ཇི་ཙམ་སྨྲ་བ་མཁས་ཀྱང་རུང་།།
འབུམ་ཕྲག་འཁོར་གྱིས་བསྐོར་ཡང་རུང་།
གཅིག་ཤེས་ཀུན་གྲོལ་ཉམས་ལེན་འདི།།
མེད་ན་ཉམས་ཀྱི་མདོ་རྩ་ཤོར།།
བླ་མའི་ཞལ་གྱི་བརྒྱུད་པ་དང་།།
མན་ངག་ཁུངས་ཀྱི་བརྒྱུད་པ་དང་།།
གྲུབ་པ་བསྙེམས་པའི་བརྒྱུད་པ་གསུམ།།
མེད་ན་བྱིན་རླབས་ཇི་ལྟར་འབྱུང་།།
ཐ་སྙད་སྐམ་པོ་བློར་ཡོད་ཀྱང་།།
བྱིན་རླབས་སེམས་ལ་མ་ཞུགས་ན།།
རྒྱལ་བ་གོང་མའི་དགོངས་ཉམས་དེ།།
སྣོད་ལྡན་བུ་ལ་ཇི་ལྟར་འཕོ།།
ཡིད་བྱེད་བྲལ་བའི་དགོངས་པ་འདི།།
རང་སར་བཞག་ནས་མ་སྒོམ་ན།།
སེམས་རིག་གཉིས་ཀྱི་དྭངས་སྙིགས་དེ།།
རང་དྭངས་ངང་ནས་ཇི་ལྟར་ཕྱེད།།
སྤོང་སྡུད་ཞེན་གསུམ་གང་གིས་ཀྱང་།།
འགྱུ་བ་རང་སར་མི་སང་བས།།
བློ་ཡི་འགྱུ་བ་མ་སང་ན།།
ཀུན་བཟང་རྒྱལ་ས་ཇི་ལྟར་ཟིན།།
ངོ་བོ་ཀ་དག་ཡེ་སྟོང་དང་།།
རང་བཞིན་ལྷུན་གྲུབ་རང་གསལ་དང་།།
ཐུགས་རྗེ་ཀུན་ཁྱབ་ཡེ་ཤེས་གསུམ།།
མེད་ན་སྐུ་གསུམ་ཇི་ལྟར་ཐོབ།།
ངོ་བོ་རང་བཞིན་ཐུགས་རྗེ་ལས།།
རང་མདངས་སྣང་གསུམ་མ་ཤར་ན།།
སྐུ་གསུང་ཐུགས་ཀྱི་འཁོར་ལོ་ཡི།།
མི་ཟད་རྒྱན་ཚོགས་ཇི་ལྟར་ཤར།།
སྟོང་པའི་ངོ་བོ་མར་མེ་བཞིན།།
གསལ་བ་རང་ཆས་ལྷུན་གྱིས་གྲུབ།།
རང་མདངས་འོད་ལྔ་མ་ཤར་ན།།
ཞིང་ཁམས་རབ་འབྱམས་ཇི་ལྟར་གྲུབ།།
རང་འབྱུང་ངོ་བོ་སྟོང་པ་དང་།།
སྟོང་པ་རང་གསལ་ཡེ་ཤེས་གཉིས།།
མེད་ན་རྟག་ཆད་མཐའ་གཉིས་ཀྱི།།
མཐར་འཛིན་དྲྭ་བ་ཇི་ལྟར་ཆོད།།
གང་གི་ཕྱོགས་སུ་མ་ལྷུང་བའི།།
མཐའ་བཞི་རྒྱ་གྲོལ་སྟོང་པ་འདི།།
མེད་ན་ཡོད་མེད་ཕྱོགས་འཛིན་གྱི།།
མཐའ་རྒྱ་བཞི་པོ་ཇི་ལྟར་གྲོལ།།
གདོད་ནས་གསལ་འགྲིབ་མེད་པ་ཡི།།
སྟོང་གསལ་འཛིན་མེད་རིག་པ་འདི།།
མེད་ན་འཛིན་ཆགས་ཞེན་གསུམ་གྱི།།
མཚན་མའི་འགག་འཕྲང་སུ་ཡིས་གཏོར།།
གསལ་བ་གང་ཡིན་སྟོང་པ་དང་།།
སྟོང་པ་གང་ཡིན་གསལ་བ་ཡི།།
གསལ་སྟོང་གཉིས་མེད་འདི་མེད་ན།།
གཉིས་མེད་དགོངས་པ་སུ་ཡིས་རྟོགས།།
སྟོང་པས་སྟོང་པ་མ་འཇལ་བར།།
འཇལ་བྱེད་གཞན་ཞིག་འཚོལ་དགོས་ན།།
སྟོང་འཆལ་དབུ་མའི་སྟོང་པ་ལས།།
ཡང་རྩེའི་སྟོང་པ་ཇི་ལྟར་འཕགས།།
སྐུ་གསུམ་ཡེ་ནས་རང་སེམས་ལ།།
རང་ལ་རང་ཆས་མ་རྫོགས་ན།།
གཞན་ལ་རེ་དང་ལྷུང་དྭོགས་པའི།།
རེ་དྭོགས་མཚན་མ་ཇི་ལྟར་སངས།།
རང་འབྱུང་ངོ་བོ་སྟོང་པ་འདི།།
གདོད་ནས་ཀ་དག་མ་ཡིན་ན།།
འབུར་འཇོམས་འགོ་ཐུག་རྗེས་དེད་ཀྱིས།།
མཚན་མ་རང་གྲོལ་ཇི་ལྟར་འགྱུར།།
རང་གྲོལ་རིག་པའི་གླང་པོ་འདི།།
རྩོལ་མེད་ལྷུན་གྲུབ་མ་ཡིན་ན།།
འཁོར་འདས་སྣང་བ་ཇི་སྙེད་པ།།
སྣང་སྲིད་གཞི་ནས་ཇི་ལྟར་བཞེངས།།
ལྟ་བའི་རྒྱལ་པོ་ཁྱུང་ཆེན་གྱིས།།
སྤྱི་རྒྱ་རླབས་ཀྱིས་མ་གཅོད་ན།།
ངམ་གྲོག་གཡང་སའི་ཚོགས་རྣམས་ཀུན།།
གཅིག་ཆར་ཉིད་དུ་ཇི་ལྟར་ཆོད།།
གཞོན་ནུ་བུམ་པའི་སྐུ་འདི་ཡི།།
རང་མདངས་ཕྱི་རུ་མ་མངོན་ན།།
འོད་གསལ་སྣང་བ་རྗེན་གཅེར་དུ།།
ཕྱིར་གསལ་ཉིད་དུ་ཇི་ལྟར་འགྱུར།།
སྟོང་གསལ་རིག་པ་རྗེན་པ་འདི།།
ཙི་ཏ་རིན་ཆེན་དྭངས་མའི་ཀློང་།།
མར་མེ་བཞིན་དུ་མ་བཞུགས་ན།།
ནང་གསལ་ཉིད་དུ་ཇི་ལྟར་གནས།།
གདོད་ནས་ཉི་མའི་སྙིང་པོ་ལྟར།།
མུན་པ་གཏིང་ནས་མ་དག་ན།།
གསལ་འགྲིབ་མེད་པའི་རིག་པ་འདི།།
གཏིང་གསལ་ཆེན་པོར་ཇི་ལྟར་འགྱུར།།
མ་བཅོས་རང་འབབ་དགོངས་པ་འདི།།
རང་འབབ་ངང་དུ་མ་བཞག་ན།།
བཅོས་མ་བློ་ཡི་རླུང་འཚུབས་དེ།།
རང་གྲོལ་ཀློང་དུ་ཇི་ལྟར་ཞི།།
དམིགས་པ་མེད་པའི་དགོངས་པ་འདི།།
དམིགས་མེད་ངང་དུ་མ་བཞག་ན།།
དམིགས་པ་བློ་ཡི་གཟའ་གཏད་དེ།།
གཏད་མེད་ངང་དུ་ཇི་ལྟར་དེངས།།
འཛིན་པ་མེད་པའི་དགོངས་པ་འདི།།
འཛིན་མེད་ངང་དུ་མ་བཞག་ན།།
འཛིན་པ་སེམས་ཀྱི་འཁྱག་རོམ་དེ།།
འཛིན་མེད་ཀློང་དུ་ཇི་ལྟར་བཞུ།།
ཆགས་པ་མེད་པའི་དགོངས་པ་འདི།།
ཆགས་མེད་ངང་དུ་མ་བཞག་ན།།
ཆགས་པ་འཁོར་བའི་གདོས་ཐག་དེ།།
ཆགས་མེད་ཀློང་དུ་ཇི་ལྟར་ཆད།།
ཞེན་པ་མེད་པའི་དགོངས་པ་འདི།།
ཞེན་མེད་ངང་དུ་མ་བཞག་་ན།།
ཞེན་པའི་མདུད་པ་དམ་པོ་དེ།།
ཞེན་མེད་ངང་དུ་ཇི་ལྟར་གྲོལ།།
རྩོལ་མེད་ལྷུན་གྲུབ་དགོངས་པ་འདི།།
རྩོལ་མེད་ངང་དུ་མ་བཞག་ན།།
བློ་བྱས་རྩོལ་སྒྲུབ་རྦ་རླབས་འདི།།
སྟོང་ཆེན་ངང་དུ་ཇི་ལྟར་ཡལ།།
བཟང་དང་ངན་པའི་ཕྱོགས་གང་ཡང་།།
འཛིན་ཆགས་ཞེན་གསུམ་དབང་ཤོར་ན།།
རྣམ་པར་གྲོལ་བའི་ས་ཆེན་ཉིད།།
ཐོབ་པའི་བདེར་གཤེགས་འབྱུང་མི་སྲིད།།
ཐེག་པ་དགུ་ལ་དྲང་ངེས་གཉིས།།
དྲང་དོན་ཐེག་པ་རིམ་བརྒྱད་ཡིན།།
ངེས་དོན་ཡང་རྩེ་བླ་མེད་ཡིན།།
ཚུལ་འདི་ངེས་པར་ཤེས་ན་ལེགས།།
ངེས་དོན་གཅིག་དང་དྲང་དོན་བརྒྱད།།
འདི་ཡི་རྣམ་བཞག་ལེགས་ཤེས་ན།།
ཐེག་མཆོག་འདི་ཡི་ཟབ་གནད་རྣམས།།
བདེ་བླག་ཉིད་དུ་རྟོགས་པར་འགྱུར།།
འོག་མའི་ལྟ་བར་ཞེན་དྲག་ན།།
དེ་ནི་རྫོགས་ཆེན་སྣོད་མི་རུང་།།
ཡོད་ཚད་བློ་ཡིས་བཞག་དགོས་ན།།
རིག་པའི་རྒྱལ་པོའི་གཤིས་དང་འགལ།།
གསལ་སྟོང་འཇོག་ཚུལ་མ་ཤེས་ན།།
འོག་མའི་གཞུང་དང་འདྲེས་ཉེན་ཆེ།།
གསལ་སྟོང་ཚུལ་བཞིན་འཇོག་འདོད་ན།།
གཏན་ཚིགས་གལ་མདོའི་གཞུང་ལ་ལྟོས།།
རྟོག་པས་རྟོག་པ་འཚོལ་བ་དང་།།
བློ་ཡིས་གནས་ལུགས་འཚོལ་བ་དང་།།
དཔྱད་པས་གྲུབ་དོན་འཚོལ་བ་ཀུན།།
རང་གྲོལ་གནད་འདི་མ་ཤེས་སྐྱོན།།
བློ་ཡིས་བཞག་པའི་སྟོང་པ་དེ།།
ཤེས་བྱའི་གཤིས་སུ་རློམས་པ་ནི།།
བོང་བ་གསེར་དུ་རློམས་པ་དང་།།
ར་གན་གསེར་དུ་འཛིན་དང་མཚུངས།།
སྟོང་པ་རང་གསལ་མ་ཤེས་ན།།
གསལ་བ་འཇོག་པའི་ཚུལ་མི་ཤེས།།
གསལ་བ་བློ་རུ་ཞེན་པ་ནི།།
རྫོགས་ཆེན་དྲི་ཙམ་མ་གོས་རྟགས།།
དབང་ལུང་ཁྲིད་གསུམ་མེད་ནའང་།།
ཕོ་ཚོད་གོ་བ་གཅིག་པུ་ཡིས།།
སྔགས་སེམས་གཞུང་ལ་ལྟ་བ་དེ།།
བཀའ་ལ་ར་ཆོད་བྱས་པའི་རྟགས།།
མདོ་སྔགས་རྫོགས་གསུམ་གཞུང་ཆེན་རྣམས།།
བག་ཐུག་བཞིན་དུ་ཕན་ཚུན་བསྲེས།།
ཤན་འབྱེད་མ་ཤེས་ཁྱད་མེད་སྨྲ།།
འདི་ཡང་བརྡར་ཤ་མ་ཆོད་སྐྱོན།།
རིགས་པ་བཞི་ཡི་རྣམ་བཞག་དེ།།
མ་ཤེས་ཡོད་ཚད་བྱ་བྱེད་དང་།།
ལྟོས་ཤེས་འཐད་སྒྲུབ་རིགས་པ་ལ།།
གཙིགས་སུ་འཛིན་པ་བླུན་པོའི་ལུགས།།
གསལ་བ་དངོས་པོར་ཞེན་པ་དང་།།
གསལ་བ་འདུས་བྱས་ཞེན་པ་དང་།།
གསལ་བ་ཡུལ་ཅན་དུ་ཞེན་པ།།
འདི་རྣམས་འོག་མའི་ཤན་ཞུགས་རྟགས།།
གང་ལ་སྦྱངས་པ་ཤུགས་ཆེ་ན།།
དེ་ལ་དེ་ཡིས་ཤན་ཡང་ཞུགས།།
ལོ་མང་མདོ་ལ་སྦྱངས་པ་ན།།
དེ་ཡི་བག་ཆགས་ཐུག་ཀྱང་སྲིད།།
མདོ་སྔགས་སེམས་གསུམ་གཞུང་གང་ཡང་།།
རང་གི་རང་གཞུང་འཁྲུལ་མེད་ཤོད།།
ཕན་ཚུན་གཅིག་ལ་གཅིག་བསྲེས་ན།།
དོན་གྱི་རོ་བཅུད་ཉམས་པར་འགྱུར།།
རྫོགས་ཆེན་སྒོ་རུ་འཇུག་འདོད་ན།།
དང་པོ་བླ་མ་སྤྱི་བོར་བཀུར།།
གཉིས་པ་དབང་ལུང་ཁྲིད་གསུམ་ཞུས།།
གསུམ་པ་དམ་ཚིག་ཚུལ་བཞིན་སྲུང་།།
དབང་ལུང་ཁྲིད་གསུམ་ཐོབ་པའི་རྗེས།།
དེ་ནས་རང་གྲོལ་གཞུང་ལ་ལྟོས།།
དེ་རྗེས་ཉམས་ལེན་གནད་དུ་བསྣུན།།
ཚུལ་མཐུན་བྱེད་ན་དེ་འདྲ་དགོས།།
བསྟན་པ་འདི་ལ་རྒོལ་འདོད་ནས།།
འདི་ཡི་གཞུང་ལ་བལྟས་བྱས་ནས།།
འདི་ལ་གཤེ་སྐུར་བཏབ་པ་དེ།།
མནར་མེད་དམྱལ་བའི་རྒྱུ་རུ་འགྱུར།།
བསྟན་པ་འདི་ལ་རབ་དད་ནས།།
ཚེ་དང་སྒྲུབ་པ་མཉམ་བྱས་ཏེ།།
དཀའ་སྤྱད་འཕྲང་ནས་བཤར་ནུས་ན།།
ཕུང་པོ་ལྷག་མེད་དེངས་པར་ངེས།།
ངོ་བོ་སྟོང་པས་རྟག་མཐའ་བྲལ།།
རང་བཞིན་གསལ་བས་ཆད་མཐའ་བྲལ།།
ཟུང་དུ་འཇུག་པས་གཉིས་མཐའ་བྲལ།
སྐུ་གསུམ་དགོངས་པ་འདི་ཀ་རང་།།
དཔེར་ན་ཆུ་ཉིད་མ་རྙོག་ན།།
རང་དྭངས་ཉིད་དུ་འགྲོ་བ་བཞིན།།
དེ་བཞིན་རང་ལུགས་འཇོག་པའི་གནད།།
ཤེས་ན་རང་དྭངས་མི་འགྲོ་ཅི།།
ནམ་མཁས་རྩོལ་བ་མ་བྱས་ཀྱང་།།
སྤྲིན་པ་རང་སངས་འགྲོ་བ་ལྟར།།
དེ་བཞིན་རྒྱ་ཡན་བོར་ཤེས་ན།།
རང་སངས་མི་འགྲོ་གང་དུ་ལུས།།
བར་སྣང་བྱ་ནི་འཕུར་བའི་ཚེ།།
རྗེས་ཤུལ་རྟེན་ནི་མ་གྲུབ་ལྟར།།
དེ་བཞིན་རྩ་བྲལ་སྟོང་པའི་གནད།།
ཤེས་ན་ཤུལ་ཞིག་གང་དུ་ལྷག།
སྒོམ་བསྲན་ཆེན་པོ་རྒྱལ་གཤེན་བཞིན།།
ཆུ་བོའི་རྒྱུན་གྱི་རྣལ་འབྱོར་ཚུལ།།
ཚེ་དང་སྒྲུབ་པ་མཉམ་ནུས་ན།།
གྲོལ་བར་མི་འགྱུར་གང་ན་ཐོགས།།
ཀ་དག་ཁྲེགས་ཆོད་ཉམས་ལེན་འདི།།
ཁ་ནས་བཤད་པ་ཙམ་མིན་པར།།
ཉམས་སུ་བཞེས་ནས་སྒོར་འཇུག་ན།།
གོལ་ས་གཅིག་ཆར་མི་ཆོད་ཅི།།
ལྷུན་གྲུབ་ཐོད་རྒལ་ཉམས་ལེན་འདི།།
སྙིང་རུས་དྲག་པོས་ཁུར་བཞེས་ན།།
སྣང་ལུས་སེམས་དང་གསུམ་པོ་འདི།།
འཕོ་ཆེན་ངང་དུ་མི་དེངས་ཅི།།
རྫོགས་ཆེན་འཁྲུལ་མེད་ཤེས་འདོད་ན།།
གཞུང་ཆེན་བཞི་ལ་ཐུགས་དམ་མཛོད།།
གྲུབ་ཆེན་གོང་མའི་གསུང་ལ་ལྟོས།།
ལི་ཤུ་དྲན་པའི་ཕ་འབབ་ལོངས།།
སྨན་རིའི་བཤད་སྒྲུབ་མཁན་པོ་ཉི་མིང་པས།