མཉམ་མེད་ཤེས་རབ་རྒྱལ་མཚན་གྱི་རྣམ་ཐར་གནའ་བོའི་ཞལ་ལུང་
༄༅། །སྐུ་མདུན་རིན་པོ་ཆེ་མཉམ་མེད་ཤེས་རབ་རྒྱལ་མཚན་གྱི་རྣམ་ཐར་གནའ་བོའི་ཞལ་ལུང་བཞུགས་པ་ལེགས་སྷཱོ།། ཤེས་བྱ་ཀུན་ལ་ཐོགས་མེད་མཁྱེན་པ་རྒྱས།། རབ་འབྱམས་བོན་སྒོ་ཡོངས་ལ་མངའ་བསྙེམས་ཤིང་།། མི་ནུབ་བསྟན་པའི་རྒྱལ་མཚན་འཛུགས་མཛད་པ།། མཉམ་མེད་རྗེ་བཙུན་སྨན་རི་བ་དེ་རྒྱལ།། མཁས་གྲུབ་སྨན་རི་སྤྱན་གཅིག་ཤེས་རབ་རྒྱལ་མཚན་གྱི་རྣམ་ཐར་རགས་ཙམ་བརྗོད་པ་ལ། འཁྲུངས་ཡུལ་མདོ་སྨད་རྒྱལ་རོང་ཆུ་ཆེན་གྱི་ལུང་པ། སྟེགས་ཅོག་བྱ་བའི་གྲོང་པ་རུ། ཡབ་བྲག་ར་ཀླུ་རྒྱལ་བྱ་བ་གྱེར་བོན་ལ་མཁས་པ་ཞིག་ཡོད་པ་དང་། ཡུམ་མཁའ་འགྲོའི་མཚན་རྟགས་དང་ལྡན་པ་རིན་ཆེན་སྨན་ཞེས་བྱ་བའི་སྲས་སུ་མེ་ཕོ་སྤྲེལ་གྱི་ལོ་ལ་སྐུ་འཁྲུངས། ཆུང་ངུའི་དུས་ཀྱི་མཚན་ལ་གཡུང་དྲུང་རྒྱལ་ཟེར། སྐུ་མཆེད་གསུམ་གྱི་བར་པ་ཡིན། དེ་ཡང་ཆུང་ནས་བློ་རྩལ་རིག་པའི་སྟོབས་དང་ལྡན་ཅིང་། ཡབ་ཀྱི་དྲུང་ནས་སེལ་གཏོ་ཇུ་ཐིག་ལ་སོགས་རྒྱུ་ཡི་བོན་ལ་ཐུགས་སྦྱངས་ལེགས་པར་མཛད།