ལྷོ་གཏེར་བོད་ཀྱི་ཐེག་པ་རིམ་དགུའི་ལྟ་གྲུབ་ངོ་སྤྲོད་མདོར་ཙམ།      རྩོམ་པ་པོ། སྨན་རིའི་བཤད་སྒྲུབ་མཁན་པོ་དགེ་བཤེས་ཉི་མ་དོན་འགྲུབ། ལྷོ་གཏེར་གྱི་ཐེག་པ་རིམ་དགུ། ཐེག་པ་དང་པོ་ཕྱྭ་གཤེན་ཐེག་པ། ཐེག་པ་དང་པོ་ཕྱྭ་གཤེན་གྱི་ཐེག་པ། ཞུ་བ་པོ་ཕྱྭ་གཤེན་གཙུག་ཕུད། མཚན་གཞན་ཕྱྭ་གཤེན་ལེགས་རྒྱལ་ཐང་པོར་ཡང་གྲགས། གསུང་པ་པོ་སྟོན་པ་སངས་རྒྱས་གཤེན་རབ་མི་བོ། གསུངས་པའི་དུས་གཤེན་གྱི་དགུང་ལོ་གཅིག་བཞེས་པའི་དུས། ཕྱྭ་གཤེན་ཐེག་པའི་གཞུང་། མོ་རྩིས་གཏོ་དཔྱད་ཀྱི་གཞུང་རྣམས་སོ། ཕྱྭ་གཤེན་ཐེག་པའི་ལྟ་བ་ངོས་འཛིན། དཔེར་ན་ལ་ཁའི་སོ་པས་དགྲ་དང་འཇིགས་པ་ཐམས་ཅད་མཐོང་བ་བཞིན་དུ། ནད་ལ་བཅོས་ཤིང་སྦྱང་དུ་ཡོད་པར་རྟོགས་ལ། གདོན་ལ་ཟློག་ཅིང་བསྒྱུར་དུ་ཡོད་པར་རྟོགས་པ་ནི་ལྟ་བའོ། །ཕྱྭ་གཤེན་ཐེག་པའི་འཇུག་སྒོ། མོ་དང་རྩིས་དང་གཏོ་དང་དཔྱད་དང་བཞི། འཇུག་སྒོ་སྤྱི་ཡི་རྣམ་གྲངས་ལ། མོ་ལ་མོ་རིགས་སུམ་བརྒྱ་དྲུག་ཅུ། རྩིས་ལ་རྩིས་རིགས་གབ་ཙེ་སུམ་བརྒྱ་དྲུག་ཅུ། གཏོ་ལ་གཏོ་རིགས་སུམ་བརྒྱ་དྲུག་ཅུ། དཔྱད་ལ་དཔྱད་ཐབས་ཉིས་ཁྲི་གཅིག་སྟོང་། མདོ་རུ་བསྡུས་ན་མོ་ལ་བཞི།