དེ་རིང་སྟེ་བོད་ཤིང་སྦྲུལ་ལོའི་བོད་ཟླ་༡༠ཚེས་༨དང་ཕྱི་ལོ་༢༠༢༥ལོའི་ཟླ་༡༡ཚེས་༢༨ཉིན་གྱི་སྔ་དྲོའི་ཆུ་ཚོད་༨།༣༠སྟེང་། གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་འབུམ་བཞིའི་མཐོ་སློབ་རྩེའི་ཚོགས་ཁང་དུ། སྨན་རྩིས་ཁང་གི་སློབ་སྤྱི་རྒྱ་ཤོད་དགེ་བཤེས་གཡུང་དྲུང་བཀྲ་ཤིས་ལགས་ནས་ལོ་ངོ་དུ་མའི་རིང་དཀའ་བ་ཁྱད་དུ་བསལ།
ངལ་བ་དང་དུ་བླངས་ནས་འགྲེལ་མཛད་པའི་འབུམ་བཞིའི་སྒོས་འགྲེལ། ༼ནད་འབུམ་སྟོད་ཆའི་སྒོས་འགྲེལ།༽༼ནད་འབུམ་སྨད་ཆའི་སྒོས་འགྲེལ།༽༼དཔྱད་འབུམ་ཁྲ་བོའི་སྒོས་འགྲེལ།༽༼ཐུགས་འབུམ་དང་སྨན་འབུམ་གཉིས་ཀྱི་འགྲེལ།༽བཅས་འགྲེལ་བཞི་དང་།
ཡང་ཁོང་གིས་མཛད་པའི་༼གསང་སྔགས་ཐེག་པ་ཆེན་པོའི་སྤྱི་གཅོད།༽དང་། རྒྱལ་སྤྱིའི་བགྲོ་གླེང་ཁག་ཏུ་སྒྲོག་སྦྱོང་ཁག་ཏུ་བྲིས་གནང་མཛད་པའི་ཆེད་རྩོམ་༼དཔྱད་རྩོམ་ཕྱོགས་བསྒྲིགས།༽བཅས་དེབ་གཉིས། དེ་མིན་སྔོན་གྱི་སྙན་དེབ་༼ལོ་ཟླའི་ཁྲོད་ཀྱི་ཚོར་འདུ་སྐྱུར་མོ།༽བསྐྱར་དཔར། ༼གསོ་རིག་འབུམ་བཞིའི་གཞུང་།༽བཅས་དེབ་བརྒྱད་ཀྱི་བདག་ཉིད་ཅན་འབུམ་བཞིའི་མཐོ་སློབ་ངོས་ནས་པར་སྐྲུན་གྲུབ་ནས་དཔེ་དེབ་དབུ་འབྱེད་མཛད་སྒོ་སྟབས་བདེ་ཞིག་འཚོགས་ཡོད་པ་རེད།
དེ་ཡང་འབུམ་བཞིའི་མཐོ་སློབ་ཀྱི་དྲུང་ཡིག་ཨེམ་ཆི་གཡུང་དྲུང་འོད་ཟེར་ལགས་ནས་གཙོ་སྐྱོང་གནང་ཞིང་། མཐོ་སློབ་ཀྱི་འགན་འཛིན་དགེ་བཤེས་ཚེ་དབང་རྣམ་རྒྱལ་ལགས་ནས་པར་སྐྲུན་ཐད་ཀྱི་གསལ་བཤད་དང་དགོས་དམིགས་སོགས་ཀྱི་སྐོར་ནས་གསུང་བཤད་གྲུབ་མཚམས།
སློབ་སྤྱི་དང་སྨན་དགེ་གཅིག་ལྕོགས་ཀྱི་རྒྱ་ཤོད་དགེ་བཤེས་གཡུང་དྲུང་བཀྲ་ཤིས་ལགས་ནས་འབུམ་བཞིའི་འགྲེལ་བ་འདི་ཉིད་འབྲི་བའི་རྒྱུ་མཚན་དགོས་པ་སོགས་ཞིབ་རྒྱས་ལམ་གསུང་བ་དག་འོག་ནས་རྩོམ་པ་པོའི་གསལ་བཤད་ཀྱི་མ་རྩོམ་རང་གཤམ་དུ་བཀོད་པ་ལས་གཟིགས་སྐུལ་ཞུ་རྒྱུ་དང་།
གཏམ་བཤད་གྲུབ་མཚམས་ལས་སློབ་ཐུན་མོང་ནས་བཀའ་དྲིན་ཐུགས་རྗེ་ལེགས་གསོལ་གྱི་ལྷ་དར་ཕུལ་ནས་མཛད་སྒོ་མཇུག་གྲུབ་ཡོད་པ་བཅས་ཀྱི་གནས་བསྡུས་སུ།
རྩོམ་པ་པོའི་གསལ་བཤད།
སྤྱིར་ན་བོད་ཀྱི་ཤེས་བྱ་རིག་པའི་གནས་ཆེ་ཆུང་གི་རྣམ་གྲངས་མང་ཞིང་། དེ་དག་ལས་བྱུང་བའི་འཁོར་བ་དང་མྱང་འདས་ཀྱི་གནས་ལུགས་ཆེ་ཕྲ་ཆུང་གསུམ་གྱི་རྣམ་བཞག་དག ཡབ་མེས་༸གཤེན་རབ་མི་བོའི་དུས་ནས་སྤུ་རིས་མ་འདྲེས་པར་སོ་སོའི་སྡོད་ལུགས་དང་མཐུན་པའི་སྒོ་ནས་གཏན་ལ་ཕབ་པའི་བཀའ་ཡི་པོད་གྲངས་ཉིས་བརྒྱ་ཡས་མན་གྱི་ལོ་རྒྱུས་དང་ལྡན་པ་ཞིག་ཡོད་པས། དེ་དག་ལས་རིག་པའི་རྣམ་བཞག་གང་ཡིན་ཀྱང་མ་གསལ་བ་དང་མི་མཇལ་བའི་དྭོགས་གནས་ཆེར་མེད་ནའང་། རྗེས་འཇུག་དཔྱོད་ལྡན་སྐྱེས་བུ་མང་དག་ཅིག་གིས་གབ་སྦས་ཅན་གྱི་ཚིག་དོན་ལ་གསལ་འགྲེལ་དང་། ཚན་པའི་ས་བཅད་འཆོལ་བ་དག་ལ་འཁྲུགས་པ་གོ་རིམ་སྡེབ་པའི་ལུགས། དེ་བཞིན་གསར་གཏོད་དང་ཟུར་འདོན་སོགས་ཀྱི་བཀའ་རྟེན་གྱི་རྣམ་བཞག་གྲངས་ཀྱིས་མི་ལོན་པ་ཞིག་མཛད་གནང་པ་ནི། རྒྱ་ཆེའི་ཀློག་པ་པོ་རྣམས་ཀྱི་སྤྱན་ལམ་དུ་ཡིད་འོང་སྒེག་མའི་སྙན་རིས་ལྟར་མོད་བཞིན་པ་ནི་སུས་ཀྱང་སྙོན་དུ་མེད།
དེས་ན་(གསོ་རིག་འབུམ་བཞི)་ཞེས་པའི་གཞུང་ཆེན་འདི་ཡང་བོན་ལུགས་ལྟར་ན་༸རྒྱལ་བ་གཤེན་རབ་མི་བོ་སྐུ་ན་གཞོན་དུས་སུ་གསུངས་པའི་བཀའ་ཡི་ཁོངས་གཏོགས་ཤིག་ཏུ་འདོད། སྤྱིར་བཏང་གཞུང་འདིར་ནད་གསོ་སྨན་དཔྱད་ཀྱི་རྣམ་གྲངས་ཡོངས་སུ་ཚང་ཞིང་གོ་ལག་ཡངས་པའི་སྨན་གཞུང་ཞིག་ཡིན་ཡང་། དུས་ཀྱི་འཕོ་འགྱུར་ཁྲོད་མི་མངོན་པའི་ས་འོག་གཏེར་དུ་སོང་བའི་དུས་ཡུན་དང་། སྤྱི་ཚོགས་ཐོག་ཀློག་འདོན་དང་བེད་སྤྱོད་བྱེད་ཆོག་མིན་ཅི་རིགས་ཀྱི་གནས་སུ་ལྷུང་གྲངས་མང་བས། བསྐྱར་འབྲི་དང་བསྐྱར་སྒྲིག་མང་པོ་ཞིག་བྱ་དགོས་བྱུང་བའི་རྐྱེན་གྱིས། ཚིག་གསར་གྱི་མཆན་ཆུང་འཛུལ་བ་དང་། ཚིག་རྙིང་ཆད་ལུས་སོང་བ། གཞན་ཡང་སྡེ་ཚན་ནམ་ས་བཅད་གོ་རིམ་འཆུག་པ། བར་མཚམས་སུ་བསྐྱར་ལྡབ་ཤོར་བ་སོགས་ཤིན་ཏུ་ནས་མང་། དེ་ཕྱིར་གཞུང་དེ་ཉིད་ལ་འགྲེལ་པ་ཞིག་འབྲི་དགོས་ན་གཞན་དང་མི་མཚུངས་བའི་དཀའ་ཁག་ཅིག་འཕྲད་རྒྱུ་ནི་རང་བཞིན་ཡིན་པས། ཁོ་བོས་ཀྱང་འབུམ་བཞིའི་སྒོས་འགྲེལ་འདི་མ་བྲིས་སྔོན་དུ། འབུམ་བཞི་ཁོ་རང་གི་རྩ་ཚིག་ལ་ཞིབ་འཇུག་མི་ལོ་ལྔ་དྲུག་ཙམ་བྱས་པ་དང་། ཞོར་དུ་འབུམ་བཞིའི་སློབ་དེབ་ཁག་ལྔ་ཙམ་སྒྲིག་ཁུལ་བྱས་ཀྱང་། ད་དུང་གཙང་དག་ཅིག་བཟོ་མ་ཐུབ་པས་ཡང་ནས་བསྐྱར་དུ་ག་དར་བཟོས་པའི་རྒྱུད་རིམ་ཁྲོད། སྐྱོན་རགས་པ་གཞན་ལ་སྟོན་ཆོག་པའི་བསྣོན་ཕྲི་འདོར་ལེན་དང་འཁྲུགས་པ་སྒྲིག་འགོད་བྱས་པ་འདི་ལྟར། ཡན་ལག་རྨའི་ལེའུ་ལས། ཚིགས་རྨ་གྲང་བམ་གྱི་འདབ་དང་སྐམ་འཁོར་གཤེར་འཁོར་གཉིས་ལས་ཤད་བར་སོ་བཞི་ཙམ་ཞིག རུལ་མྱགས་ཀྱི་བཅོས་ཐབས་སྐབས་བསྐྱར་ཟློས་སུ་འདྲེས་ཡོད་པས། རྒྱལ་གསུང་ཟབ་མོ་ག་དར་ཡོང་སླད་རྩ་བ་ནས་བླངས་པ་ཡིན། བཤལ་གྱི་ལེའུ་ལས། བཤལ་སྦྱོར་ལ། སྤྱི་བཤལ་དང་། སྒོས་བཤལ། ནད་རིགས་ཀུན་ལ་འགྲོ་བའི་སྡེ་ཚན་གསུམ་རིམ་པས་བསྟན་ཡོད་པ་ལས། གཤམ་དུ་སྒོས་བཤལ་དང་ནད་རིགས་ཀུན་ལ་འགྲོ་བའི་སྡེ་ཚན་གཉིས་གོང་འོག་འཆུག་པ་དེ་བསྒྲིགས་ཡོད། རྒྱལ་དུག་ལེའུ་ལས། སྤྱིའི་བཅོས་ཐབས་ལ་དུག་ནད་དུག་གིས་བཅོས་ཚུལ་དང་དུག་ནད་སྔགས་ཀྱི་བཅོས་ཐབས་གཉིས། བྱེ་བྲག་གི་བཅོས་ཐབས་ཀྱི་སྡེ་རུ་འཆུག་ཡོད་པས་ཡར་བླངས་ཏེ་བསྒྲིགས་ཡོད། རྩ་ཡི་ལེའུ་ལས་མགྲོན་ཕྱྭ་བརྟག་སྐབས། དོན་གཅོད་འགྲུབ་མིན་གྱི་རྩ་ཡི་ཚིགས་བཅད་གསུམ་བསྐྱར་ལྡབ་ཏུ་སླེབས་ཀྱི་ཡོད་པས། རྩ་བ་ནས་བླངས་པ་ཡིན། ད་དུང་རྩ་ཡི་ལེའུ་ལས་འཕར་བའི་གྲངས་བསྟན་པའི་སྐབས། འོན་ཀྱང་རྩ་རྒྱུད་མུ་ཏིག་ཕྲེང་བའི་ཞིབ་ཏིག་ལྟ། ངེས་པར་གྲང་བ་ཡིན། ཞེས་པའི་ཤད་བར་གཅིག་དང་ཕྱེད་ཀ་བསྐྱར་ལྡབ་ཡིན་པས་རྩ་བ་ནས་བླངས་པ་ཡིན། ཐུར་མའི་ལེའུ་ལས། ཐུར་མ་བརྡེག་ཚུལ་སྤྱི་དང་བྱེ་བྲག་གཉིས་ཀྱི་བར་ས་བཅད་གང་ལ་སྦྱར་ཐབས་མེད་ཅིང་། རྒྱུད་འགྲེལ་གཞན་དང་སྙིང་དོན་ཕན་ཚུན་འདྲེས་པའི་ཚིགས་བཅད་འགའ་སླེབས་ཀྱི་ཡོད་པས། རྒྱལ་གསུང་ཟབ་མོ་ག་དར་ཡོང་སླད་རྩ་བ་ནས་བླངས་པ་ཡིན། རྨའི་ལེའུ་ལས་ནད་རྟགས་དུམ་བུ་ཞིག་རྒྱུ་མི་རྒྱུའི་དུག་གསོ་བའི་ལེའུ་རུ་འདྲེས་ཡོད་པས་དེ་ཡང་གཙང་བཀོག་ཞུས་པ་ཡིན། ཐང་གི་ལེའུ་ཡི་དབུ་རུ་(བདུད་རྩི་སྙིང་པོ་སྨན་གྱི་མདོ་ལས་གསོ་བ་རིག་པའི་དངོས་གཞི་ལ་རེག་མཐོང་རྩ་ཆུའི་མདོ་སྟེ།) ཞེས་པའི་ལྷུག་ཚིག་ཤད་བར་ཞིག་ཡར་མར་གང་ལ་སྦྱར་ཐབས་མེད་པར་ཀྲོང་ངེ་ལྷག་ཡོད་པས་རྩ་བ་ནས་འཐེན་པ་ཡིན། གཞན་ཡང་མགོ་རུས་ཀླད་པའི་གནས་ལུགས་བསྟན་པའི་སྐབས་དང་། བླ་གནས་རྒྱུ་ཚུལ་སོགས་ལ་ཁ་སྣོན་བྱ་དགོས་པའི་རིགས་ཀྱང་གང་ལ་གང་འཚམ་ཞིག་འབྱུང་གི་ཡོད། མ་ཚད་དུས་འགྱུར་རླུང་ནག་འཚུབས་མའི་ཁྲོད་ཤོག་ལེབ་རེ་ཙམ་དང་ཚིགས་བཅད་རེ་གཉིས་ཙམ་ཆད་ལུས་ཤོར་བའང་མང་པོ་ཡོད་པས། རྗེས་སུ་བསྣོན་པ་དག་གུགས་རྟགས་()འདིའི་ནང་བཞག་པ་དང་། ཚིག་ཚོགས་མང་བ་དག་ཡི་གེ་གསེག་ནས་བཞག་པའང་ཡོད། དེ་ནི་འབུམ་བཞི་ཞུ་དག་གི་བརྒྱུད་རིམ་ཁྲོད་བརྗེད་ཐོ་དྲན་པས་ཟིན་པ་དག་ཡིན། འོན་ཀྱང་སྐབས་འདིར་མ་འཁོད་པའི་བཅོས་སྒྲིག་བྱས་པའང་དེ་བཞིན་ཡོད་ངེས།
དེ་ལྟར་བྱེད་པའི་དགོས་པ་གང་ཞེ་ན། རྒྱལ་གསུང་ཟབ་མོ་གཅེས་སྤྲས་དང་ག་དར་ཡོང་བའི་སླད་དུ་ཡིན་པ་ལས། གྲགས་འདོད་དང་མཁས་འདོད་དབང་དུ་འདོད་བཟོས་བྱས་པ་ཞིག་རྩ་བ་ནས་མིན། འོན་ཀྱང་རྒྱལ་བའི་གསུང་ལ་དད་མོས་ཟབ་པའི་སྐྱེ་བོ་རེ་འགའི་བློ་ངོར་མི་ཤོང་པའི་རྣམ་པ་འབྱུང་སྲིད་ན། འདི་ནི་འགྲེལ་བ་ཞུ་ཡུལ་འོས་ཙམ་ཞིག་འདོར་ལེན་བྱས་པ་ལས། སྤྱིར་བཀའ་འགྱུར་དཔེ་རིང་ནང་སྔར་མུས་ལྟར་གྱི་འབུམ་བཞི་གང་མང་ཞིག་བཞུགས་ཡོད་པས། འབུམ་བཞི་དཔར་རྩ་གཅིག་པུ་ཞིག་གིས་བཀའ་ཡི་བྱིན་རླབས་འཕྲོག་པའི་ངན་རྐྱེན་ཞིག་འགྱུར་མི་སྲིད་སྙམ། སྤྱིའི་ཆ་ནས་བཤད་ན། གོང་གི་གནད་དོན་དེ་དག་ཕལ་ཆེ་བ་འགྲེལ་བའི་ནང་དུ་ཁ་གསལ་བཀོད་ཡོད་པས། འགྲེལ་པར་གཟིགས་མཁན་རྣམས་ལ་ལྟོས་ཏེ་ལོགས་སུ་ཟུར་འདོན་ཞུ་མི་དགོས་པ་ལྟ་བུར་འགྱུར། དེ་ལྟར་ངོ་སྤྲོད་དང་གསལ་བཤད་ཞུ་དགོས་པའི་རྒྱུ་མཚན་གང་ཡིན་ཞེ་ན། གསལ་བཤད་མེད་པར་རང་འགར་བཅོས་སྒྲིག་བྱས་ནས་བཞག་ན། རྗེས་སུ་འབུམ་བཞི་མི་མཚུངས་བ་མང་པོ་ཞིག་ཐོན་ཡོང་དུས། རྨང་གཞིའི་གཞུང་ལ་དྭོགས་བློ་ཡང་སྐྱེ་སྲིད་པས། དེ་ལྟར་འགྱུར་ན་བསྟན་པའི་ཞབས་ཕྱིའམ་ཞབས་འདྲེན་གང་བྱུང་ངེས་པ་མེད་ཕྱིར་འདིར་བཀོད་པ་ཡིན།
འདིར་སྐབས་སུ་བབས་པའི་(གསོ་རིག་འབུམ་བཞིའི་སྒོས་འགྲེལ)་འདི་ཉིད། འབྲི་བར་བྱེད་པའི་རྒྱུ་རྐྱེན་དང་བདག་རྐྱེན་སོགས་མང་པོ་ཞིག་ལ་ལྟོས་ཏེ་བྱུང་བ་ལས། གང་ཟག་རེ་ཙམ་གྱི་འདོད་བློ་ལ་ལྟོས་ཏེ་འགྲུབ་ཐབས་ཤིན་ཏུ་ནས་དཀའ། དེས་ན་སྤྱི་ལོ༢༠༡༦ལོ་ཡས་མན་ཞིག་ཏུ་ཁོ་བོ་སྨན་རིའི་བླ་བྲང་དུ་བཅར་ཞིང་། ༸ སྐྱབས་རྗེ་ཞིང་གཤེགས་དམ་སྨན་རིའི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་ལ་ཡར་ཞུ་མར་གནང་ཞུས་སྐབས། སྤྱི་འགྲོས་ཀྱི་བཀའ་སློབ་ལམ་སྟོན་མང་པོ་ཞིག་གནང་ཞོར། སྤྱིར་བཏང་རྒྱུད་བཞི་ལ་འགྲེལ་ཆེན་མང་པོ་ཡོད་རེད་གདའ། འོན་ཀྱང་ང་ཚོའི་འབུམ་བཞི་ལའང་འགྲེལ་པ་ཏག་ཏག་ཅིག་ཡོད་མ་རེད་ཅེས་དང། ད་དུང་ཁྱུང་སྤྲུལ་སྨན་འབུམ་གྱི་གནས་ལུགས་གང་འཚམ་གསུངས་པ་དང་ཆབས་ཅིག རྗེས་སུ་ཁྱོད་ཀྱིས་ག་ལེར་ག་ལེར་འབྲི་ཐབས་བྱ་དགོས་གསུངས་སོང་།
དེ་ནས་ཁོ་བོས་འབྲི་ཐབས་བྱས་ན་འབྲི་ཐུབ་རྒྱུ་རེད་ཅེས་ཞུས་པ་ཡིན། དེ་མཚམས་ཁོང་གིས་བྲེལ་བ་མེད་བྲེལ་བ་མེད། བྲེལ་བ་བྱས་ན་ཡག་པོ་མི་ཡོང་། ཐོག་མར་སློབ་ཕྲུག་སྐབས་དང་པོ་ཐོན་ཆུག དེའི་རྗེས་སུ་འབྲི་ན་བཟང་ཚུལ་གྱི་བཀའ་སློབ་མང་པོ་ཞིག་གནང་མྱོང་ཡོད། བཀའ་སློབ་དེ་རྣམས་ཡིད་ལ་བཟུང་སྟེ་སྔོན་མ་ནས་འབྲི་འགོ་བཙུགས་ཁུལ་བྱས་ཀྱང་། བདག་ནི་ལེ་ལོ་ཆེ་སྟབས་ཕྲན་ཙམ་བྲིས་ནས་རྒྱུ་རྐྱེན་གང་ཞིག་ལ་རྟེན་ནས་མཚམས་འཇོག་བྱེད་པ་དང་།
ཡང་ཕྲན་ཙམ་བྲིས་ནས་མཚམས་བཞག་པའི་ཕྲེང་ཐག་ཤིན་ཏུ་ནས་མང་། དེ་འདྲའི་གསེབ་ཏུ་སྨན་རྩིས་ཁང་གི་སྨན་པ་རྒན་གྲའི་འགས་ཀྱང་ཁྱོད་ཀྱིས་འགྲེལ་པ་ཞིག་འབྲི་ཐབས་དགོས་ཞེས་བསྐུལ་བ་དང་། དེ་བཞིན་བོན་གྱི་གསོ་རིག་ལ་ལར་ཞེན་ཆེ་བའི་བོད་ཁུལ་གྱི་འཚོ་བྱེད་སྐྱེས་བུ་འགས་ཀྱང་ཨུ་ཚུགས་ངང་ཁྱེད་ཀྱིས་འབུམ་བཞིའི་འགྲེལ་པ་ཞིག་འབྲི་དགོས་ཞེས་བསྐུལ། མ་ཚད་རང་ཉིད་ཕྱོགས་སྐྱོད་ཀྱི་སྨན་པའི་ཚོགས་འདུ་འཚོགས་པའི་སྐབས་སུ་དྲི་བ་དྲི་ལན་གནང་སྐབས་ཀྱང་ལན་གྲངས་གཅིག་དང་གཉིས་ཙམ་མིན་པར་འབུམ་བཞི་ལ་འགྲེལ་པ་ཡོད་མེད་སྐོར་བཙིར་འདེད་བཏང་བ་སོགས་བསྐུལ་བརྡ་བཏང་མཁན་ཤིན་ཏུ་མང་པོ་བྱུང་། དེར་རྟེན་གུས་རང་གི་རྩ་བའི་བླ་མའི་ཞལ་གདམས་དྲོན་མོའི་བྱིན་རླབས་སྙིང་དབུས་སུ་བཅང་བཞིན། འཚོ་བྱེད་མི་ཆེན་དག་གི་གནད་བསྐུལ་དང་། རང་མཉམ་སྨན་པ་དག་གི་བཙིར་འདེད་ཀྱི་བསྐུལ་ལྕག་ལ་རྟེན་ནས་འབུམ་བཞིའི་སྒོས་འགྲེལ་འདི་གྲུབ་ཙམ་བྱུང་བ་རེད། ཁྱད་པར་དུ་བོན་གྱི་འཚོ་བྱེད་ཆེན་མོ་བོན་དབྱིངས་འགྱུར་མེད་ཁོང་གིས་འགྲེལ་པ་འདི་འབྲི་འགོ་བརྩམས་ནས་བཟུང་། བྲིས་མ་གྲུབ་བར་དུ་བསྐུལ་འདེད་ཀྱི་བདག་རྐྱེན་ཕན་རླབས་ཆེན་པོ་གནང་བྱུང་བས་ཐུགས་རྗེ་ལེགས་གསོལ་ཞུ་ཡུལ་ཞིག་ཏུ་གྱུར།
དེ་ལྟར་འབུམ་བཞིའི་སྒོས་འགྲེལ་འདི་ཉིད་ཁུངས་གཏུགས་ཡུལ་གྱི་ཕྱོགས་ནས་བཤད་ན། སྤྱིར་འབུམ་བཞི་ཁོ་རང་རྩ་འགྲེལ་རང་ཆས་སུ་གྲུབ་པ་ཞིག་སྟེ། རྩ་བ་ཐུགས་འབུམ་དང་། ཡན་ལག་སྨན་འབུམ། རྩ་བའམ་སྡུད་པ་ལྟ་བུ་དཔྱད་འབུམ་གསུམ་གྱི་འགྲེལ་བ་ནད་འབུམ་ནག་པོ་ཆགས་ཀྱི་ཡོད་དེ། དཔེར་ན་དེ་གསུམ་གྱི་སྙིང་དོན་རྒྱས་པ་ནད་འབུམ་དུ་མ་གསལ་བ་གང་ཡང་མེད། དེས་ན་ཕུགས་གཏུག་ས་གཙོ་བོར་ནད་འབུམ་བྱས་ཤིང་། ཟུར་ལྟའི་དཔེ་ཆ་ཁྱུང་སྤྲུལ་གྱི་སྨན་འབུམ་དང་། སྐམ་གཡུང་དྲུང་ཉི་རྒྱལ་གྱི་རྒྱུད་ཉི་མའི་དབང་པོ། རྒྱུད་བཞིའི་འགྲེལ་ཆེན་ཁག གཞན་ཡང་འབུམ་བཞི་དང་འགྲེལ་བ་ཡོད་པའི་བོན་དཔེ་རྣམས་ལས་ཁ་གསལ་དང་དོན་གསལ་གྱི་རིག་པ་གཡར་ཏེ་བྲིས་པ་ཞིག་ཡིན། དེ་ཡང་འབྲི་ཚུལ་གྱི་ཆ་ནས་བཤད་ན། འགྲེལ་པ་རྐྱང་པའི་དེབ་འགའ་ཕུད་བཏང་ན་རང་གིས་རྩོམ་པའི་དེབ་གསར་ཞིག་འགྱུར་བ་ལས། རྩ་ཚིག་གི་ཚིག་དོན་ལ་འདི་ཞེས་གདོང་ཐད་དུ་གསལ་ཁ་སྟབས་བདེ་མི་ཡོང་ཕྱིར། འབུམ་བཞིའི་རྩ་ཚིག་དུབ་བུ་རེ་དང་སྦྲགས་ཏེ་བྲིས་ཡོད། མ་ཚད་འབུམ་བཞི་དང་རྒྱུད་བཞི་གཉིས་སྙིང་དོན་ཆ་མཚུངས་སུ་ཡོད་པའི་རྒྱུ་མཚན་ལ་རྟེན་ནས། ཕན་ཚུན་དཔྱད་བསྡུར་གྱི་དྭོགས་གཅོད་དམ། ཞོར་བྱུང་གི་དཔྱད་བརྗོད་ཚུལ་དུ་བཀོད་པའང་གང་འཚམ་ཞིག་ཡོད་པས། འབུམ་བཞིའི་རྩ་ཚིག་དྲངས་པའི་སྐབས་རྟགས་འདིའི་“”བར་བཞག་པ་དང་། རྒྱུད་བཞིའི་རྩ་ཚིག་རྟགས་འདིའི་()ནང་བཙུད་ཅིང་། རྒྱུད་འགྲེལ་སོགས་སྨན་དཔེ་གཞན་རྣམས་རྟགས་འདིའི་{}་ནང་བཞག་ཡོད། དེ་ནི་འབུམ་རྒྱུད་གཞུང་གཉིས་བར་གྲུབ་མཐའི་ཕྱོགས་སུ་མ་ལྷུང་བར་རིས་མེད་སྤྱི་མཐུན་དུ་སྤྱོད་པའི་དགོས་པ་ལ་དམིགས་ཏེ་བྲིས་པ་ཞིག་ཀྱང་ཡིན། སྤྱིར་བཏང་འགྲེལ་བ་འདིའི་འགོ་མཇུག་ཐམས་ཅད་གོ་བདེའི་ལམ་ནས་ཕལ་ཚིག་བེད་སྤྱོད་བཏང་གང་ཐུབ་བྱས་ཤིང་། གབ་སྦས་ཅན་གྱི་མཁྲེགས་ཚིག་དག་གསལ་ཁ་དང་། དོན་མི་གསལ་བ་རྣམས་ཟུར་འདོན་གང་ཐུབ་ལམ་ནས་འབྲི་བར་བྱས། དེ་ལྟར་འབུམ་བཞི་ལ་སྔར་མེད་ཀྱི་གསར་འགྲེལ་ཞིག་འབྲི་ཁུལ་བྱེད་པ་ལ། རང་ཉིད་འབུམ་གཞིའི་གཞུང་དོན་ལ་ཐོས་བསམ་གྱི་རྒྱུད་རིམ་ཞིག་ཡོད་དགོས་ངེས་ཡིན་ན།
སྤྱིར་བཏང་ཤེས་དམན་བདག་ལྟ་བུར་མཚོན་ན། འབུམ་བཞི་རང་གི་གཞུང་དོན་ལ་རིགས་གཅིག་རྐང་འཛིན་གྱི་ལོ་གྲངས་མང་པོ་ཞིག་ཐོས་བསམ་བྱས་པའི་ལོ་རྒྱུས་བགྲང་རྒྱུ་མེད་ཀྱང་། རྒྱ་མཚོ་ཆེན་པོའི་ཆ་ཤས་གྱི་ཆུ་ཐིག་བླངས་ཡུན་ཙམ་ཞིག་བཤད་ན། ཁོ་བོ་ཐོག་མར་སྤྱི་ལོ༡༩༩༠ནས་༡༩༩༤་བར་མི་ལོ་བཞི་ཙམ་གྱི་རིང་། བཅུ་ཕྲག་རིང་གནས་ལ་མངའ་བརྙེས་པའི་དགེ་རྒན་ཤེས་རབ་མཆོག་ལྡན་དང་། སྨན་པ་བསོད་ནམས་མགོན་པོ་གཉིས་ཀྱི་དྲུང་ནས་གསོ་བ་རིག་པའི་གཞུང་དོན་ལ་ཐོས་བསམ་དང་ལག་ལེན་གྱི་ངོ་སྤྲོད་གང་འཚམས་ཞུ་བའི་གོ་སྐབས་བྱུང་བ་དང་། ཕྱི་ལོ་༢༠༠༠ལོར་བྱིས་ཀྱི་ཐོབ་རྒྱལ་སྨན་རི་དགོན་དུ་འབྱོར་ནས། ༸ སྐྱབས་རྗེ་སྨན་རིའི་ཁྲི་སོ་གསུམ་པའི་དྲུང་ནས་སྨན་འབུམ་ལས་རྩ་ཆུ་སོགས་ཀྱི་སློབ་ཁྲིད་ཞུ་བའི་གོ་སྐབས་ཀྱང་བྱུང་བའི་མ་ཚད། དགེ་བཤེས་རིན་ཆེན་བསྟན་འཛིན་གྱི་དྲུང་ནས་སྨན་རྒྱུ་བཙོ་བཀྲུ་སྦྱར་ཐབས་སོགས་ཀྱི་ལག་ལེན་དང་། འབུམ་བཞིའི་གཞུང་དོན་ལ་ཐོས་བསམ་གང་འཚམས་སྦྱངས། ཕྱི་ལོ་༢༠༡༤་ལོར་སྐྱབས་རྗེ་ཞིང་གཤེགས་དམ་པ་སྨན་རིའི་ཁྲི་འཛིན་རིན་པོ་ཆེའི་བཀའ་དགོངས་ལྟར་(གསོ་རིག་འབུམ་བཞིའི་མཐོ་སློབ་སྨན་རིའི་གླིང)་གི་དགེ་རྒན་གྱིས་ལས་འགན་འཁུར་ནས། མི་ལོ་༡༡་ཙམ་གྱི་རིང་འབུམ་བཞིའི་གཞུང་དོན་རང་གིས་ཀློག་བཤད་བཀྲོལ་གསུམ་དང་གཞན་ལ་འཆད་ཁྲིད་བྱེད་པའི་སྐལ་བཟང་ཐོབ་པའི་རྒྱུད་རིམ་ཙམ་མོ།
དེ་ཡང་ཡ་ཐོག་ཞང་ཞུང་བོན་གྱི་གསོ་རིག་གི་བསྟན་པ་ལ་ཁ་སྐང་དང་ཞབས་འདེགས་ཕྲན་ཙམ་ཡོང་སླད་དང་། སྒོས་སུ་བདག་གི་རྩ་བའི་བླ་མའི་བཀའ་དགོངས་ལྟར་གསོ་རིག་འབུམ་བཞིའི་སྒོས་འགྲེལ་འདི་འབྲི་ཁུལ་བྱས། འདི་ནི་རྩ་བའི་བླ་མ་ཞིང་གཤེགས་དམ་པས་བདག་ལ་མངགས་པའི་བཀའ་མཐའ་མ་སྟེ་ཞལ་ཆེམས་ལྟ་བུ་ཞིག་ཆགས་སོང་བས། ལས་དོན་འདི་གྲུབ་པ་ནི་བླ་མ་དམ་པས་རང་ཉིད་ལ་མངགས་པའི་ལས་དོན་ཐམས་ཅད་ཀྱི་མཇུག་ཡོངས་སུ་གྲུབ་ཟིན་པས། ཡིད་སེམས་སྤྲོ་བ་དང་བཅས་ཏེ་དགེ་ཚོགས་ཅི་མཆིས་མཁའ་ཁྱབ་འགྲོ་ཀུན་དོན་དུ་དམིགས་པ་མེད་པར་བསྔོ་བ་དང་། གནོང་འགལ་ཇི་ཡོད་མཆོག་གསུམ་དྲུང་དུ་འཐོལ་བཤགས་འབུལ་བར་བྱ།
མཐའ་དོན་དུ་འགྲེལ་བ་འདི་ཉིད་གྲུབ་པའི་ཆེད་དུ་བྱིན་རླབས་བཀའ་བརྐོས་སྤྱི་བོར་བསྩལ་གནང་མཁན་རང་གི་རྩ་བའི་བླ་མའི་བཀའ་དྲིན་རྗེས་དྲན་དང་། གཞན་ཡང་དེབ་འདིའི་དབུ་བརྗོད་དང་མཇུག་བྱང་འབྲི་མཁན། དཔྱོད་ལྡན་པ་(མཁན་པོ་ཚེ་རིང་ནོར་བུ་མཆོག་དང་།)
(འཚོ་བྱེད་མཁས་དབང་པ་སངས་སྟོབས་ཆེན།) ད་དུང་དེབ་གཟུགས་ཇུས་འགོད་ཐད་རོགས་འདེགས་གནང་མཁན་ཚང་མ་ལ་ཐུགས་རྗེ་ལེགས་གསོལ་ཞུ་བ་དང་། གུས་པས་བཀའ་དྲིན་སྙིང་དབུས་ནས་ཞུ་བཞིན་ཡོད། ཐ་ཙན་མུ་ཙུག་དམར་རོ།
ཕྱི་ལོ་ ༢༠༢༥ ཕྱི་ཟླ་ལྔ་པའི་ཚེས་བཅུ་དགུ་ཉིན་རྒྱ་ཤོད་དགེ་བཤེས་
གཡུང་དྲུང་བཀྲ་ཤིས་གུས་པས་བྲིས།
དཀར་ཆག་གཟིགས་འདོད་ཚེ་གཤམ་གྱི་འབྲེལ་མཐུད་བརྒྱུད་གཟིགས་རོགས།
