དེང་གི་ཆར་མཁར་རྨེའུ་བསམ་གཏན་རྒྱལ་མཚན་མཆོག་ནི་ཕྷཱརནྶཱིའི་(France)རྒྱལ་ས་པཱེ་རཱིས་(Paris)སློབ་གྲྭ་ཆེན་མོ་ནས་རྒན་ཡོལ་ཐོན་ནས་དེ་གར་བཞུགས་ཤིང་། ད་ལྟ་དགུང་ལོ་ ༧༨ ལ་ཕེབས་བཞིན་འདུག ཁོང་ནི་བོད་མདོ་སྨད་ཨ་མདོའི་ལྷོ་ཤར་དུ་ཡོད་པའི་ཤར་ཁོག་གམ་ཟུང་ཆུ་ཡུལ་གྱི་ ཀི་ཚལ་གྲོང་གསེབ་ཏུ་སྤྱི་ལོ་ ༡༩༣༦ ལོར་མཁར་རྨེའུ་ཚང་གི་ཡབ་ཚེ་དགའ་དང་ཡུམ་ཟིན་མོ་གཉིས་ཀྱི་སྲས་གཉིས་ལས་གཏེར་བརྒྱ་དགའ་དབང་ཞེས་གཅེན་པོར་སྐུ་འཁྲུངས། དགུང་ལོ་བརྒྱད་ནས་བོད་ཡིག་འབྲི་ཀློག་འགོ་རྩམས་པ་ན་ཡུལ་གྱི་ཉེ་འགྲམ་དུ་བོན་ལུགས་ཀྱི་སྣ་སྟེང་དགོན་པ་ཞེས་པར་གྲྭ་བཞུགས་གནང་། དགོན་སྡེ་དེར་དགུང་ལོ་བཅུ་གསུམ་བར་དུ་བསླབ་པ་སློབ་གཉེར་མཛད།

ཕ་བོང་། འཆད་ཁྲིད་ཀྱི་སྔོན། ཚད་མའི་གཞུང་དུ་ལོ་ཟླ་ནི་ལྡན་མིན་འདུ་བྱེད་ཀྱི་གྲས་སུ་བཞག་འདུག་ལ་དེ་ནི་དངོས་གནས་དེ་ལྟ་བུ་ཞིག་རེད་དེ། ཁོང་མིག་ལ་ཐོགས་པ་དང་སྙན་གྱིས་ཟིན་པ་མེད་པར་ང་ཚོ་དང་རིང་དུ་བཀྱེད་དེ་མདུན་ནས་མདུན་དུ་བསྐྱོད་བཞིན་གདའ། ཡང་སློབ་སྐབས་གསར་བ་ཞིག་གི་འགོ་བརྩམས་བྱུང་། སློབ་སྐབས་སྔོན་མའི་ནང་མཁར་རྨེའུ་བསམ་གཏན་ལགས་ཀྲུང་དབྱང་མི་རིགས་སློབ་ཆེན་གྱི་བོད་རིག་པ་གླིང་གིས་གདན་ཞུ་བྱས་ནས་འཆད་ཁྲིད་བྱེད་རྒྱུ་ཡིན་པའི་གཏམ་ཐོས་མ་ཐག་ཡོན་ཏན་སློབ་པར་རངས་པའི་མི་སྐོར་ཞིག་གིས་ནམ་བསླེབ་ཀྱི་གཏམ་ཐེངས་གཅིག་མིན་པར་དུ་མར་དྲིས་དང་འདྲི་བཞིན་འདུག ཡིན་ཡང་མཚམས་ནས་རྒྱུ་རྐྱེན་ཅི་ཡིན་ཧ་མ་གོ་ཡང་གང་ལྟར་ད་ཐེངས་སློབ་སྐབས་བར་ནར་འགྱངས་བྱས་འདུག ཉིན་འདི་དག་གི་རིང་ལ་ཀྲུང་དབྱང་མི་རིགས་སློབ་ཆེན་གྱི་དགེ་སློབ་ཀུན་གྱི་གླེང་བཞིན་པ་ནི་མཁར་རྨེའུ་བསམ་གཏན་དང་ཁོང་གི་གསུང་རྩོམ་མདའ་དང་འཕང་ཡིན་པ་དང་། ཚང་མས་ཁོང་པེ་ཅིན་དུ་ཡོང་ནས་ཟླ་བ་གཅིག་གི་རིང་ལ་འཆད་ཁྲིད་བྱེད་རྒྱུ་དེར་བསྒུག་འདུག པེ་ཅིན་གྱི་བོད་རིགས་སྤུན་ཟླ་མང་བོ་ཞིག་གིས་ཀྱང་འདིར་རྣ་བ་གཏད་དེ་ཉན་འདུག དེ་མིན་གོ་ཐོས་ལྟར་ན་ཁམས་དང་ཨ་མདོ་ནས་མེ་འཁོར་དང་གནམ་གྲུར་བསྡད་དེ་བསམ་གཟས་ནས་ཁོང་གི་འཆད་ཁྲིད་ལ་མཉན་དུ་ཡོང་མཁན་ཀྱང་འདུག འདི་དངོས་གནས་བོད་པའི་སློབ་གཉེར་གྱི་སྣང་ཚུལ་ཡག་པོ་ཞིག་དང་ཡང་ན་མཁས་པའི་མཚན་སྙན་གྱི་མངར་ཁའང་ཅི་ལ་མིན།

ངའི་སྐྱེས་ཡུལ་ནི་ཨ་མདོའི་ལྷོ་ཤར་དུ་ཡོད་པའི་ཡུལ་སྐད་དུ་ཤར་ཁོག་ཟེར་བ་དང་དབུས་གཙང་དུ་ཟུང་ཆུར་འབོད་པ་དེ་ཡིན། སྔོན་སྤྱི་ལོ་དུས་རབས་བདུན་པའི་མགོ་ནས་བཟུང་སྟེ་དགུ་བའི་དཀྱིལ་བར་དུ་བྱུང་བའི་བོད་བཙན་པོའི་རྒྱལ་ཁབས་དུས་སུ་ཡུལ་དེ་ལ་ཟོང་ཆུ་ཞེས་གྲགས། དེར་བརྟེན་ས་ཁུལ་དེ་ནི་བོད་ཀྱི་ལྷོ་ཤར་མཐའ་མཚམས་ཀྱི་ས་ཁུལ་གནད་ཅན་ཞིག་ཡིན་པར་མ་ཟད་བཙན་པོའི་དུས་སྐབས་སུ་དེར་རྒྱུན་འཇགས་སུ་སྡོད་པའི་མཐའ་མཚམས་སྲུང་དམག་གི་ལས་ཁུངས་དང་དམག་སྒར་ཡང་ཡོད་པར་ངེས། ཡུལ་ཟུང་ཆུའི་བྱང་ངོས་སུ་འཕན་ཆུ་ཞེས་པའམ་བོག་ཟོ་རུ་ཡང་འབོད་པ་དེ་ཡོད། ཡུལ་མིང་ཟུང་ཆུ་དང་འཕན་ཆུ་གཉིས་བསྡུས་ནས་མིང་བཏགས་པ་རྒྱའི་མཁར་སོང་ཕན་ ༼Songpan༽ ཞེས་པ་དེ་ཟུང་ཆུ་ལུང་འདབས་སུ་ལུང་པ་གཉིས་ཀྱི་འདུས་མདོར་ཆགས་ཡོད། མཁར་དེར་བོད་རྒྱ་གཉིས་དུས་རབས་ནས་དུས་རབས་བར་དམག་འཐབ་བྱེད་མྱོང་ཡོད།

གཤེན་གྱི་འབྱུང་ལྡན་སུམ་བརྒྱ་དང་གཅིག་སྟེ། ཕྱི་ལོ་༡༩༥༨ལོར་མཚོ་སྔོན་ཁྲི་གཤོག་རྒྱལ་མོའི་ལྷོ་ངོས་རྨ་ཡུལ་ཁྲི་ཀ་རྫོང་སྟོང་ཆེ་ལུང་བའི་སྟོང་སྐོར་ཚང༌དུ་སྐུ་འཁྲུངས། ད་ལྟ་ཀྲུང་དབྱང་མི་རིགས་སློབ་གྲྭ་ཆེན་མོར་སློབ་དཔོན་གྱི་ཕྱག་ལས་གནང་བཞིན་ཡོད། སློབ་སྦྱོང་གི་ཐོབ་ཐང་ནི། རབ་འབྱམས་པ།  ལས་བྱེད་ཀྱི་ཐོབ་ཐང་ནི། ཞིབ་འཇུག་མཁན། ཞར་བྱུང་གི་སྤྱི་ཚོགས་ལས་གནས་ནི། ཀྲུང་གོ་སྤྱི་ཚོགས་ཚན་རིག་ཁང་ཤ་མན་རིག་གནས་ཞིབ་འཇུག་ལྟེ་གནས་ཀྱི་གདན་ཞུས་ཞིབ་འཇུག་མཁན། བོད་ལྗོངས་སློབ་གྲྭ་ཆེན་མོའི་རྩོམ་རིག་ཚན་ཁག་གི་གདན་ཞུས་སློབ་དཔོན། མཚོ་སྔོན་བོད་སྨན་སློབ་གྲྭ་ཆེན་མོའི་གདན་ཞུས་སློབ་དཔོན།