཏུ་བསླད་ན་འཆལ། མ་བསླད་རང་བཞིན་གསལ་སྟོང་འགྱུ་བ་ལ། ཆོ་འཕྲུལ་འཁྲུལ་པ་ཅི་ཡང་འཆར། ཤར་དུས་འཆར་མཁན་ངོ་ཡིས་བཟུང། སེམས་ལས་མ་གཏོགས་གང་ནས་ཤར། ངོས་ཟིན་མཚན་མའི་གཟུང་ཡུལ་འདས། འདི་ཉིད་བདེར་གཤེགས་དགོངས་པ་ཡིན། ལྡེ་གྱིམ་ཚ་རྨ་ཆུང་གིས་གསུངས་པ། ནམ་མཁའ་དག་པའི་ངོས་དག་ལ། ཉི་ཟླ་གཟའ་སྐར་ཀུན་འཕྱོ་གསལ། ནམ་མཁའ་གདོས་དག་ཡོངས་མི་བསྐྱོད། བྱང་ཆུབ་སེམས་ནི་མཁའ་ལྟར་དག་པ་ལ། མཚན་མའི་རྣམ་རྟོག་སྒྱུ་མ་ཅི་སྣང་ཡང་། རྣམ་དག་སེམས་ཉིད་འདི་ལ་འཕོ་འགྱུར་མེད། འཕོ་འགྱུར་མེད་པའི་དོན་རྟོགས་ན། རྣམ་རྟོག་དེ་ཉིད་རིག་པའི་རྩལ། འདི་ལྟར་སྣང་བ་བོན་སྐུར་གྲོལ། མེ་ཉག་ལྕེ་ཚ་མཁར་བུའི་ཞལ་ནས། བོན་ཉིད་བདལ་ཁྱབ་ཆེན་པོ་ལ། བདེར་གཤེགས་ཐུགས་རྗེ་དགོངས་པ་ཅིར་ཡང་སྟོན། ང་དང་བདག་ཏུ་བཟུང་སྟེ་བདག་གཞན་འབྱེད། བདེར་གཤེགས་བཀའ་ལུང་བསྒོམ་པར་ཁས་བླངས་ནས། གཉིས་འཛིན་ལོག་པར་བསྒོམ་པ་ཐང་རེ་ཆད། དོན་དམ་སྤྲོས་བྲལ་ནམ་མཁའ་ལྟ་བུ་ལ། སྣང་བ་རང་དགར་མི་བཟུང་མཉམ་པའི་ངང་ལ་བཞག རྟོག་པ་གཉིས་འཛིན་བྱང་ཆུབ་སེམས་སུ་གྲོལ། ཞང་ཞུང་ཧྲིས་པས་གསུངས་པ། རྟོག་པ་ནང་ནས་འཆར་གྱི་རང་སེམས་རྟག་ཏུ་རྟོགས། ཕ་རོལ་སྐྱོན་ལ་མ་རྟོག་རང་སྐྱོན་ངོ་ཡིས་བཟུང། བདེར་གཤེགས་ཀུན་གྱི་ཐུགས་བཅུད་ཡིན་གྱིས་ཡི་གེ་ཨ་ལ་ལྟོས། ཨ་ཡི་རང་བཞིན་ཡེ་ནས་དངོས་གཞི་མེད། འཁོར་འདས་ཐམས་ཅད་སྐྱེ་མེད་དེ་བཞིན་ཡིན། ཀུན་བཟང་སྙིང་པོ་ཨ་ལས་འབྱུང་འགྱུར་ཏེ། ཨ་ཡི་དངོས་གཞི་ཡེ་ནས་བྱང་ཆུབ་སེམས། འཕོ་འགྱུར་འདུ་འབྲལ་མེད་པར་རྟོགས་ན་ཀུན་བཟང་སྐུ། སྐྱེ་ཤི་མེད་པར་རྟོགས་ན་འབྲས་བུ་ཡིན། དམུ་ཚ་གྱེར་མེད་ཀྱི་ཞལ་ནས། སྨྲ་བའི་ཡུལ་ལས་འདས་པའི་དོན་བསྒོམ་ན། ཨ་དཀར་སྐྱེ་བ་མེད་པའི་དབྱིངས་ལ་བལྟ། ཨ་ཡི་རང་བཞིན་རིག་པ་གཡུང་དྲུང་སེམས། མ་བཅོས་མ་ཡེངས་མཉམ་པར་བཞག་པ་ལ། བདག་གི་བསྒོམ་པ་འདི་ལས་མེད་པར་གོ ར་སངས་ཁོད་རམ་གྱིས་གསུངས་པ། འཇིག་རྟེན་བློ་ཡིས་སྟོང་ན་ཕ་རོལ་དོན་ཡང་དེ་ཀར་འགྲུབ། སྣང་བ་འཁྲུལ་པར་ཤེས་ན་ཚིག་དང་ཡི་གེའི་བརྗོད་པ་བྲལ། རྟོག་པ་གྲོགས་སུ་ཤར་ན་གཉེན་པོ་བརྟེན་རྒྱུ་མེད། སྣང་བ་ཉིད་སྟོང་པ་སྟེ། སྟོང་པ་ཉིད་ཀྱང་སྣང་བ་སྟེ། ངོ་བོ་གཅིག་ཏུ་མ་ཡེངས་སྒོམས། བསམ་རྒྱུ་རྡུལ་ཙམ་མེད་མོད་ཀྱང་། བརྗོད་བྲལ་ངང་དུ་མ་ཡེངས་ཞོག འདི་ལས་ལྷག་པའི་བསྒོམ་རྒྱུ་མེད་པར་གོ བླ་ཆེན་པོ་ཁོད་སྤུངས་དྲན་པའི་ཞལ་ནས། གང་ཟག་དད་ལྡན་སྐྱེས་བུ་སྐལ་ལྡན་རྣམས། ངོ་མཚན་དོན་ལྡན་ང་ཡི་བཀའ་ལ་ཉོན། ལུས་འདི་མི་རྟག་ཅིས་ཀྱང་འབོར་ངེས་པས། ཐར་པ་གཡུང་དྲུང་འབྲས་བུ་སྒྲུབ་པར་གྱིས། བྱང་ཆུབ་སེམས་ནི་ཡེ་ནས་བོན་ཉིད་ངང་། ནམ་མཁའ་འདྲ་བར་ཀུན་ལ་ཁྱབ་པར་སྣང་། འདི་ལ་བལྟས་ཤིང་བརྟག་པ་ན། སྣང་བའི་རང་བཞིན་སྟོང་པའི་ངང་དུ་ཡལ། སྟོང་པའི་རང་བཞིན་རང་འབྱུང་མ་འགགས་གསལ། འདི་ཉིད་དོན་ལ་གནས་པར་འདོད་པ་ན། ཡེངས་མེད་ངང་ལ་རིག་པ་གནས་པར་བྱ། དེ་ཉིད་བསྒོམ་པར་བརྟག་ན་དེ་ཀས་འཆིང་འགྱུར་པ། བསྒོམ་དྲན་ཙམ་ན་བསྒོམ་རྒྱུ་ཅི་ཡང་མེད། ཅིར་སྣང་ཐམས་ཅད་དེ་ལྟར་ཤེས་ན་བསྒོམ་པའི་མཆོག འཇིག་རྟེན་འདི་ནི་ཀུན་བརྟགས་རང་བཞིན་ཏེ། སྙིང་པོ་གང་ཡང་གྲུབ་པ་མེད། སེམས་འདི་ཅིར་ཡང་འཆར་ལ་བཟུང་དུ་གྲུབ་པ་མེད། མེད་པའི་སྙིང་པོ་ཡོད་པ་སྟེ། འདི་ལ་བསྒོམ་དང་མི་བསྒོམ་གཉིས་ནི་གང་ལ་བྱ། རིག་པ་བརྟེན་དང་ཕྲལ་བ་ལ། རྣམ་རྟོག་གཏད་མེད་བཟུང་བ་འཁྲུལ། འཁྲུལ་ཙམ་ཉིད་ན་འཁྲུལ་པ་གྲོལ། གཞི་རྩ་བཅད་ན་གང་ཡང་བདེ། ཞེས་གསུངས་སོ། ཡང་ཁོད་སྤུངས་ཀྱིས་ཕྱི་རབས་རྣམས་ལ་ངེས་དོན་དུ་གསུངས་པ། ཨེ་མ་ཧོ། གཡུང་དྲུན་བོན་ལ་ལྟོས་པའི་སྐྱེས་བུ་རྣམས། ཡང་དག་དོན་ཉིད་འདི་ལྟར་བསྒོམ་པར་བྱ། སྣང་སྲིད་ཐམས་ཅད་ཡེ་ནས་ཀུན་ཏུ་བཟང་པོའི་ངང་། འདི་ལས་གཞན་མེད་མ་ལུས་སྙིང་པོའི་རྒྱན། སྣང་བ་མཐའ་དག་ཀུན་བཟང་སྐུ་གསུང་ཐུགས། སྐྱེ་མེད་ངང་ལས་མ་ཡེངས་མཉམ་བཞག་པ། བསྒོམ་པར་བྱ་བའི་ཡུལ་ནི་འདི་ལས་མེད་པར་རྟོགས། འདི་ཉིད་དོན་དུ་གོ་ཞིང་རྟོགས་པ་ན། ཚེ་དབང་སྐྱེ་ཤི་མེད་པ་སྟེ། གདོས་བྱས་ལུས་འདི་མི་གཙང་ཡོད་གྱུར་ཀྱང་། སེམས་ནི་ཡེ་ཤེས་ཆེན་པོ་གཡུང་དྲུང་ཡིན་པར་བརྟག་པར་བྱ། དེའི་དུས་ན་བླ་ཆེན་ཁོད་སྤུངས་ལ། ར་སངས་ཁོད་རམ་ལས་སོགས་གཤེན་པོ་རྣམས་དང་། རྒྱུང་ཡར་མུ་ཁོད་ལས་སོགས་ཡབ་དང་ཡུམ་དང་། གྱེར་ཆེན་ཟླ་བ་ལྕེ་ཚ་ལས་སོགས་པ་ཚེ་ལ་དབང་བ་ཀུན་གྱིས་ཞུས་པ། ཁོད་སྤུངས་ཆེན་པོ་ལགས། ཀུན་གྱི་ལྟ་བའི་ཐུག་ས། གཡུང་དྲུང་དོན་རྣམས་ཀུན་གྱི་བདག་ཉིད། ལོ་པཎ་ཆེན་པོ་རྣམས་ཀྱི་ཐུགས་སྲས། བཀའ་རྒྱུད་ཀྱི་ལྡེ་དམིག དྲན་པ་ཉིད་ལགས་པས། ལྟ་བའི་ཕུགས་གང་ལགས། བསྒོམ་པའི་ཕུགས་གང་ལགས། སྤྱོད་པའི་ཕུགས་གང་ལགས། འབྲས་བུའི་ཕུགས་གང་ལགས། དེ་རྣམས་ཀྱི་གོལ་ས་ནི་གང་ལགས། ཞུས་པས། དྲན་པ་ནམ་མཁའི་ཞལ་ནས། དྲན་པ་སེམས་ཀྱི་རྟ་ཕོ་ལ། རིག་པ་ཁྱེའུ་སྐྱོན་ཐབས་བསམ་གྱིས་མི་ཁྱབ། ལྟ་བའི་ཕུགས་རྩ་བྲལ་སྟོང་ཉིད་ལ་ཐུག ལྟ་བ་ལྟར་མེད་ལྟར་སྣང་དུ་བཟུང་ན་གོལ། བསྒོམ་པའི་ཕུགས་མ་བཅོས་ལྷུག་པ་ལ་ཐུག བསྒོམ་ཞི་གནས་གཞི་ཐོག་ཏུ་ལུས་ན་གོལ། (སྤྱོད་པའི་ཕུགས་)སྤྱོད་པ་རང་གསལ་འཛིན་མེད་ལ་བྱ། རང་ཁ་རྒྱ་ཡན་ཐོ་ཆོ་རུ་སྤྱད་ན་གོལ། འབྲས་བུའི་ཕུགས་ཡིད་ཆེས་རེ་དྭོགས་དང་བྲལ་བ་ལ་ཐུག རྩ་བྲལ་སྟོང་པ་འཆར་རྒྱུ་གཅིག་འདོད་ན་གོལ་བ་ཡིན་ནོ། ཧྲིལ་གྱིས་དྲིལ་ན། ཕྱིའི་སྣང་བ་ལ་སྐྱོན་དུ་མི་ལྟ། ནང་གི་རིག་པ་ལ་རྟེན་མི་བཅའ། བདལ་ཁྱབ་ནམ་མཁའ་ལྟ་བུ་རིག་པ་རང་སར་ཅོག་གེར་བཞག འགྱུ་བྱེད་ཀྱི་ཤེས་པ་རྩད་བཅད་པ་གལ་ཆེ་གསུངས། ཡང་ནས་་ཡང་དུ་འདྲིས་པ་གལ་ཆེ་གསུངས། ཉོན་མོངས་ཀྱི་ཆགས་སྡང་མི་འཇིག་ན། ལྟ་སྒོམ་འབྲས་བུ་སྤྱད་པ་ལ་དགོས་རྒྱུ་མེད་དོ། རིག་འཛིན་འདུས་པའི་འཕྲིན་ཡིག་ངེས་དོན་མཐར་ཐུག་བསྟན་པ།། འདིར་ཞང་ཡིག་ཡོད།
ཁོད་སྤུངས་དྲན་པ་དང་དམུ་ཚ་ར་སངས་ཀྱིས་ཕྱི་རབས་དོན་དུ་གུ་གེར་བརྒྱུད། ལས་དང་སྐལ་ལྡན་མ་ཡིན་ཀུན་ལ་གསང་། ་་་་་་་་་་་་་་་་་་་ སྨར་རོ། སླིག་ཙོ།
དགོངས་ཉམས་བཞུགས་སོ།།
༄༅་། དཔོན་གསས་བླ་མ་རྣམས་ལ་ཕྱག་འཚལ་ལོ། རིག་འཛིན་འདུས་པའི་དགོངས་ཉམས་ལ། འཆི་མེད་གཙུག་ཕུད་ཀྱི་ཞལ་ནས། སེམས་ཀྱི་རང་བཞིན་ཡེ་ནས་གསས་མཁར་མཛོད་ཆེན་ལ། གང་ལྟར་བཏགས་པ་དེ་ལྟར་སྣང་བ་ལ། འབྱུང་འཇུག་སྒྱུ་མ་ཐམས་ཅད་མེད་ན་ཀུན་ཏུ་བཟང་པོ་ཡིན། རྟོགས་དུས་གཉིས་སུ་མེད་པའི་རིག་པ་འདི། ཀུན་ཏུ་བཟང་པོ་ངང་གིས་གནས། རིག་པ་དབྱིངས་ལ་མ་བསླད་ན། བསྒོམ་པར་བྱ་བ་འདི་ལས་མེད། མ་རྟོགས་པ་རྣམས་སྙིང་རེ་རྗེ། ཀུན་བརྟགས་འཇའ་ཚོན་འདྲ་བ་མང་གི དེ་ལ་དམ་པར་མ་འཛིན་ཅིག བདག་ཉིད་གྲོལ་བར་འདོད་ན་ཚིག་ལ་མ་ཞེན་དོན་ཉིད་ཚོལ། ཡུམ་བཟང་ཟས་གསུངས་པ། བོན་རྣམས་ཡེ་ནས་མ་བཅོས་ཀུན་ཏུ་བཟང་པོ་ལ། མཚན་མའི་རྣམ་པར་རྟོག་པ་འདིས་བསླད་དེ། རྣམ་རྟོག་དེ་ཉིད་རྟོགས་ན་ཀུན་བཟང་ངང་། རྣམ་རྟོག་རང་འབྱུང་རང་ཞིར་གནས་པ་ལ། བསྒོམ་པ་གཙོ་བོར་བྱ་བ་ཡིན། དེ་ཡང་སེམས་ཀྱི་མེ་ལོང་མ་བལྟས་ན། རྣམ་རྟོག་དྲི་མ་འགོས་པར་འགྱུར། དྲི་མ་དང་བྲལ་རྣམ་རྟོག་བྲལ། གཤེན་གསང་བ་འདུས་པས་གསུངས་པ། བོན་ཉིད་ཡེ་དག་ཡེ་ཤེས་ཆེན་པོ་ལ། ཇི་ལྟར་བསམ་ཀྱང་བསྒོམ་རྒྱུ་མེད། ཇི་ལྟར་སྨྲས་ཀྱང་དཔྱད་རྒྱུ་མེད། འདི་ཉིད་ཡེ་ཤེས་ཆེན་པོའི་དབྱིངས་ཡིན་ཏེ། རྩལ་བ་མེད་པར་ཀུན་བཟང་ཀློང་། བསམ་དུ་མེད་པའི་བོན་ཉིད་ལ། ཡེངས་པ་མེད་པར་མཉམ་པར་བཞག བསྒོམ་དུ་ཅི་ཡང་མེད་པ་ལ། ཡེངས་པ་མེད་པའི་དོན་ལ་ལྟ། སྟག་ལྷ་མེ་འབར་གྱི་ཞལ་ནས། བསྐྱེད་རྫོགས་གཉིས་ཀྱིས་རྟག་ཆད་མཐའ་རྣམས་བསལ། བཟླས་བརྗོད་སྙིང་པོས་རྒྱུད་ཀྱི་ཉོན་མོངས་བསྲེགས། རིག་པ་ཡེ་ཤེས་མདུང་རྩེས་རྣམ་རྟོག་དགྲ་བོ་རྡུལ་དུ་བརླགས། བསྒོམ་བསྒྲུབ་བརྩོན་པར་གྱུར་ན་དུག་ལྔའི་ཁོང་གཅོང་ཐོན་པར་ངེས། དོན་དུ་དྲིལ་ན་དབྱིངས་ཤེས་འདུ་འབྲལ་མེད། དུག་ལྔ་ཡེ་ཤེས་དུག་གསུམ་སྐུ་གསུམ་ཡིན། ཡོངས་སུ་དག་པས་གསུངས་པ། ལྟ་བ་རྟོགས་ན་ཕྱོགས་འཛིན་ཁོང་ནད་གྲོལ། བསྒོམ་པ་གནས་ན་བྱིང་རྨུགས་རང་སར་སངས། འབྲས་བུ་རྟོགས་ན་རེ་ཞིང་དྭོགས་པ་མེད། ལྐུགས་པའི་ཚུལ་དུ་རང་དོན་བསྒྲུབས། མི་ལུས་བསམ་ལེགས་ཀྱིས་གསུངས་པ། སྣང་བ་སྟོང་པར་གོ་ན་འཛིན་པ་རང་སར་གྲོལ། ཐམས་ཅད་མཉམ་པར་ཤེས་ན་སྒྲོ་བསྐུར་གཉིས་དང་བྲལ། སྣང་བ་སྒྱུ་མར་རྟོགས་ན་སེམས་ཀྱི་བཙན་ས་ཟིན། རིག་པ་འགྱུ་བ་ཆད་ན་འབྲས་བུ་བཙལ་མི་དགོས། དོན་ཉིད་ཉམས་སུ་ལེན་ན་ཚིག་ལ་ལྟོས་མི་དགོས། ཞེས་གསུངས་སོ། ཡེ་ཤེས་སྙིང་པོའི་ཞལ་ནས། སྣང་སྟོང་གཉིས་ནི་སེམས་ཀྱི་འཁོར་ས་ཡིན། བདེན་མེད་ནང་ནས་ཤར་ན་མིང་ཚིག་དགོས་རྒྱུ་མེད། ངེས་པ་དོན་ལ་གནས་ན་འགྱུ་བ་རང་སར་ཞོག གཞི་རྩ་སེམས་ལ་གཅོད་ན་གང་ཡང་སྒྱུ་མར་རྟོགས། ཐམས་ཅད་འཁྲུལ་པ་ཡིན་པས་འཛིན་མེད་ངང་ལ་ཞོག ཅེས་གསུངས་སོ། དཔོན་གསས་འོག་མ་ཀུན་གྱི་དགོངས་པའི་ལྟངས་བཞག་ལ། ཨེ་མ་ཧོ། ལྟ་བ་བྱ་ལམ་རྗེས་མེད་ལ། བསྒོམ་པར་བྱ་བའི་ཡུལ་དང་བྲལ། སྤྱོད་པའང་དེ་བཞིན་ལ། འབྲས་བུ་རང་འབྱུང་ཆེན་པོ་ཤར། ཅེས་དོན་མཐུན་པར་གསུངས་སོ། ། ཞང་ཞུང་གཙོ་མེན་གྱེར་ཆེན་གྱིས་གསུངས་པ། བོན་ཉིད་ཁྱབ་བདལ་ཆེན་པོ་ལ། ང་བདག་འབྱེད་པ་སྡུག་བསྔལ་རྒྱུ། རིག་པ་རང་འབྱུང་བཙན་ས་ཟིན་འདོད་ན། ང་བདག་གཟུང་འཛིན་རྩད་ནས་བཅད། གཉིས་འཛིན་མདུད་པ་མ་ཁྲོལ་ན། ལྟ་བ་རྟོགས་ཞེས་ཁས་ལེན་ནོར། ལྟ་བ་འདི་ནམ་མཁའ་འདྲ། གང་ཡང་མ་སྤངས་ཞེན་ཆགས་མེད། དེ་རྟོགས་འབྲས་བུ་ངང་གིས་འབྱུང་། ཁོད་སྤུངས་དྲན་པས་གསུངས་པ། བོན་ཉིད་སྟོང་གསལ་བདག་མེད་ཡེ་ནས་མེད། འདི་ཡི་དགོངས་པ་སུས་ལེན་པ་དབེན་པར་གཅིག་པུར་ངང་ལ་སྡོད། རིག་པ་འགྱུ་ན་ཁོ་ཡི་མདངས་ལ་ལྟ། ལྟ་བ་གཞི་རྩ་བྲལ་བ་ལ། དྲན་པའི་རྩིས་བྱུག་ན་བཟང་། བསྒོམ་པ་མ་ཡེངས་རྩོལ་བྲལ་ལྷུག་པ་ལ། བརྗོད་མེད་རྒྱུན་དུ་སྐྱོང་བ་གཅེས། བླང་དོར་མེད་པའི་སྤྱོད་པ་ལ། ཐོ་ཆོའི་དགྲ་རྐུན་བཞོམ་པ་གཅེས། འབྲས་བུ་རེ་དྭོགས་མེད་པ་ལ། ཆེ་འདོད་ང་རྒྱལ་མངོན་ཤེས་སྤངས་པ་གཅེས། རང་སེམས་ཀུན་ཏུ་བཟང་པོ་ལ། ཟོལ་ཟོག་ཕྱི་རུ་དབྱུངས་པ་གཅེས། རིག་པ་ཡེ་ནས་སངས་རྒྱས་ལ། སྙམས་འཁྲིག་རྟོག་པའི་མདུད་པ་བཤིག་པ་གཅེས། དེ་ལྟར་གཡུང་དྲུང་སྙིང་པོ་ལ། ལྟ་བ་བལྟ་རྒྱུ་མེད་པའི་ངང་དུ་ཀློད་ལ་ཞོག སྤྱོད་པ་སྤྱོད་རྒྱུ་མེད་པའི་རང་ཡན་ལྷུག་པར་ཞོག འབྲས་བུ་གཞན་ནས་བསྒྲུབ་རྒྱུ་མེད་པའི་རེ་དྭོགས་མེད་པར་ཅོག་གེར་་ཞོག གསུངས་སོ། རིག་འཛིན་འདུས་པའི་དགོངས་ཉམས། སློབ་དཔོན་ཆེ་དྲུག་དང་བར་གྱི་གདུང་འཛིན་བཅུ་གསུམ་དང་། མཁས་པ་མི་བཞི། བརྒྱུད་འཛིན་གཤེན་བཞི་དང་། ཁོད་སྤུངས་དྲན་པ་ནམ་མཁས་ལྟ་སྒོམ་སྤྱོད་པ་འབྲས་བུའི་དོན་དྲིལ་ཏེ་གསུངས་པ། རིག་འཛིན་འདུས་པའི་ཐུགས་བསྒྲུབ་ཀྱི་ཆ་རྐྱེན་དུ་བཀོད་པའོ།
