དེ་ཡང་“གསོ་རིག་འབུམ་བཞིའི་མཐོ་སློབ་སྨན་རིའི་གླིང་”འདི་ཉིད་སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༣ པ་རིན་པོ་ཆེ་མཆོག་ཉིད་དགུང་གྲངས་ ༨༦ བཞེས་པའི་ཕྱི་ལོ་ ༢༠༡༤ ཟླ་ ༥ ཚེས་ ༡༣ ཉིན་༸སྐྱབས་རྗེ་མཆོག་དབུ་བཞུགས་ཐོག་རྟེན་འབྲེལ་རབ་གནས་ཀྱི་དབུ་འབྱེད་གནངས་ནས་རིམ་བཞིན་ཡར་རྒྱས་དང་ཚགས་ཚུད་བཏང་ཞིང་། ༢༠༢༡ ལོར་སྐབས་དང་པོའི་སྨན་པ་བཀའ་བཅུ་པ་དང་། ༢༠༢༣ ལོར་སྐབས་གཉིས་པ་དང་གསུམ་པའི་སྨན་པ་བཀའ་བཅུ་པའི་བསླབ་པ་མཐར་སོན་གྱི་ཕྱག་ཁྱེར་བསྩལ།
དེ་རིང་སྤྱི་ལོ་ ༢༠༢༥ ཟླ་ ༩ པའི་ཚེས་ ༡༥ བོད་ཤིང་སྦྲུལ་ལོའི་བོད་ཟླ་ ༧ པའི་ཚེས ༢༤ ཞིང་གཤེགས་དམ་པ་༸སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༣ པ་རིན་པོ་ཆེ་མཆོག་དགོངས་པ་བོན་དབྱིངས་སུ་གཤེགས་ནས་མི་ལོ་ ༨ འཁོར་བའི་འདས་མཆོད་ཉིན། གཡུང་དྲུང་བོན་གྱི་དཔེ་མཛོད་ཁང་དུ་སྐབས་བཞི་པ་དང་ལྔ་པའི་སྨན་པ་བཀའ་བཅུ་པའི་བསླབ་པ་མཐར་སོན་གྱི་རྟེན་འབྲེལ་དགའ་སྟོན་མཛད་སྒོ་འཚོགས་གནང་སོང་།
དེ་ཡང་གོང་ཚེས་ཉིན་གྱི་སྔ་དྲོའི་དུས་ཚོད་ ༡༠། ༣༠ ཐོག་སྨན་སྦྱོར་སྡེ་ཚན་གྱི་འགན་འཛིན་སྨན་པ་པདྨ་ཚེ་རིང་ལགས་ཀྱི་མཛད་སྒོའི་གཙོ་སྐྱོང་གནང་ཞིང་། ཚོགས་བཅར་བ་རྣམས་ཚོགས་ཁང་དུ་ཚང་འཛོམས་ཀྱིས་བཞུག་གྲལ་དུ་འཁོད་གྲུབ་མཚམས། མཛད་སྒོ་འདིའི་སྐུ་མགྲོན་གཙོ་བོ་༧སྐྱབས་རྗེ་རྒྱལ་བ་སྨན་རི་བ་མཆོག་དང་། དམིགས་བསལ་སྐུ་མགྲོན་༸སྐྱབས་རྗེ་སྨན་རིའི་དཔོན་སློབ་རིན་པོ་ཆེ་རྣམ་གཉིས་གདན་ཞུས་གནང་ཞིང་སྣང་གསལ་མར་མེའི་ཞལ་དབྱེ་གནང་།
དེ་རྗེས་ཚོགས་བཅར་སྐུ་མགྲོན་ཡོངས་ལ་གསོལ་ཇ་འབྲས་སིལ་འདེགས་འབུལ་དང་། མཐོ་སློབ་ཀྱི་འགན་འཛིན་དགེ་བཤེས་ཚེ་དབང་རྣམ་རྒྱལ་ལགས་ནས་མཛད་སྒོའི་ངོ་སྤྲོད་དང་། མཐོ་སློབ་ཀྱི་ད་ལྟའི་གནས་བབ། མ་འོངས་པའི་འཆར་གཞི་་སོགས་ཀྱི་སྒོ་ནས་གསུང་བཤད་གནང་གྲུབ་མཚམས།
བོན་གཞིས་ས་གནས་འགོ་འཛིན་གཙོ་མཆོག་བསྟན་འཛིན་ལགས་ནས་མཛད་སྒོ་དང་འབྲེལ་བའི་གསུང་བཤད་གནང་།
དེ་རྗེས་མཛད་སྒོའི་དམིགས་བསལ་སྐུ་མགྲོན་༧སྐྱབས་རྗེ་རྒྱལ་བ་སྨན་རིའི་དཔོན་སློབ་རིན་པོ་ཆེ་མཆོག་ནས་“ལུང་པ་ཞིག་ལ་མེད་དུ་མི་རུང་བ་ནི་བླ་མ་དང་སྨན་པ་དཔོན་པོ་གསུམ་རེད། གང་ཞིག་ན་བ་དང་ཚ་བ་བྱུང་ན་སྨན་པར་རེ་རྒྱུ་རེད། སོང་ཙང་སྨན་པའི་བྱ་བ་དེའང་བྱ་བ་གཞན་དང་མི་འདྲ་བ་ཞིག་རེད།”ཞེས་སོགས་དང་། ལྷག་པར་དུ་ང་ཚོའི་སྨན་དེ་དེང་དུས་ཚན་རིག་གི་སྨན་དང་མི་འདྲ་བར། དམིགས་བསལ་སྔགས་དང་རྫས་དང་ཏིང་ངེ་འཛིན་དང་འབྲེལ་བ་ཡོད་པ་ཞིག་ཡིན་ཚུལ་དང་། བོན་གཞུང་ས་བདག་གཏོ་བཅོས་དང་། ཀླུ་འབུམ་སོགས་ནང་དུའང་སྨན་དང་འབྲེལ་བའི་སྐོར་མང་དག་ཞིག་བྱུང་གི་ཡོད་པས་དེ་དག་ཀྱང་དོ་སྣང་དགོས་ཚུལ་དང་།
ཁྱད་པར་དུ་སྒྲུབ་གཞུང་ཉམས་བཞེས་སོགས་འཕྲིན་ལས་ཀྱི་ལག་ལེན་བྱེད་པར་ངེས་པར་དུ་སྨན་སྣ་རྫས་སྦྱོར་སོགས་ཚང་དགོས་ཤིང་། དེ་དག་ངོས་འཛིན་བྱེད་ཤེས་དགོས་པས། སྨན་གཞུང་ལ་སློབ་གཉེར་གནང་རྒྱུ་དེ་ཆོ་ག་ཕྱག་ལེན་ལ་ཡང་འབྲེལ་བ་ཡོད་ཚུལ། གཞན་ཡང་སྨན་པ་དང་སྨན་སློབ་རྣམས་ཀྱིས་མ་འོངས་པར། གསོ་རིག་འབུམ་བཞིའི་གཞུང་ཆ་ཚང་པ་ལ་འགྲེལ་བ་རྒྱག་མ་ཐུབ་ནའང་། གཞུང་ཚན་རེ་དང་ལེའུ་ཚན་རེ། ཡང་ན་དོན་ཚན་ཆུང་ངུ་རེའི་སྐོར་ལ་ཟིན་ཐོ་དང་འགྲེལ་བརྗོད་གནང་ཐུབ་ན། མ་འོངས་པར་གསོ་རིག་དོན་གཉེར་བ་དང་། འབུམ་བཞིའི་བསྟན་པ་སྤྱི་ལ་དགེ་ཕན་ཡོང་ངེས་ཡིན་པས་ཐུགས་སྣང་དགོས་ཚུལ་སོགས་ཀྱི་སྐོར་”བཀའ་སློབ་ལམ་སྟོན་ཟབ་རྒྱས་གནང་།
དེ་རྗེས་༧སྐྱབས་རྗེ་རྒྱལ་བ་སྨན་རི་བ་མཆོག་ནས་གསོ་རིག་འབུམ་བཞིའི་མཐོ་སློབ་སྨན་རིའི་གླིང་གི་སྐབས་བཞི་པ་དང་ལྔ་པའི་སྨན་པ་བཀའ་བཅུ་པའི་སློབ་ཐོན་པ་གྲངས་ ༥ ལ་སྨན་པ་བཀའ་བཅུ་པའི་ཕྱག་ཁྱེར་དང་དམིགས་བསལ་སྐུ་མགྲོན་༧སྐྱབས་རྗེ་རྒྱལ་བ་སྨན་རིའི་དཔོན་སློབ་རིན་པོ་ཆེ་མཆོག་ནས་མགུར་དར་བཅས་བསྩལ་གནང་མཛད།
དེ་རྗེས་སྐུ་མགྲོན་གཙོ་བོ་༧སྐྱབས་རྗེ་རྒྱལ་བ་སྨན་རི་བ་མཆོག་ནས་བཀའ་སློབ་བཀའ་དྲིན་བསྩལ་དོན་“གསོ་རིག་འབུམ་བཞིའི་མཐོ་སློབ་འདི་ཉིད་རྩ་བའི་བླ་མ་༸སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༣ པ་མཆོག་གི་མཛད་པ་མཐའ་མའི་ཚུལ་དུ་རྗེས་བཞག་གནང་བཞག་པ་ཞིག་ཡིན་པ་དང་། དེ་ནས་སློབ་ཐོན་པ་རྣམས་ཀྱི་མི་ལོ་དྲུག་གི་རིང་ལ་སློབ་གཉེར་གནང་ནས་མཐར་ཕྱིན་པའི་བསྐལ་བཟང་གི་མཛད་སྒོ་རེད། དགའ་བ་སྒོམ་ཆོག་པ་ཞིག་རེད་།” ཅེས་སོགས་དང་། གཞན་ཡང་མ་འོངས་པ་རྣམ་པར་ཚོས་ད་དུང་མུ་མཐུད་སྨན་གྱི་ཐོག་ལ་སློབ་སྦྱོང་དང་ཕྱག་ལས་གནང་ནས་སྨན་རམས་པ་ཐོན་རྒྱུ་བྱུང་ན་ཡག་པོ་ཡོད་ཚུལ་དང་། གསོ་བ་རིག་པའི་སྨན་གྱི་ལོ་རྒྱུས་དང་བྱུང་རིམ་ལའང་ཐུགས་སྣང་གནང་དགོས་པ་གལ་ཆེ་ཚུལ། སྔར་གྱི་སློབ་ཐོན་པ་རྣམས་པས་ས་ཆ་གང་སར་རང་ནུས་གང་ཐུབ་ཀྱིས་ཕྱག་ལས་གནང་བཞིན་པ་ལྟར་དེ་བཞིན་མུ་མཐུད་གནང་དགོས་ཚུལ། གཞན་ཡང་སྨན་སྦྱོར་གལག་ལེན་གྱི་འཆར་གཞི་སྒྲིག་བཞིན་པ་ལ། མ་འོངས་པར་དེའི་ཐད་ལ་ཕྱག་ལས་གནང་ཐུབ་ན་ལེགས་པོ་ཡོད་ཚུལ། གཙོ་བོ་ང་ཚོའི་སྨན་བཅོས་དང་སྨན་སྦྱོར་སོགས་ཀྱི་སྒོ་ནས་སོ་སོའི་རྐང་པ་ལ་ལོང་ནས་མདུན་སྤྱོད་བྱེད་ཐབས་དགོས་པ་གལ་ཆེ་པོ་ཡིན་པ་སོགས་ཀྱི་སྒོ་ནས་བཀའ་སློབ་ལམ་སྟོན་གནང་མཐར།
སློབ་ཐོན་པ་དགེ་བཤེས་ཚེ་དབང་རིག་འཛིན་ནས་བཀའ་བཅུ་པ་སྐབས་བཞི་པ་དང་ལྔ་པ་ཐུན་མོང་གི་ངོ་ཚབ་ཀྱིས་མྱོང་ཚོར་གྱི་གཏམ་བཤད་དང་། མཐར་མཐོ་སློབ་ཀྱི་འགན་འཛིན་མཆོག་ནས་ཐུགས་རྗེ་ཆེ་ཞུའི་མཇུག་སྡོམ་གཏམ་བཤད་དང་། བསླབ་པ་མཐར་སོན་གྱི་སྨན་པ་བཀའ་བཅུ་པ་ལྔ་ལ་མང་ཚོགས་ནས་བསྐལ་བཟང་རྟེན་འབྲེལ་གྱི་མགུར་དར་ཕུལ་ཏེ་མཛད་སྒོ་མཇུག་གྲོལ་ཡོད་པ་བཅས་ཀྱི་གནས་བསྡུས་སུ།
གསོ་རིག་འབུམ་བཞིའི་མཐོ་སློབ་སྨན་རིའི་གླིང་འདི་ཉིད་ནི། ཞྭ་དཀར་གཡུང་དྲུང་བོན་གྱི་བསྟན་པའི་གཙུག་རྒྱན་ ༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་སོ་གསུམ་པ་རིན་པོ་ཆེ་མཆོག་གི་ཐུགས་བཀོད་དང་བཀའ་དགོངས་གཞིར་བཟུང་འོག་སྤྱིར་བོད་ཀྱི་རིག་གནས་ལ་གཅེས་སྐྱོང་དང་ལྷག་པར་དུ་༼སྨན་རི་དགོན་གྱི་བོད་ཀྱི་གསོ་རིག་སྨན་ལས་ཁང་༽ཞེས་པའི་སྲོལ་རྒྱུན་སྨན་ཁང་ཆུང་ཆུང་ཞིག་ལས་དམིགས་བསལ་གསོ་རིག་འབུམ་བཞིའི་སློབ་གཉེར་ཁང་ཚད་ལྡན་ཞིག་མེད་པ་དང་། སྒོས་སུ་རང་རེའི་ཞང་བོད་གསོ་རིག་འབུམ་བཞིའི་བསྟན་པ་འདི་ཉིད་མི་ཉམས་རྒྱུན་འཛིན་ཉམས་པ་སླར་གསོ་དང་།རང་རེའི་གཞོན་སྐྱེས་བོན་ཕྲུག་གསོ་བ་རིག་པར་དོན་གཉེར་གནང་འདོད་ཡོད་རིགས་རྣམས་ལ་མཐུན་རྐྱེན་གྱི་དགོས་མཁོ་དུ་མར་གཟིགས་ནས་གཤེན་གྱི་འབྱུང་ལྡན་སུམ་བརྒྱ་གཅིག་གི་ནང་ཚན་བོད་ལྕགས་ཡོས་ལོའི་བོད་ཟླ་དང་པོའི་ཚེས་བཅོ་ལྔའི་ཉིན་བདག་ཅག་གི་སྟོན་པ་རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོའི་འཁྲུངས་མཆོད་ཀྱི་དུས་བཟང་ཁྱད་པར་ཅན་སྟེ། ཕྱི་ལོ་ ༢༠༡༡ ཟླ་ ༣ ཚེས་ ༡༩ ཉིན་བོན་གཞིས་ཐོབ་རྒྱལ་གསར་པའི་ས་གནས་སུ་༧སྐྱབས་རྗེ་སྨན་རིའི་ཁྲི་འཛིན་སོ་གསུམ་པ་མཆོག་དང་༧སྐྱབས་རྗེ་སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་རྣམ་གཉིས་དབུ་བཞུགས་ཐོག་གནད་ཡོད་མི་སྣ་ཁག་ཅིག་ཆེད་ཕེབས་ཀྱིས་གསོ་རིག་འབུམ་བཞིའི་གཙུག་ལག་སློབ་གཉེར་ཁང་གསར་འཛུགས་ཀྱི་ས་བསླང་དང་ཐིག་གདབ་ཀྱི་རྟེན་འབྲེལ་མཛད་ཡོད་པ་དང་།
ཕྱི་ལོ་ ༢༠༡༡ ནས་ ༢༠༡༤ བར་ཏེ་ལོ་གྲངས་ཧྲིལ་པོ་གསུམ་གྱི་རིང་ལ་༧སྐྱབས་རྗེ་རྒྱལ་བ་སྨན་རི་བས་སྐུ་དངོས་ནས་ཐུགས་ཚེགས་དང་སྐུ་ངལ་ཚད་མེད་གནང་སྟེ་བཟོད་བཀོད་འཆར་གཞི་བཞིན་སློབ་གཉེར་བའི་ཆེད་འཛིན་ཁང་ལྔ། རང་སྦྱོང་ཁང་གཉིས། དཔེ་མཛོད་ཁང་། སངས་རྒྱས་སྨན་ལྷའི་མཆོད་ཁང་། ནད་གསོ་ཁང་། ནད་པའི་སྤྱི་ཐབ་ཁང་། བརྟག་དཔྱད་ཁང་། སྨན་སྤྲོད་ཁང་། སྔོ་སྨན་ཁང་། བུ་དང་བུ་མོའི་ཉལ་ཁང་། ལས་ཁུངས་དང་དགེ་རྒན་ལས་བྱེད་རྣམས་ཀྱི་བཞུགས་ཤག་བཅས་ཕུན་སུམ་ཚོགས་པའི་ཁང་རྩེག་བདུན་ཅན་གྱི་ཕྱི་ནང་གི་བཀོད་པ་ཁག་ཡོངས་སུ་བཞེངས་བསྐྲུན་ལེགས་པར་མཛད།
སྐྱབས་རྗེ་མཆོག་དགུང་གྲངས་ ༨༦ བཞེས་པའི་ཕྱི་ལོ་ ༢༠༡༤ ཟླ་ ༥ ཚེས་ ༡༣ ཉིན་ ༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་སོ་གསུམ་པ་རིན་པོ་ཆེ་མཆོག་དབུ་བཞུགས་ཐོག་ཕྱི་རྒྱལ་ཡུལ་གྲུ་ཁག་ནས་ཕེབས་པའི་ལྷག་བསམ་གཏོང་ཕོད་ཅན་གྱི་སྦྱིན་བདག་ཁག་དང་། བོན་གཞིས་སེར་སྐྱ་ མི་མང་ལྷན་འཛོམས་ཀྱིས་གསོ་རིག་འབུམ་བཞིའི་གཙུག་ལག་སློབ་གཉེར་ཁང་གི་ཕྱི་ནང་གི་བཀོད་པ་ཡོངས་སུ་ལེགས་གྲུབ་བྱུང་བའི་རྟེན་འབྲེལ་རབ་གནས་ཀྱི་དབུ་འབྱེད་གནངས།
ཕྱི་ལོ་ ༢༠༡༤ ཟླ་ ༦ ཚེས་ ༢༢ ཉིན་རྒྱལ་བ་སྨན་རི་བ་མཆོག་ནས་མཐོ་སློབ་འདི་ཉིད་མུ་མཐུད་འཛིན་སྐྱོང་དང་ལག་བསྟར་ཆེད་སྒྲིག་འཛུགས་འགན་འཛིན་ལྷན་ཚོགས་ཀྱི་ལས་མི་བསྐོ་བཞག་བྱས་ཤིང་། ཕྱི་ལོ་ ༢༠༡༥ ལོར་གཏན་འཇགས་སྨན་དགེ་བསྐོ་བཞག་གནང་ནས་མཐོ་སློབ་ཀྱི་རྩ་འཛིན་སྒྲིག་གཞི་གཏན་འབེབས་དང་ལོ་དེར་ཐེངས་དང་པོ་སྨན་སློབ་དྲུག་གསར་དུ་འཛུལ་ཞུགས་བྱས་ནས་མཐོ་སློབ་དངོས་སུ་དབུ་འཛུགས་གནང་ཐུབ་པ་བྱུང་ནས་རིམ་བཞིན་ད་བར་གསོ་རིག་འབུམ་བཞིའི་མཐོ་སློབ་འདི་ནས་བོན་གཞུང་གསོ་རིག་འབུམ་བཞི་དང་བོན་གྱི་རྩིས་རིག་སོགས་ལ་བསླབ་པ་མཐར་ཕྱིན་ཏེ་“བོད་ཀྱི་གསོ་བ་རིག་པའི་ལྷན་ཚོགས་”ཀྱི་ཁྲིམས་མཐུན་དེབ་སྐྱེལ་འོག་གསོ་རིག་སྨན་པ་བཀའ་བཅུ་པའི་བསླབ་པ་མཐར་སོན་སྐབས་ལྔ་པ་བར་སྨན་པ་གྲངས་བཅུ་ཕྲག་གསུམ་ལ་ཉེ་བ་ཞིག་སློབ་ཐོན་གྱི་ཕྱག་འཁྱེར་བསྩལ་ཞིང་སྤྱི་ཚོགས་གང་སར་གསོ་རིག་མ་ཉམས་རྒྱུན་འཛིན་གྱི་ཕྱག་ལས་གནང་བཞིན་ཡོད་འདུག་པ་བཅས། (ངོ་སྤྲོད་རྒྱས་པ་་ངེད་དྲྭ་ཚིགས་སུ་མཐོ་སློབ་ཀྱི་འགན་འཛིན་དགེ་བཤེས་ཚེ་དབང་རྣམ་རྒྱལ་ལགས་ཀྱིས་བྲིས་པ་དེར་གཟིགས་པར་ཞུ།
