ཐར་སྒྱུམ་བྲི་མ་ཁེར་ཞི་དེ་སྨ་ཁིར་ན་ཉི་རི་ཁི་ཁར་ད་དོད་ཅི་ལྷན། ༄༅། །ཐར་ལམ་གྱི་རིམ་པ་གསལ་བར་བྱེད་པའི་སྒྲོན་མེ་ཉི་མའི་འོད་ཟེར་ཞེས་བྱ་བ། བླ་མ་བཀའ་དྲིན་ཅན་གྱི་ཞབས་ལ་གུས་པས་འདུད། ། སྤངས་པ་མི་འགྱུར་གཡུང་དྲུང་གདན་ཐོག་ཏུ། །རྟོགས་པ་མི་ནུབ་རྒྱལ་མཚན་འཛིན་པའི་སྐུ། །ཐར་ལམ་སྣ་ཚོགས་འགྲོ་ལ་སྟོན་མཛད་པ། །སྟོན་པ་བླ་མེད་དེ་ལ་མོས་ཕྱག་མཚལ། །བློ་དམན་ཐར་པའི་ལམ་ལ་བཀྲིད་ཕྱིར་དུ། །རྒྱལ་བའི་གསུང་རབ་རྒྱ་མཚོ་ལྟ་བུའི་དོན། །ནོར་བུ་བཞིན་དུ་དགོས་འདོད་ཀུན་འབྱུང་བའི། །ས་དང་ལམ་གྱི་རིམ་པ་བསྡུས་ཏེ་བཤད། །དེ་ལ་སྟོན་པ་ཡང་དག་པར་རྫོགས་པའི་སངས་རྒྱས་ཀྱི་གསུང་རབ་ཁམས་བརྒྱད་ལ་སོགས་པ་དོན་གྱིས་གསུམ་ལ་འདུ་སྟེ། གནས་ལུགས་གཞིའི་ཁྱད་པར་གྱི་དབང་དུ་བྱས་ནས་བདེན་པ་གཉིས་ལ་སོགས་དང༌། འཆར་ཚུལ་རྩལ་གྱི་དབང་དུ་བྱས་ནས་འཁོར་འདས་ལ་སོགས་དང༌། འཇུག་ཚུལ་ལམ་གྱི་དབང་དུ་བྱས་ནས་བདེན་བཞི་ལ་སོགས་བསྟན་པ་ཡིན་ནོ། །

༧སྐྱབས་རྗེ་སྨན་རིའི་སློབ་དཔོན་ཡང་སྟོན་འཕྲིན་ལས་ཉི་མ་རིན་པོ་ཆེ། ཐེག་འགྲེལ་ལས། ཇི་སྲིད་འདུ་ཤེས་ཡོད་ཀྱི་བར།དེ་སྲིད་ཐེག་པའི་མཐའ་ལ་ཐུག་མཐའ་མེད། ཅེས་གསུངས་པ་ལྟར། བདག་ཅག་གི་སྟོན་པ་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་མཆོག་གིས་གདུལ་བྱའི་བློ་དང་དབང་པོའི་ཁམས་མོས་པ་མི་མཐུན་པ་ཇི་སྙེད་ཅིག་ཡོད་པ་ལྟར། དེ་དང་མཐུན་པར་བོན་གྱི་སྒོ་མོ་ཡང་བསམ་གྱིས་མི་ཁྱབ་པར་བསྟན་ཅིང་དེ་ཡང་གདུལ་བྱའི་བློ་ཡི་རིམ་པ་དེ་དག་བསྡུ་ན་གསུམ་དུ་འདུས་པ་སྟེ། བློ་རབ་འབྲིང་ཐ་གསུམ་དུ་འདུས་པའོ། དེ་བཞིན་བོན་གྱི་སྒོ་མོ་བརྒྱད་ཁྲི་བཞི་སྟོང་ལས་སོགས་ཇི་སྙེད་ཅིག་གསུངས་ཀྱང་བསྡུས་ན་ཐེག་པ་ཆེ་ཆུང་གསུམ་མམ་མདོ་སྔགས་སེམས་གསུམ་དུ་མ་འདུས་པ་མེད་ཅིང་དེས་ན། གདུལ་བྱའི་བློ་དབང་པོ་ཐ་མ་ལ་ལྟོས་ཏེ་མདོ་མཚན་ཉིད་ཐེག་པའི་བོན་སྒོ་དང༌།