སྐྱབས་གནས་དཀོན་མཆོག་གསུམ། སངས་རྒྱས་དཀོན་མཆོག བོན་དཀོན་མཆོག། གཤེན་རབ་དཀོན་མཆོག སངས་རྒྱས་ལ་སྐྱབས་སུ་སོང་ན།  འཇིག་རྟེན་དྲེགས་པའི་ལྷ་ལ་སྐྱབས་དང་ཕྱག་མི་བྱ། དེ་རྣམས་རང་འཁོར་བ་ལས་མ་ཐར་བས།  གཞན་འཁོར་བའི་འཇིགས་པ་ལས་སྐྱོབས་མི་ནུས་པའི་ཕྱིར་རོ།  སངས་རྒྱས་ཀྱི་སྐུ་གཟུགས་ལ་མོས་གུས་བྱ།  ན་བཟའ་གསོལ།   ནང་ནུབ་ཅི་ཟ་ཅི་འཐུང་ཕུད་ཀྱི་དང་པོ་སྐྱབས་གནས་དཀོན་མཆོག་གསུམ་ལ་མཆོད། སེམས་ཅན་གྱི་སྲོག་ལ་འཚེ་བ་མི་བྱ། སངས་རྒྱས་དེ་སེམས་ཅན་ལ་ཐུགས་བརྩེ་བའི་བདག་ཉིད་ཅན་ཡིན་པས་སོ།

ཨེ་མ་ཧོ། གྱེར་བསྟན་རིན་ཆེན་མཚན་ཡང་ལྡོག་པའི་ཞིང་།། ལུང་རྟོགས་པད་མའི་དགའ་ཚལ་བཞད་པའི་མགོན།། འཕྲིན་ལས་རྟ་བདུན་སྣང་བ་གཤེགས་པའི་རྗེས།། ཆ་རྫོགས་ཟླ་བའི་མགོན་ལ་གསོལ་བ་འདེབས།། མཆོག་གསུམ་ཡེ་ཤེས་སྒྲིབ་བྲལ་སྤྱན་ལྡན་གྱིས།། རྒྱལ་བའི་འཕྲིན་ལས་སྐྱོང་བའི་མགོན་བསྐོས་པ།། གང་འདིའི་གསང་གསུམ་བཞེད་དོན་ལྷུན་གྲུབ་པའི།། ཐུགས་མཆོག་གཡེལ་མེད་དམ་པར་མཛད་དུ་གསོལ།།

ཨེ་མ་ཧོ། རབ་འབྱམས་ཕྱོགས་བཅུའི་རྒྱལ་བ་སྲས་བཅས་ཀྱི།། མཁྱེན་བརྩེའི་ཡེ་ཤེས་ངོ་བོ་གཅིག་བསྡུས་པ།། ཟབ་རྒྱས་གཤེན་བསྟན་སྤེལ་བའི་འཕྲིན་ལས་ཅན།། ལུང་རྟོགས་བསྟན་པའི་ཉི་མ་རྟག་འཆར་ཤོག།།

ཨེ་མ་ཧོ། བསླབ་གསུམ་བསྟན་པའི་བདག་ཉིད་འགྲོ་བའི་མགོན།། ཀུན་མཁྱེན་ཉི་དབང་རྣམ་རོལ་དགོངས་རྩལ་རྫོགས།། མདོ་སྡེ་སྔགས་ཀྱི་གནས་ལུགས་རྫོགས་པ་ཆེའི།། བསྟན་པ་འཛིན་སྐྱོང་འཕྲིན་ལས་རྣམ་པར་དག།། ཡོངས་འཛིན་སྨྲ་བའི་དབང་པོར་གསོལ་བ་འདེབས།།

ཨེ་མ་ཧོ། མཁྱེན་བརྩེའི་ཡོན་ཏན་ཀུན་རྫོགས་ངོ་བོ་ཉིད།། བླ་མེད་ཐེག་པའི་མཛོད་འཛིན་ཡ་ངལ་བ།། འཕྲིན་ལས་རྣམ་བཞིའི་ཉི་མ་རབ་སྤྲོས་ཏེ།། ཞི་བདེའི་བཀྲ་ཤིས་བསྟན་འགྲོའི་གསལ་བྱེད་ཤོག།

སྤྱི་རྒྱུད་ཆེན་མོ་ནམ་མཁའ་དཀར་པོ་ཡེ་ཁྲི་མཐའ་སེལ་གྱི་བམ་པོ་དང་མཆོང་གི་སྐོར། ལོ་རྒྱུས་ཆེན་མོ་སྐོས་ཀྱི་མཆོང་གི་དགོངས་དོན་ལྟར། སྤྱི་རྒྱུད་ཆེན་མོ་ནམ་མཁའ་དཀར་པོ་ཡེ་ཁྲི་མཐའ་སེལ་གྱི་རྒྱུད་འདིའི་བརྒྱུད་རིམ་གྱི་དབང་དུ་བྱས་ན།  དང་པོ་ཕུན་སུམ་ཚོགས་པ་ལྔ་ལྡན་གྱི་སྒོ་ནས་སྟོན་པ་ཀུན་ཏུ་བཟང་པོོས་འཁོར་ཕུན་སུམ་ཚོགས་པ་ལོངས་སྤྱོད་རྫོགས་པའི་སྐུ་ཡི་འཁོར་ཕྱོགས་བཅུའི་སངས་རྒྱས་བྱེ་བ་ཁྲག་ཁྲིག་ལ་གསུངས། སྡུད་པ་པོ་ཕུན་སུམ་ཚོགས་པ་གསང་སྔགས་ཀུན་འཆང་རྒྱལ་པོའོ། 

རང་གཞན་ཚང་མས་མཁྱེན་གསལ་ལྟར། སྲོག་ལྡན་གྱི་འགྲོ་བ་འགའ་ཞིག་ཚེ་རིང་པོར་གནས་པ་དང་། ཡང་འགའ་ཞིག་ཚེ་ཐུང་ངུ་ཙམ་ཞིག་མ་གཏོགས་གནས་མི་ཐུབ་པ། ལ་ལ་དུས་ལ་བབ་ནས་འཆི་བར་འགྱུར་བ་དང་། ལ་ལ་དུས་ལ་མ་བབ་ཀྱང་དུས་མིན་གྱི་འཆི་བ་སོགས་ནི། མིག་མཐོང་ལག་ཟིན་དུ་གྱུར་པས་དམིགས་བསལ་དེའི་སྐོར་འགྲེལ་བརྗོད་དགོས་པ་མ་མཐོང་། 

བླ་མ་དགེ་བའི་བཤེས་གཉེན་བསྟེན་ཚུལ་གྱི་རིམ་པ་ཀློང་ཆེན་གཞུང་གི་བསྟན་དོན། འདི་ཕྱི་གཉིས་ཀྱི་ནང་ནས་ཕྱི་མ་ཡི།། རྣམ་གྲོལ་དོན་གཉེར་སློབ་མའི་ཚོགས་རྣམས་ཀྱིས།། རིག་པས་དཔྱད་ནས་འདི་ཕྱི་གཉིས་ཀྱི་མགོན།། མ་ནོར་ལམ་སྟོན་དཔོན་གསས་བཙལ་བྱས་ལ།། སྒོ་གསུམ་གུས་པ་ཆེན་པོས་མཆོད་ཅིང་བཀུར།།

འཁོར་འདས་གཉིས་ཀྱི་འབྱུང་གཞི། ཐེག་པ་ཐམས་ཅད་ཀྱི་ཡང་རྩེ། གྲུབ་མཐའ་ཐམས་ཅད་ཀྱི་མཐར་ཐུག  རྒྱུད་རྣམས་ཀུན་གྱི་རྒྱལ་པོ། བཀའ་རྣམས་ཀུན་གྱི་འབྱུང་གནས།  མན་ངག་ཀུན་གྱི་ཉིང་ཁུ། བསྟན་པ་ཀུན་གྱི་སྙིང་པོ། བདེར་གཤེགས་དགོངས་རྒྱུད་དགུའི་ཐུགས་བཅུད། གང་ཟག་ཉི་ཤུ་རྩ་བཞིའི་སྙན་རྒྱུད། གྲུབ་ཐོབ་བླ་མ་རྣམས་ཀྱི་ཉམས་རྒྱུད། སྐལ་ལྡན་རྣམས་ཀྱི་བདུད་རྩི། སྐལ་མེད་རྣམས་ཀྱི་བཙན་དུག་དུ་གྲགས་པའི་སྙིང་པོ་ཐིག་ལེ་ཉག་གཅིག། རང་གྲོལ་རིག་པའི་རྒྱལ་པོ། གསལ་སྟོང་འཛིན་མེད་ཀྱི་རིག་པ། དེ་བཞིན་མཚན་གྱི་རྣམ་གྲངས་དུ་མས་བརྒྱན་པའི་རྒྱལ་བ་ཀུན་ཏུ་བཟང་པོའི་ཐུགས་ཉིད་ཟབ་མོ་དེ་ཉིད།།

དང་པོ་ཁྱུང་ཆེན་ལྡིང་སྟབས་ཀྱིས་བཤད་པ། དཔེ་དང་སྦྱར་ན་ཁྱུང་ནམ་མཁར་ལྡིང་བའི་དུས་རྩལ་དྲུག་ལུས་ལ་རྫོགས་ནས་ལྡིང་བ་སྟེ།  སྒྲོ་སྤུ་གྲངས་མང་ཡང་གློ་སྙིང་ལས་སྐྱེས་པའི་འདྲེན་གཤོག་རླུང་འདྲལ་གཉིས་དང་།  མཆིན་མཚེར་ལས་སྐྱེས་པའི་འདེགས་གཤོག་གནམ་འདྲལ་གཉིས་དང་།  མཁལ་མ་ལས་སྐྱེས་པའི་མགྱོགས་གཤོག་ས་འདྲལ་གཉིས་དང་དྲུག་རྒྱས་པའི་དུས་སུ། གནམ་རི་ས་བྲག་རྩི་ཤིང་ཆུ་ཀླུང་ངམ་གྲོག་གཡང་རོང་ལ་སོགས་གང་ལའང་ཉམས་ང་མེད་པར་སྤྱི་རྒྱ་རླབས་ཀྱིས་གཅོད་ནས་ལྡིང་བའི་དཔེ་ལྟར། དོན་ལ་སྦྱར་ན།  ཡེ་ཤེས་རྣོ་གསལ་གྱི་རྩལ་དང་། དགོངས་པ་དམིགས་འཛིན་གྱི་རྩལ་དང་། ཤེས་རབ་རྒྱས་འཕེལ་གྱི་རྩལ་དང་།  དད་པ་རྒྱུན་ཆགས་ཀྱི་རྩལ་དང་།  བརྩོན་འགྲུས་ཞེན་འདེབས་ཀྱི་རྩལ་དང་།  ལྡོག་མེད་ལྟ་བའི་རྩལ་དྲུག་དང་ལྡན་པའི་སྐྱེས་བུ་ཡིས།  རྩ་བའི་ས་བཅད་ཀྱི་ཆིངས་ཆེན་པོ་དྲུག་དང་འབྲེལ་ནས།  དང་པོ་གཟུང་དོན་དོན་སྤྱི་མུན་པའི་རང་བཞིན་ཅན་དེ།  གཉིས་པ་ངོ་བོ་རྨོངས་ཤིང་དོན་གསལ་བ་མེད་པ།  གསུམ་པ་བརྡའ་ནི་རྟེན་ཅིང་འབྲེལ་བ།  བཞི་པ་ངེས་ཚིག་ནི་ཡང་དག་བདེན་པའི་དོན་མ་རིག་པ།  ལྔ་པ་དཔེ་དོན་རྣམ་གྲངས་དང་བཅས་པ་ལ།  དྲུག་པ་ཕྱི་མ་དཔེ་དོན་རྣམ་གྲངས་དང་བཅས་པ་རྣམས་འབྲེལ་ནས་བྱུང་བའི་ཚུལ་དྲུག་དང་བསྟུན་ནས་འཆད་པར་བྱ་བའོ།