༄༅། །མཁས་པའི་བྱ་བ་གསུམ་གྱིས་གཤེན་བསྟན་ཉིན་མོར་བྱེད་པའི་སྐྱེས་བུ་ཆེན་པོ་རྒྱལ་བ་གཉིས་པ་མཉམ་མེད་ཤེས་རབ་རྒྱལ་མཚན་ཞེས་སྙན་པའི་གྲགས་པ་དཀར་པོ་སྲིད་ན་འབར་བ་གང་དེའི་དད་འབངས་སམ། རྒྱལ་ཕྱི་ནང་གང་སར་བཞུགས་པའི་ཞྭ་དཀར་བོན་གྱི་རིང་ལུགས་འཛིན་པའི་རྒྱ་ཆེའི་དད་ལྡན་པ་ཡོངས་ཀྱི་སྙན་དབང་དུ་ཞུ་རྒྱུར།
གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་གཤེན་གྱི་འབྱུང་ལྡན་ ༣༠༡ བོད་རྒྱལ་ལོ་ ༣༡༦༡ཕྱི་ལོ་ ༢༠༢༤ བོད་ཤིང་འབྲུག་ལོའི་ཕྱི་ཟླ་ ༤ ཚེས་ ༡༡ བོད་ཟླ་ ༣ ཚེས་ ༣ཉིན་ཏེ་གཟའ་སྐར་འཕྲོད་སྦྱོར་དགེ་བའི་ཉིན་དབུ་བཟུང་སྟེ། ཕྱི་ཟླ་ ༤ ཚེས་ ༢༦བོད་ཟླ་ ༣ ཚེས་ ༡༨ བར་ཉིན་གྲངས་བཅུ་དྲུག་རིང་།
གདན་ས་སྨན་རིའི་དགོན་དུ་སེམས་དཔའ་འདུས་སྡེ་རྒྱ་མཚོས་སྤྱི་སྤུངས་གསང་བའི་བོན་མཆོག ཚེ་གཅིག་སངས་རྒྱས་སྒྲུབ་པའི་ཐབས་མཆོག་ཉེ་ལམ་ཟབ་མོའི་ནང་ནས། རྒྱས་པ་མཐར་རྫོགས་སུ་སྒྲུབ་པ་ལ། ཡན་ལག་མཆོང་དགུའི་ནང་ཚན་འོད་ཟེར་འཁྱིལ་བ་སྨན་གྱི་མཆོང་ཆེན་སྦྱར་ནས་ཞི་ཁྲོ་སྨན་གསུམ་ཟུང་འབྲེལ་གྱིས་སྒྲུབ་པ། (བདུད་རྩི་འོད་ཟེར་འཁྱིལ་བ་སྨན་གྱི་སྒྲུབ་ཆེན་)འཚོགས་རྒྱུ་དང་།
གཞན་ཡང་བཙུན་དགོན་རཏྣ་སྨན་གླིང་དང་། གཤེན་གྱི་གསང་སྔགས་སྒོམ་སྒྲུབ་གླིང་སོ་སོར་ཁྲོ་བོ་དབང་ཆེན་གྱི་ཚོགས་མཆོད་དང་། ཁྲོ་བོ་དབང་ཆེན་གྱི་སྨན་འཛབ་གྲངས་གསོག་གནང་རྒྱུ་གཏན་ཁེལ་ལགས་ན། དེ་ལུགས་རྒྱ་ཆེའི་དད་ལྡན་པ་རྣམས་ཀྱིས་ཀྱང་། སྨན་རིའི་སྒྲུབ་ཆེན་འདི་ཉིད་གལ་ཆེ་དོན་ཆེ་དང་། དུས་བརྒྱ་ལན་གཅིག་ལྟ་བུའི་གོ་སྐབས་སུ་དགོངས་པ་བཞེས་ཏེ་ངེས་ཕེབས་ཡོང་བར་ཞུ་རྒྱུ་དང་། ཕེབས་གཏན་ངེས་ཚེ། སྔོན་ཚུད་ནས་འདི་ག་༧དབུས་གཡུང་དྲུང་བོན་འཛིན་སྐྱོང་ལྷན་ཚོགས་ལ་འབྲེལ་བ་གནང་གལ་ཆེ་བས་དེ་ལུགས་དགོངས་འཇགས་ཡོང་བར་ཞུ་བཅས།
༧ དབུས་གཡུང་དྲུང་བོན་འཛིན་སྐྱོང་ལྷན་ཚོགས་ནས་ཕྱི་ལོ་ ༢༠༢༣ ཟླ་ ༢ ཚེས་༢༤ཉིན།
