གདན་ས་ཆེན་མོ་༸དཔལ་གཤེན་བསྟན་སྨན་རིའི་གླིང་དུ། དེང་དུས་སྤྱི་ཚོགས་ཀྱི་གནས་བབ་དང་ཞིབ་འཇུག་བྱེད་ཕྱོགས་ཐད་ཀྱི་དགོས་པར་དམིགས་ནས། ལོ་ངོ་དུ་མའི་སྔོན་ནས་གཡུང་དྲུང་བོན་གྱི་བཤད་སྒྲུབ་འདུས་སྡེའི་སློབ་གཉེར་བ་དག་ལ་བདུན་རེའི་བགྲོ་གླེང་དང་། རྩོམ་རྒྱུགས་སོགས་གནང་བའི་སྲོལ་བཙུགས་ཡོད་ཅིང་། བར་ལམ་ནས་དགོས་དམིགས་ལ་བལྟས་ཏེ་བདུན་རེའི་བགྲོ་གླེང་གི་ཚབ་ཏུ་ཟླ་རེའི་བགྲོ་གླེང་གཏན་འབེབས་གནང་ཡོད། དེ་ཡང་འཛིན་གྲྭ་གོང་འོག་བར་གསུམ་ནས་སློབ་གཉེར་བ་རེ་རེ་བཅས་མི་གསུམ་གྱིས་བགྲོ་གླེང་གི་བརྗོད་བྱ་རང་མོས་ཀྱིས་བདམས་ཐོན་བྱས་ཐོག་བགྲོ་གླེང་གནང་བཞིན་པ་ལྟར།
དེ་རིང་ཕྱི་ལོ་ ༢༠༢༦ ལོའི་ཟླ་ ༩ པའི་ཚེས་ ༢༩ ཉིན། གཡུང་དྲུང་བོན་གྱི་བཤད་སྒྲུབ་འདུས་སྡེའི་ཟླ་རེའི་བགྲོ་གླེང་སྐབས་ ༢༨ པ་བོད་མེ་རྟ་ལོའི་བོད་ཟླ་བརྒྱད་པའི་བགྲོ་གླེང་དངོས་སུ་འཚོགས་ཡོད། དེ་ཡང་གོང་ཚེས་ཉིན་གྱི་ཕྱི་དྲོའི་ཆུ་ཚོད་ ༥:༣༠ ཐོག ༸སྐྱབས་རྗེ་༸རྒྱལ་བ་སྨན་རིའི་མཁན་སློབ་རྣམ་པ་གཉིས་དབུ་བཞུགས་ཐོག གཡུང་དྲུང་བོན་གྱི་བཤད་སྒྲུབ་འདུས་སྡེའི་མཁན་པོ་མཆོག་དང་། བཤད་སྡེའི་དགེ་རྒན་རྣམ་པ། གཞན་ཡང་དགེ་བཤེས་དང་སློབ་གཉེར་བ་རྣམས་ཚང་འཛོམས་ཐོག རིག་གནས་འགན་འཛིན་མེད་དབང་རྒྱལ་གྱིས་གཙོ་སྐྱོང་དང་བཅས་བགྲོ་གླེང་དེ་ཉིད་དབུ་འཛུགས་གནང་ཡོད།
གཏམ་བཤད་པ་དང་པོ་འཛིན་གྲྭ་གོང་མའི་ཁོངས་ནས། རྫོགས་ཆེན་འཛིན་གྲྭའི་སློབ་གཉེར་བ་སྐལ་བཟང་ཉི་མ་ལགས་ཀྱིས་ “དབལ་མོ་ཉེར་བརྒྱད་ཀྱི་སྐོར་རགས་ཙམ་གླེང་བ་” ཞེས་པའི་བརྗོད་གཞིའི་ཐོག་ནས། ༡ སྲིད་པ་རྒྱལ་མོ་ཡི་མཚན་སོགས་ཀྱི་སྐོར། ༢. སྲིད་རྒྱལ་དུས་དྲུག་གི་སྐོར། ༣. ལྷ་ཟ་མཚན་དྲུག་གི་སྐོར། ༤.སྲིད་རྒྱལ་དང་གཟེ་གྱད་དཔལ་གསུམ་འབྲེལ་བ། ༥. དགའ་ཐང་འབུམ་པ་ཆེའི་ཡིག་ཆ་དང་དབལ་མོ་ཉེར་བདུན་སྐོར་བཅས་ཀྱི་སྒོ་ནས་གཏམ་བཤད་སྐར་མ་ ༡༥ དང་། དྲི་བ་དྲིས་ལན་སྐར་མ་ ༡༥ བཅས་ཆུ་ཚོད་ཕྱེད་ཀའི་རིང་གི་གཏམ་བཤད་མཇུག་གྲུབ་ཡོད།
དེ་རྗེས་གཏམ་བཤད་པ་གཉིས་པ་འཛིན་རིམ་བར་མའི་ཁོངས་ནས། འདུལ་བ་འཛིན་གྲྭའི་སློབ་གཉེར་བ་ཤེས་རབ་འཕྲིན་ལས་ལགས་ཀྱིས་ “དོལ་པོ་དང་བོན་” ཞེས་པའི་བརྗོད་གཞིའི་འོག་ནས། དང་པོ་དོལ་པོའི་ལོ་རྒྱུས། གཉིས་པ་དོལ་པོ་ལ་བོན་དར་ཚུལ་དང་ཞང་ཞུང་གི་འབྲེལ་བ་ཡོད་ཚུལ། གསུམ་པ་དོལ་པོ་ལ་ཡོད་པའི་བོན་གྱི་དགོན་སྡེ་ཁག་དང། བོན་གྱི་བླ་ཆེན་ཁག གཞན་ཡང་གནས་རི་སོགས་ཀྱི་སྐོར་ནས་སྔར་ལྟར་སྐར་མ་བཅོ་ལྔ་གཏམ་བཤད་དང་སྐར་མ་བཅོ་ལྔར་དྲི་བ་དྲིས་ལན་གནང་སྟེ་མཇུག་གྲུབ་ཡོད།
དེ་རྗེས་སྐབས་དང་པོའི་སློབ་གཉེར་བ་ལྷུན་འགྲུབ་རྒྱལ་པོ་ལགས་ཀྱིས་ “ཕུགས་གསུམ་མདོ་མཚོའི་སྐོར་” ཞེས་པའི་བརྗོད་བྱའི་ཐོག་ནས། ༡ ཕུགས་གསུམ་མདོ། ༢ མིང་དོན་དང་བྱུང་རབས། ༣ རིང་མོ་གྲོང་ཚོ། ༤ མཐའ་སྲུང་མཚོ་གླིང་དགོན། ༥ མཇུག་བསྡུ་བ་བཅས་ཀྱི་སྒོ་ནས་གསུང་བཤད་གནང་གྲུབ་མཚམས་དེ་འབྲེལ་གྱི་དྲི་བ་དྲིས་ལན་དང་བཅས་བོད་མེ་རྟ་ལོའི་བོད་ཟླ་བརྒྱད་པའི་བགྲོ་གླེང་དངོས་སུ་མཇུག་གྲུབ་ཡོད་པ་བཅས། གཡུང་དྲུང་བོན་གྱི་དྲྭ་ཚིགས་གཙོ་སྒྲུབ་ཁང་ནས།
