བལ་ཡུལ་དོལ་པོ་སྨད་ཀྱི་བར་གླེ་གཡུང་དྲུང་ཤུག་ཚལ་དགོན་གྱི་མཁན་པོ་དགེ་བཤེས་དམུ་རིགས་ཉི་མ་ཀུན་ཁྱབ་མཆོག་བལ་གཞུང་ནང་ཆོས་དར་སྤེལ་དང་དགོན་པ་འཕེལ་རྒྱས་ལྷན་ཚོགས་ཀྱི་ཚོགས་གཙོར་བསྐོ་བཞག་གནང་འདུག
བལ་གཞུང་བློན་ཆེན་ལྷན་ཚོགས་ཀྱི་ཐག་གཅོད་གནང་བ་ལྟར། བོད་ཀྱི་དུས་བབ་དུ་བཀོད་པ་ལྟར་ན་ཕྱི་ཚེས་ ༡༤ ཉིན་བལ་ཡུལ་རིག་གཞུང་དང་ཡུལ་སྐོར། དེ་བཞིན་མི་འབོར་འགྲིམ་འགྲུལ་བློན་ཆེན་ཨ་ནིལ་ཀུ་མར་སིང་ཧཱ་(Anil Kumar Sinha)མཆོག་གིས། སྨན་རིའི་དགེ་བཤེས་མཁན་པོ་ཉི་མ་ཀུན་ཁྱབ་མཆོག་བལ་གཞུང་ནང་ཆོས་དར་སྤེལ་དང་དགོན་པ་འཕེལ་རྒྱས་ལྷན་ཚོགས་(the Buddhist Philosophy Promotion and Monastery Development Committee)ཀྱི་ཚོགས་གཙོར་བསྐོ་བཞག་བྱུང་བའི་ཕྱག་ཡིག་གནང་ཡོད་འདུག་ལ། ཁོང་གིས་མ་འོངས་ལོ་ལྔའི་རིང་ཚོགས་གཙོའི་ཐུགས་འགན་བཞེས་དགོས་ཀྱི་ཡོད་འདུག
ཡོངས་ཁུངས་བོད་ཀྱི་དུས་བབ།
བར་གླེ་གཡུང་དྲུང་ཤུག་ཚལ་དགོན་གྱི་མཁན་པོ་སྨན་རིའི་དགེ་བཤེས་དམུ་རིགས་ཉི་མ་ཀུན་ཁྱབ་མཆོག་གི་ལོ་རྒྱུས་ཉུང་བསྡུས།
བར་གླེ་གཡུང་དྲུང་ཤུག་ཚལ་དགོན་གྱི་མཁན་པོ་སྨན་རིའི་དགེ་བཤེས་དམུ་རིགས་ཉི་མ་ཀུན་ཁྱབ་མཆོག་༡༩༦༤ ལོར་དོལ་པོ་ཏི་ཆུ་རོང་བར་གླེ་ཞེས་པར་སྐུ་འཁྲུངས། སྐུ་ན་ཆུང་དུས་ནས་བོན་སྒོར་ཞུགས་ཤིང་ཡི་གེ་འབྲི་ཀློག་དང་དེ་བཞིན་སྔོན་འགྲོ་འབུམ་དགུ་སོགས་བསགས་སྦྱོང་ཚུལ་བཞིན་གནང་།
དེ་རྗེས་རྩ་བའི་བླ་མ་བར་གླེ་རིན་པོ་ཆེས་ལམ་སྟོན་འོག་ཕྱི་ལོ་༡༩༨༢ ལོར་བོན་གྱི་གདན་ས་ཆེན་མོ་རྒྱ་གར་སྨན་རིའི་དགོན་དུ་འབྱོར་ནས་༧ སྐྱབས་རྗེ་སྨན་རིའི་མཁན་སློབ་དྲུང་ནས་རབ་ཏུ་བྱུང་བ་དང་གཡུང་དྲུང་བོན་གྱི་བཤད་གྲྭར་ཞུགས་ནས་མདོ་སྔགས་སེམས་གསུམ་དང་།
རིག་པའི་གནས་ལྔ་འདོན་ཆོག་བཅས་ཀྱི་གཞུང་ལུགས་ལ་ཐོས་བསམ་སྦྱངས་པ་ཕུལ་ཕྱིན་མཛད། ཕྱི་ལོ་༡༩༩༤ ལོར་༧དཔལ་གཤེན་བསྟན་སྨན་རིའི་དགོན་དུ་༧སྐྱབས་རྗེ་མཁན་སློབ་རྣམ་གཉིས་དབུ་བཞུགས་ཀྱིས་སེམས་དཔའ་འདུས་སྡེ་རྒྱ་མཚོའི་དབུས་སུ་བཀའ་རབ་འབྱམས་པ་དགེ་བའི་བཤེས་གཉེན་ཆེན་མོའི་མཚན་རྟགས་བཞེས། དེ་ནས་ཕྱི་ལོ་༡༩༩༥ ནས་བཟུང་༢༠༠༧བར་མི་ལོ་༡༢ རིང་ལ་ཝར་ཎ་མཐོ་སློབ་ཏུ་གཡུང་དྲུང་བོན་གྱི་སྡེ་ཚན་དུ་དགེ་རྒན་གནང་། དེ་རྗེས་རིམ་བཞིན་ཕྱི་རྒྱལ་གྱི་ཡུལ་གྲུ་ཨུ་རུ་སུ། ཨ་རི། མེག་སི་ཀོ་ཡུ་རོབ་སོགས་ལ་མུ་མཐུད་དུ་བསྟན་དོན་གྱི་མཛད་འཕྲིན་སྐྱོང་མུས་དང་། ཕྱི་ལོ་༢༠༠༥ ལོར་དོལ་པོའི་རྫོང་སྡེ་དུང་ཉལ་དུ་དོལ་པོ་གཡུང་དྲུང་བོན་ཚོགས་གླིང་ཞེས་པའི་ཚོགས་པ་ཞིག་གསར་འཛུགས་གནང་སྟེ་དེའི་འཛིན་སྐྱོང་འོག་མཆོད་རྟེན་དང་ལས་ཁུངས་སློབ་གྲྭ་ཁག་བཅས་གསར་བསྐྲུན་གནང་བཞིན་མདོར་ན་ད་བར་སྐུ་ངལ་འཛེམ་མེད་ཐོག་མང་ཚོགས་ལ་ཕན་པའི་བྱ་བ་རླབས་ཆེན་བསྒྲུབས་དང་སྒྲུབ་བཞིན་ཡོད་པ་བཅས་ཁོང་གི་ངོ་སྤྲོད་མདོར་བསྡུས་ཙམ་སྨན་རིའི་དགེ་བཤེས་ཤེས་རབ་དཔལ་ལྡན་ནས།
